جاقىندا قوستاناي وڭىرىندە  اۋقىمدى مەرەكەلىك كونتسەرت ءوتتى. بۇل كونتسەرت قازاقستان حالقى اسسامبلەياسىنىڭ مۇرىندىق بولۋىمەن «ۇلكەن ەل – ۇلكەن وتباسى» رەسپۋبليكالىق جوبا شەڭبەرىندە ءوتتى.

جازعى سيتي-ورتالىق ساحناسىندا كەشكى ساعات التىدان مۋزىكا ويناي باستادى. مەرەكەلىك باعدارلامانى Dj Barbie جانە Dj Klayt قوستانايلىق بي توبى اشتى. دەمالۋشىلار كونتسەرتتى قىزىعا قاراپ ساحناعا جاقىن كەلىپ قارادى، كەيبىرەۋلەرى مۋزىكا اۋەنىنە بيلەدى. وبلىستىق دوستىق ءۇيى دايىنداعان ءۇش ساعاتتىق مۋزىكالىق مارافون ءىرى كونتسەرتكە اينالدى.

- «ەتنولەتو» فەستيۆالىن ءبىز ءبىرىنشى رەت وتكىزىپ وتىرمىز. 30 شىلدە حالىقارالىق دوستىق كۇنى بولعاندىقتان، قازاقستان حالقى اسسامبلەياسى ءۇشىن بۇل تاماشا مەرەكە. وسىنداي فەستيۆالدەردى تۇراقتى تۇردە وتكىزۋدى جوسپارلاپ وتىرمىز. قازىرگى ۋاقىتتا ءبىز «ەتنوسەلفي» فوتوكونكۋرسىنىڭ جوباسى بويىنشا جۇمىس جاساپ جاتىرمىز. قازىر ءوزىن فوتوعا ءتۇسىرۋ داعدىعا اينالدى، سوندىقتان جاستار اراسىنا قوسىلىپ، وسىنداي قارىم-قاتىناس جاساۋ ءادىسىن ۇسىنۋدى شەشتىك.  كەز كەلگەن ادام ءوزىنىن ۇلتتىق كيىمدە نەمەسە مۋزىكالىق اسپاپپەن تۇسكەن فوتوسىن جىبەرىپ، سىيلىق الۋ مۇمكىندىگى بار. باستى تالاپ – سەلفي بولۋى كەرەك،- دەيدى «قوستاناي وبلىسى اكىمدىگىنىڭ «قوعامدىق كەلىسىم» كمم ءبولىم باسشىسى زۋلفيا نابيەۆا حانىم.

ايتا كەتسەك، ارتىستەردى قوستانايلىقتار ساحنا ۇستىنەن فوتوعا ءتۇسىرىپ، قولتاڭباسىن الىپ جاتتى. ەكى ساعات بويى قوستانايلىقتار ءۇشىن قوستانايدىڭ ەڭ تالانتتى جاس ارتىستەرى ونەرىن كورسەتتى:  ازامات يبراەۆ، رۋسلانا پونومارەۆا, ماريا كۋبجاسوۆا, ۆلاديمير الەكسانين, ولگا ياروش, دياس تيۋلەگەنوۆ، ولگا كۆيتكا، ايسۇلۋ تۇتقۇشەۆانىڭ ۆوكالدىق ستۋدياسى، «التىن دالا» بي ۇجىمى، Interdance جانە Estel, سونداي-اق وبلىستىق دوستىق ءۇيىنىڭ ارتىستەرى مەن ەتنومادەني بىرلەستىكتەردىڭ وكىلدەرى. كونتسەرتتىك نومىرلەردەن باسقا مەرەكە قوناقتارىن تاماشا توسىن سىي كۇتىپ تۇردى.

كەش جۇرگىزۋشىلەرى ارمان بەكتۇرعانوۆ جانە زارينا كوكجانوۆا وبلىستىق اسسامبلەيا اتىنان كادەسىي كۇرىشكەلەرىن ويىنعا سالدى. كورەرمەندەرگە ءتۇرلى ەتنوستاردىڭ ادەت-عۇرىپتارى مەن داستۇرلەرىنە بايلانىستى سۇراقتارعا جاۋاپ بەرۋ ۇسىنىلدى. قوستانايلىقتار سۇيسىنە جاۋاپ بەرىپ سىيلىقتارىن الدى.

كەش كەزىندە جۇرگىزۋشىلەر قوناقتار اراسىندا ءبىرىنشى ماحابباتىنا كۇيەۋگە شىققان نەمەسە ۇيلەنگەن ادامدار بار ما ەكەنىن بىلىگىسى كەلدى. كورەرمەندەر ىشىندە وسىنداي جۇپ تابىلدى. ولار 9 سىنىپتا تانىسىپ، 40 جىل بويى بىرگە ءومىر ءسۇرىپ جاتقانىن ايتتى. ەرلى-زايپتىلار دا سونداي-اق ءوز سىيلىقتارىن الدى.

مەرەكە سوڭىندا ولگا ياروش ورىنداۋىنداعى «ۋلىبايسيا» ءانى كەزىندە اسپانعا دوستىقتى بىلدىرەتىن، ءتۇرلى سۋرەتتەرى بار اۋە شارلارى جىبەرىلدى.

- ەلىمىزدىڭ باستى قۇندىلىعى -  100 ەتنوستان اساتىن كوپ قىرلى مادەنيەت پەن شەكسىز دوستىقتى بىرىكتىرۋشى قازاقستان حالقى، - دەيدى ۇيىمداستىرۋشىلار.

ەرعالي بەرىكۇلى

Abai.kz