25 تامىز كۇنى «ازىرەت سۇلتان» مەملەكەتتىك تاريحي-مادەني قورىق-مۋزەيىندە «يادرولىق قارۋسىز الەم» تاقىرىبىندا فوتو كورمە اشىلدى. اتالمىش كورمە 29 تامىز – حالىقارالىق يادرولىق قارۋعا قارسى كۇرەس كۇنى مەرەكەسىنە وراي ۇيىمداستىرىلدى.

حح عاسىردىڭ سوڭىندا كسرو ۇكىمەتى ەلىمىزدىڭ سەمەي ءوڭىرىن يادرولىق قارۋدىڭ سىناق الاڭىنا اينالدىردى. ستاتيستيكالىق مالىمەتكە جۇگىنسەك، ءبىر ايدا 19-عا دەيىن سىناق جۇرگىزىپ وتىرعان. جالپى ەلىمىزدە 500-گە جۋىق يادرولىق قارۋدى سىناقتان وتكىزگەن ەكەن. وسىعان وراي ەلىمىزدە «نەۆادا-سەمەي» قوعامدىق قوزعالىسى قۇرىلىپ، ناتيجەسىندە ءبىر ايدا 19 مارتە سىناقتان وتەتىن يادرولىق قارۋ ون ەسەگە دەيىن ازايدى. 1991 جىلى 29 تامىزدا ەلباسىمىز ن.ءا.نازارباەۆتىڭ سەمەي پوليگونىن جابۋ تۋرالى جارلىعى شىقتى. ءسويتىپ تياناقتىلىق پەن تاباندىلىق تانىتقان قازاق حالقى ءوز ماقساتىنا جەتىپ، حالقىمىزدىڭ باسىنا تونگەن زۇلمات كۇندەر ارتتا قالىپ، ەگەمەندى، تاۋەلسىز ەلىمىز يادرولىق قارۋدان باس تارتىپ، بۇكىل الەمگە بەيبىتشىلىك ەسىگىن ايقارا اشتى.

كورمە ەكسپوزيتسياسىنا يادرولىق سىناق الاڭىنان تۇسكەن بىرەگەي فوتولار، ەلباسىمىز ن.ءا.نازارباەۆتىڭ بۇۇ-دا يادرولىق قارۋدان باس تارتۋ جونىندەگى جاساعان بايانداماسىنان كورىنىستەر، «نەۆادا-سەمەي» قوزعالىسىنىڭ ميتينگىلەرى مەن باسقوسۋلارىنان سىر شەرتكەن فوتوسۋرەتتەر قويىلدى.

Abai.kz