ءبىزدىڭ قۇلسارى قالاسى – ناعىز قازاقى مەكەن. 10 اۋىل، وڭكەي قازاق، كىشى ءجۇز، ياعني 40 رۋدان قۇرالعان جەر. باتىستىڭ ىشىندەگى قازاقشىلىقتىڭ قايماعى بۇزىلماعان جەر دەسە دە بولادى. اۋدانىمىزدا 80 مىڭنىڭ ۇستىندە حالىق بار. جالعىز ءتۇيىر مەشىتىمىز بار. وعان جاماعات سىيمايدى. مەشىت سالدىرۋعا ەشكىم ىنتالى ەمەس جانە وعان رۇقسات بەرىلمەيدى. سەبەبى، ۆاحابتار كوبەيىپ كەتەدى-ءمىس.

ءبىز ەشكىمدى جاتىرقامايتىن، قوناقجاي ەل بولعانىمىز سەبەپتى ەلىمىزدە بوي كوتەرگەن كاتوليك شىركەۋى دە بار. بىراق، ونىڭ نەمەن اينالىسىپ جاتقانىن ەشكىم بىلمەيدى. راسىندا دا، ءبىزدىڭ قۇلسارىعا كاتوليك شىركەۋى قاجەت پە ەدى؟ بۇل قالاي، قاشان، نە ءۇشىن، قانداي مۇقتاجدىقپەن بوي كوتەرگەنىنەن ەشكىم بەيحابار. مەن بىلەتىن بۇرىنعى پوبى پولياك ازاماتى. بۇلار ءبىزدىڭ باسشىلارعا اقپارات بەرىپ وتىرا ما ەكەن؟ بۇلار جايلى نە ءۇشىن وسى كۇنگە دەيىن اۋداندىق «كەڭ جىلىوي»، «قۇلسارى» گازەتتەرى بەلگىلى ءبىر ماعۇلماتتار بەرمەگەن؟ ءبىزدىڭ اۋداندا كاتوليك ءدىنىن ۇستاناتىن ادامدار بار ما؟ ونى تەكسەرۋ قۇزىرلى ورىنداردىڭ قايسىسىنا بەكىتىلگەن؟ نە ءۇشىن حالىق ءوز جەرىندەگى وزگە ءدىن وكىلدەرىنىڭ نە ىستەپ نە قويىپ جاتقاندىعىنان حابارسىز بولۋى كەرەك؟

بۇل ماقالانىڭ جازىلۋ سەبەبى دە بار. جاقىندا بولىپ وتكەن قۇربان ايتىمىزدان 2-3 كۇن بۇرىن قۇلسارىداعى كاتوليك شىركەۋىنىڭ قاسىنا باتۋت قۇرىلىپ، بالالارعا تەگىن بالمۇزداق ۇلەستىرىپتى. قازىر ونداي «جومارتقول» امالدار سانگە اينالا باستادى. ءبىزدىڭ قازەكەڭ «انشەيىن زات» دەسە ارىن ساتاتىن بولعان با، ول جەرگە 200-گە جۋىق حالىق جينالىپتى. بۇل نەنىڭ قۇرمەتى دەگەن سۇراقتارعا: «بۇگىن كاتوليك شىركەۋىنىڭ اشىق ەسىك كۇنى» دەگەن جاۋاپتار الىپتى. بالمۇزداق جەپ راحاتتانعان، ءالى وڭ-سولىن ايىرا قويماعان ويىن بالالارىن سونداي بيازىلىقپەن، قۇرمەتپەن، قوشەمەتپەن كاتوليك شىركەۋىنە كىرگىزىپتى. ول جەردەن ولار سۋرەتتەر سالىپ، اندەر ايتىپ، ءدىن تۋرالى ۋاعىزدار ەستىپ، قىسقاسى شىركەۋ جايىندا ەداۋىر ماعۇلماتتارعا قانىق بولىپتى.

بۇل قاقپانعا جاسىرىلعان ماي ەمەس پە؟ ءبىزدىڭ ەرمەلى قازاققا بۇل ءبىر كەرەمەت ءدىن بولىپ كورىنۋى عاجاپ ەمەس قوي. سەبەبى، ءوز ءدىنىن ۇستانسا ۆاحابيس دەگەن اتقا يە بولادى. مالىنىپ حيدجاپ كيۋىنە تۋرا كەلەدى. مەكتەپكە بارسا بىتپەيتىن ءبىر ورامال داۋى. ۇزىن ساقال، قىسقا بالاقتان ۇرەيى ۇشقان كەيبىر ورىسقۇل قازاقتارىمىز ءۇشىن يسلام ءدىنىنىڭ ارتىندا «تەررور» دەگەن قۇبىجىق جاسىرىنعان سىڭايلى. ال شەتەل سەريالدارىنا سۋسىنداپ تويىنعان قازاققا كاتوليك دىنىنەن تىنىشى، سودان قايىرلىسى جوق بولىپ كورىنۋى ابدەن مۇمكىن عوي.

بۇل ۋاقىتقا دەيىن تىڭشىنىڭ كەيپىن سومداعان شىركەۋ جان-جاعىنا قاراپ حالىقتىڭ مىنەز-قۇلقى، ادەت-عۇرپى، سالت-ساناسى، بارلىق اناتومياسىن تۇبەگەيلى تەكسەرىپ مەڭگەرگەن العان سياقتى. كەيىن، ۋاقىتى كەلىپ، باس كوتەرىپ، جۇتپالى ايداھار قۇساپ ءوز ميسسياسىن باستاپ جاتىر ما دەگەن ويعا دا قالادى ەكەنسىڭ. بۇلاردىڭ مۇنداي تىرلىكتەرىنە جول بولسىن! بۇل ويلاناتىن جاعداي. الدىن الىپ، كەڭەسىپ پىشكەن توننان ارتىعى جوق. كىمنىڭ قالاي ويلايتىنى ءبىزدى قىزىقتىرمايدى. بالالارىڭدى وزگە دىنگە، سەكتاعا كىرىپ كەتۋىنەن ساقتانىڭدار، جىلوي حالقى!

تۇرار شاپقارا

Abai.kz