قۇربانالى احمەت قاجى سوپىلاردىڭ ىشىندەگى اداسقانداردىڭ ءبىرى رەتىندە تانىلعان. ءبىر كەزدەرى، اسىرەسە، قاسيەتتى قۇراننىڭ سوزدەرىن بۇرمالاعانى ءۇشىن ءدىنتانۋشىلار تاراپىنان نارازىلىققا ۇشىراعانىن جاقسى بىلەمىز. ەگەر قۇربانالى تازا ءدىن جولمەن جۇرسە، ادامدارعا اياقتارىن سۇيۋگە، وعان ەڭكەيىپ تابىنۋعا رۇقسات بەرمەس ەدى عوي. قۇربانالىنىڭ وزىنە تابىندىرۋ ارەكەتى ءتىپتى سولتۇستىك كورەيا باسشىسى كيم چەن ىننان اسىپ كەتىپ تۇر.

ەكەۋىن سالىستىرايىق، الەۋمەتتىك جەلىلەردە كورەي ديكتاتورىنىڭ ۆيدەولارىن قاراساڭ، حالىق جۇگىرىپ كەلىپ، قولىنان ۇستاپ، سەكىرىپ جىلاپ جاتقانىن كورەمىز. بىراق، قۇربانالىنىڭ اياعىنا جىعىلعانىنداي، كورەيلەردىڭ باسشىلارىنىڭ اياقتارىن ءسۇيىپ جاتقاندى مۇلدە كورمەيسىڭ. بەينەجازبانى قاراساڭىز،  تابىنۋشىلارى پىرلەرىنىڭ اياعىن جەرگە تيگىزبەي اق كىلەممەن الىپ كەلەدى. كورەي باسشىسى قاتىگەز، ديكتاتور بولىپ تانىلسا دا، حالقى ونى قۇربانالىنى قارسى العانداي، ەشكىم كوتەرىپ قارسى العانىن مۇلدە كورمەيمىز.

سوندا قۇربانالىنىڭ بۇل جەردە ديكتاتورلىعى ما، قاتىگەزدىگى مە؟! الدە سول پەندەنىڭ ساندىراعىنا سەنىپ، قۇدايىنداي تابىنۋشىلاردىڭ سوقىر سەنىمى مە؟ قۇربانالى قاجىنىڭ ولاردى وزدەرىنە كوندىرگەن سيقىرلى ارەكەتتەرى مە؟  اداسقان اعايىنداردىڭ جىلاپ، اللا تاعالانى ۇلىقتاۋ دۇعاسى - «اللاھۋ اكبار» دەپ ايتىپ، بىراق پەندە قۇربانالىنىڭ اياعىن ءسۇيىپ، ءتىپتى ارت جاق كيىمىن قولمەن ۇستاپ، ماڭدايىنا تيگىزىپ جاتىرقانىن كورەسىڭ. ءتىپتى اللا ەلشىسى (وعان اللانىڭ سالاۋاتى مەن سالەمى بولسىن) مۇحاممەد (س.ع.س.) پايعامبارىمىزدى قۇرمەتتەپ، قادىرلەسە دە، اياعىن ءسۇيىپ، بىلاي ەشكىم تابىنباعان. ويلانايىق!

تالعات قاتاۋوۆ، قوعام بەلسەندىسى

Abai.kz