اشحابادتا سالقىنداتقىشتى تاعى دا جاپپاي الىپ تاستاپ جاتىر
اشحاباد بيلىگى كوپقاباتتى ۇيلەردە، تۇرعىندار ورنالاستىرعان سالقىنداتقىشتى جاپپاي الىپ جاتىر. قازىرگى كەزدە استانادا ارنايى كولىك شاعىن اۋدانداردى ارالاپ، كوزگە كورىنگەن سالقىنداتقىشتاردى دەمونتاج جاساپ جاتىر.
تۇرعىنداردىڭ ايتۋىنشا، اشحاباد بيلىگى شارا قولدانعانىمەن، تۇرعىندار سالقىنداتقىشتى ءبارىبىر ورناتىپ جاتىر.
“جەرگىلىكتى بيلىك دەمونتاج جاساعانىمەن، جازدىگۇنى ىستىققا شىداۋ مۇمكىن ەمەس. بالالار شىداي الماي جىلايدى. سول ءۇشىن مۇزداتقىشتى قايتادان ورناتۋعا تۋرا كەلەدى. وعان 200-300 مانات تاعى تولەيمىز”، - دەيدى مير-4 شاعىن اۋدانىنىڭ تۇرعىندارى.
ءۇش جىل بۇرىن بيلىك كوپقاباتتى ۇيلەردىڭ سىرتىندا ورناتىلعان سالقىنداتقىشتار قالانىڭ ءسانىن كەتىرەدى دەپ، جاپپاي الىپ تاستاۋعا بۇيرىق شىعارعان. بۇل تۇرعىنداردىڭ قارسىلىعىن تۋعىزعان ەدى.
Abai.kz
