قازاقستان بوكسشىلارىنىڭ ەڭ جەڭىمپاز سايىسكەرلەر ەكەنىن قازىر بۇكىل الەم مويىندادى. سولاردىڭ اراسىندا جانقوش تۇراروۆتىڭ ەسىمى دە ەرەكشە اتالادى، اتاعى دا وزگەلەردەن شوقتىعى بيىك تۇر. ويتكەنى ول – جەڭىلىپ كورمەگەن بوكسشى.

شارشى الاڭعا شىققاننان كەيىن الەمدە ۇزدىك اتانۋدى ارماندامايتىن سپورتشى جوق. جانقوش تا بالالىق شاعىنان ءوز الدىنا وسىنداي اسقاق مىندەت قويعان ەكەن. قازىر ول سول بيىك ارمانىنا جەتۋ ءۇشىن تەر توگىپ ءجۇر جانە «مەن الەم چەمپيونى بولامىن!» دەگەن ۋادەسىن ورىنداۋدىڭ الدىندا تۇر. تاياۋدا وتاندىق سايتتاردىڭ بىرىنە بەرگەن سۇحباتىندا ول «ارمانىما جەتۋگە ءسال عانا قالدى» دەپ اشىعىن ايتقان بولاتىن.

كاسىبي رينگتەگى ەڭ ەستە قالارلىقتاي جەكپە-جەگىن وتانىمىزدا، «الماتى-ارەنا» سپورت سارايىندا وتكىزگەنىن ول ماقتانىشپەن ەسكە الادى. «18 مىڭعا جۋىق جانكۇيەرلەر جينالدى. ءبارى دە «جانقوش – جەڭىمپاز» دەپ ءبىر ادامداي ۇرانداعانداعى تولعانىسىمدى، ىشكى جان-دۇنيەمنىڭ اۋدارىلىپ تۇسكەنىن سوزبەن جەتكىزە المايمىن. مۇنىڭ قانداي باقىت ەكەنىن بىلسەڭىز» عوي دەپ، اعىنان جارىلادى ول.

جانقوش قازاقستاندا سپورتتىڭ دامۋىنا ەلباسى زور قولداۋ كورسەتىپ وتىرعانىن اتاپ كورسەتتى، «سول ءۇشىن نۇرسۇلتان نازارباەۆقا مىڭ دا ءبىر العىس ايتامىن» دەدى اتاقتى بوكسشى. سونداي-اق، «مەملەكەتىمىز باسشىسىنىڭ وسىنداي ساياساتى ارقاسىندا قر مادەنيەت جانە سپورت ءمينيسترى ا. مۇحامەديۇلى قازاقستاندىق سپورتتى جانە بوكستى دا ودان ءارى دامىتۋ ماقساتىندا بولاشاعى زور باعدارلامالاردى جۇزەگە اسىرۋدا» دەيدى ول.

– ارىستانبەك مۇحامەديۇلى ءوزى مينيستر بولىپ جۇمىس ىستەپ جاتقان كەزەڭ ارالىعىندا قازاق سپورتىن كوتەرۋ جولىندا قىرۋار ەڭبەك ءسىڭىردى. الەمدىك، ازيا قۇرلىعى بىرىنشىلىكتەرىندە دە ءبىزدىڭ سپورتشىلار وتە جوعارى كورسەتكىشتەرگە قول جەتكىزدى. مادەنيەت سالاسىندا دا بۇكىل ەلىمىز بويىنشا ءمانى زور، اۋقىمدى شارالار، كونتسەرتتەر وتكىزىلدى. ءبارى دە اسا جوعارى دەڭگەيدە ۇيىمداستىرىلدى. وسىنىڭ بارلىعى دا ءمينيستردىڭ تىكەلەي قولداۋى ناتيجەسىندە جۇزەگە اسۋدا، – دەيدى جانقوش تۇراروۆ.

Abai.kz