قازاقستان مۇسىلماندارى ءدىني باسقارماسى ميانمادا ورىن العان قايعىلى وقيعاعا بايلانىستى قاتتى الاڭداۋشىلىق ءبىلدىرىپ، جەرگىلىكتى تۇرعىندارعا جاسالعان قاسىرەتتى قاتاڭ ايىپتايدى، - دەپ حابارلايدى Abai.kz اقپاراتتىق پورتالى.

«400-دەن استام ادامنىڭ ءومىرىن قىرشىننان قيعان قاسىرەتتى وقيعا الەمنىڭ ءار تۇكپىرىندەگى مۇسىلمان جۇرتىنىڭ عانا ەمەس بارشا ادامزاتتىڭ الاڭداۋشىلىعىن تۋدىرۋدا»، - دەيدى ءدىني باسقارما وكىلدەرى.

قمدب ەلىمىزدەگى بارشا حالىقتان ناقاقتان قۇربان بولعان، زورلىق، زومبىلىق كورگەن ادامدار ءۇشىن ءبىر اللادان دۇعا ەتۋدى سۇرايدى.

«ويتكەنى اللا ەلشىسى: «دۇعا مۇسىلماننىڭ قارۋى» دەگەن. ميانماداعى ادامدى ازاپتاپ ءولتىرۋدىڭ شەكتەن شىققان بۇل كورىنىسى ءبىزدىڭ دە جانىمىزعا قاتتى باتتى. اللا تاعالا قاسيەتتى قۇراندا: «جازىقسىز ءبىر ادامنىڭ قانىن توگۋ – جەر بەتىندەگى بۇكىل ادامدى ولتىرگەنمەن بىردەي», – دەپ ەسكەرتكەن. اللانىڭ كۇللى ادامزاتقا جىبەرگەن بۇل اشىق ەسكەرتۋىن ۇمىتپاۋىمىز كەرەك. جاراتۋشى يەمىز بارشا ادامزات بالاسىنا مەيىرىم-شاپاعات، بەيبىت ءومىر، ىنتىماق، سابىر بەرسىن!» دەلىنگەن حابارلامادا.

Abai.kz