سەنبى, 19 قازان 2019
كوكجيەك 2356 1 پىكىر 27 قىركۇيەك, 2017 ساعات 10:27

 «اباي وقۋلارى»: گۇلزات قايىرگەلدى جۇزدەن جۇيرىك شىقتى

 

اقتوبە قالاسىندا وتكەن رەسپۋبليكالىق "اباي اتىنداعى كوركەمسوز وقۋ شەبەرلەرىنىڭ" بايقاۋىندا گۇلزات قايىرگەلدى باس جۇلدەنى جەڭىپ الدى.

قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى مەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى ۇيىمداستىرعان ءداستۇرلى بايقاۋدا ەل اۋماعىنداعى 300-دەن استام جاس باق سىنادى. اۋداندىق، قالالىق، ايماقتىق ىرىكتەۋدەن ىركىلمەي وتكەن 15 كوركەمسوز وقۋ شەبەرى بۇگىن اقتوبە قالاسىندا اقتىق سايىستا ونەر كورسەتتى. بايقاۋ شارتىنا ساي العاشقى اينالىمدا ۇمىتكەرلەر قازاقتىڭ بەلگىلى جازۋشىلارىنىڭ كوركەمدىگى جوعارى پروزالىق شىعارمالارىنان ءۇزىندى وقىسا، ەكىنشى كەزەڭدە پوەزيالىق شىعارمالاردى كوركەمسوز وقۋ تالاپتارىنا ساي ورىنداپ شىقتى.

قاتىسۋشىلاردىڭ ونەرى مەن ءبىلىم دەڭگەيىن عالىم، مەملەكەت جانە قوعام قايراتكەرى امانگەلدى ايتالى توراعالىق ەتكەن قازىلار القاسى باعالادى. قازىلار شەشىمىمەن اقمولا وبلىسىنىڭ نامىسىن قورعاعان گۇلزات قايىرگەلدى باس جۇلدەنى يەمدەنىپ، 300 000 تەڭگەنىڭ سەرتيفيكاتىن ۇتىپ الدى.

- بايقاۋ وتە جوعارى دارەجەدە ءوتتى. بارلىق قاتىسۋشىلار وتە تالانتتى، دارىندى. راسىن ايتسام، قازىلار القاسىنىڭ تاڭداۋى ماعان تۇسەتىندىگىنە  كۇماندى بولدىم. دەسە دە، ەڭبەگىم باعالانىپ، جوعارعى ناتيجە كورسەتكەندىگى قۋانتادى. تىلەكتەستىك بىلدىرگەن بارلىق كورەرمەنگە العىسىمدى ايتامىن،- دەيدى گ.قايىرگەلدى.

جۇلدەلى ءى ورىنعا ءدىلدا حايران (قوستاناي وبلىسى) لايىق تانىلسا، ءىى ورىندى ماڭعىستاۋلىق الىبەك تاعابەردين ەنشىلەدى. ۇزدىكتەر ۇشتىگىن مەيىرجان البەكوۆ (شىعىس قازاقستان) پەن ورازبەك باحاتحان (پاۆلودار) تۇيىندەدى. نۇرسۇلتان وتار، ايگەرىم بايىسبەك، جانار ناقوۆالارعا ىنتالاندىرۋ سەرتيفيكاتى مەن 50 000 تەڭگە تابىستالدى. بايقاۋعا قاتىسۋشىلار اقتوبە وبلىستىق تىلدەردى دامىتۋ باسقارماسىنىڭ "العىسحاتىمەن" ماراپاتتالدى.

Abai.kz

1 پىكىر