بيىل ەلباسى نۇرسۇلتان نازارباەۆ ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىندا «تۋعان جەر» باعدارلاماسىن ۇسىنعانى ءمالىم. وندا وتانداستاردى ەلىمىزدى كوركەيتۋگە ءسوز ەمەس، ءىس جۇزىندە اتسالىسۋعا شاقىردى. پرەزيدەنت ۇندەۋىنە مەڭدىقارالىقتار دا مەيلىنشە ءۇن قوسۋدا. وسى ورايدا، اۋدان تۇرعىندارى قاراتال اۋىلدىق وكرۋگىنە قاراستى ۇزىناعاش ەلدى مەكەنىنىڭ 60 جىلدىق مەرەيتويىن مەرەكەلەدى.

تۋعان جەرگە دەگەن سۇيىسپەنشىلىك نەنى ءبىل­دىرەدى، جالپى، باعدارلامانىڭ ءمانى نەدە؟ بۇل ەكولوگيانى جاقسارتۋعا جانە ەلدى مەكەندەردى اباتتاندىرۋعا باسا ءمان بەرۋدى، جەرگىلىكتى دەڭگەيدەگى تاريحي ەسكەرتكىشتەر مەن مادەني نىسانداردى قايتا قالپىنا كەلتىرۋدى كوزدەيدى. ال، ۇزىناعاش ەلدى مەكەنى ەلباسى ماقالاسى اياسىندا ءوزىنىڭ 60 جىلدىعىن اتىپ ءوتتى. جيىندا مەڭدىقارا اۋدانىنان شىققان تاۋ تۇلعالار، مەملەكەت جانە قوعام قايراتكەرلەرى ءسوز سويلەدى.

«تۋعان جەر» باعدارلاماسى اياسىندا تويلانعان تورقالى تويدا ۇلتتىق سالت-ءداستۇر مەن اتا-بابالارىمىزدان ميراس بولىپ قالعان مۇرالارىمىز ناسيحاتتالدى. تابيعاتىمىزعا ءتان سپورتتىق ويىندار دا كەڭىنەن كورىنىس تاپتى. اسىرەسە، ءدۇيىم جۇرتتىڭ دەلەبەسىن قوزدىراتىن الامان بايگە كوپشىلىكتىڭ كوزىن تويدىرىپ، كوڭىلىن سەمىرتتى.

60 جىلدىق تاريحى بار ۇزىناعاش اۋىلى اۋدان ورتالىعىنان سولتۇستىككە قاراي 60 شاقىرىم جەردە ورنالاسقان. تۇرعىندار سانى مىڭنان اسادى. جارتى عاسىردان استام ۋاقىت بۇرىن نەگىزى قالانسا دا، ەلدى مەكەن ءوز كوركىن جوعالتپاعان. ويتكەنى، وسكەن ولكەسىن كوركەيتۋ تۇرعىسىندا كاسىپكەرلەر تاراپىنان كوپ كومەك كورسەتىلۋدە. ءالى دە كورسەتىلە بەرمەك. ونىڭ دالەلى رەتىندە «تۋعان جەر» باعدارلاماسىن ايتۋعا بولادى.

Abai.kz