مەملەكەت باسشىسىنىڭ لاتىن الىپبيىنە اۋىسۋ تۋرالى باستاماسىنا ەلىمىزدىڭ وليمپيادا چەمپيوندارى، سپورت قايراتكەرلەرى، سپورتتىق مەكەمەلەر ۇجىمدارى دا قىزۋ قولداۋ بىلدىرۋدە. بۇعان ەلباسىنىڭ اتىنا كەلىپ-ءتۇسىپ جاتقان حاتتار دالەل بولا الادى.

XXXI جازعى وليمپيادا ويىندارىنىڭ كۇمىس جۇلدەگەرى جازيرا جاپپارقۇل بارلىق قازاقستاندىق سپورتشىلاردىڭ اتىنان ەلباسىنا ەل سپورتىن دامىتۋعا قوسقان قوماقتى ۇلەسى ءۇشىن زور العىسىن ءبىلدىردى. «اعىمداعى جىلدىڭ ءساۋىر ايىندا شىققان «بولاشاققا باعدار: رۋحاني جاڭعىرۋ» اتتى ءسىزدىڭ ماقالاڭىزدى مۇقيات وقىپ، ودان العان شەكسىز قۋانىشىمدى سوزبەن جەتكىزە الماسپىن. وسى ماقالادا قازاق ءتىلىن لاتىن الىپبيىنە كوشىرۋ تۋرالى باستاما بىردەن كوڭىلىمنەن شىقتى. مۇنداي قادام قوعامدىق سانانى جاڭعىرتۋدىڭ نەگىزگى قاعيدالارىن قالىپتاستىرۋعا عانا ەمەس، سونىمەن قاتار بۇگىنگى زامانعا ساي دامۋىمىزعا يگى ىقپال ەتەتىنى كۇمانسىز. وسى باعىتتاعى ءسىزدىڭ ساليقالى ساياساتىڭىزدىڭ ناتيجەسىندە قازاقستان ازاماتتارىن تەك جارقىن بولاشاق كۇتىپ تۇرعانىن سەنىممەن ايتا الامىن»،- دەلىنگەن وليمپيادا جەڭىمپازىنىڭ حاتىندا.

قازاق ءتىلى ءالىپبيىنىڭ كيريلل قارپىنەن لاتىن قارپىنە اۋىسۋىن قولداعان ۇجىمداردىڭ قاتارىندا: «قازىرگى بەسسايىستان جانە سۋ سپورتى تۇرلەرىنەن وليمپيادالىق دايارلاۋ ورتالىعى» رمقك، «دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتالىعى» رمقك، «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى» رمقك جانە ت.ب. بار.

«قازاق ءتىلىن جاڭعىرتۋ قاجەتتىلىگى ونىڭ بارلىق الەۋەتىن تەك كوممۋنيكاتسيا قۇرالى رەتىندە عانا اشىپ قويماي، ۇلتتىق سايكەستىكتى نىعايتۋ، ۇلتتىق جاندانۋدىڭ قۋاتتى فاكتورى رەتىندە تانىتۋدا. ءالىپبيدىڭ رەفورماسى تاريحي العىشارتتارعا نەگىزدەلگەن. ول قازاقستاننىڭ جاھاندىق باسەكەلەستىگىن جوعارىلاتۋعا، الەمنىڭ عىلىمي-تانىمدىق، تەحنولوگيالىق جانە كوممۋنيكاتسيالىق كەڭىستىگىنە قارقىندى بىرىگۋگە باعىتتالعان»،- دەگەن ۇستانىمىن ءبىلدىرىپتى حات جولداۋشىلار.

دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ ديرەكتورى ا. تيۋمتەەۆ ءوز حاتىندا: «لاتىن الىپبيىنە كوشۋدى ءبىراۋىزدان قولدايمىز. بىرىنشىدەن، بۇل جاستارىمىزدىڭ بولاشاقتا دامۋىنا ۇلكەن سەپتىگىن تيگىزەدى. بۇل ءبىزدىڭ قوعامنىڭ الەمدەگى ەڭ دامىعان عىلىمعا، ادەبيەتكە جاقىنداۋىنا زور ىقپالىن تيگىزەدى. لاتىن قارپىنە كوشۋ سونداي-اق تۇركى حالىقتارىمەن قارىم-قاتىناستى نىعايتۋعا ۇلكەن سەپتىگىن تيگىزەدى»،-دەپ جازادى.

Abai.kz