قۋانىشتى حابار: اعامىزدىڭ ءۇش كىتابى بۇرىندارى لوندوندا اعىلشىن تىلىندە جارىق كورگەن بولسا، ەندى ونىڭ 75 جاسقا كەلۋىنە وراي لوندوندا "دۋلات يسابەكوۆ فەستيۆالى" وتپەك ەكەن. فەستيۆال اياسىندا قازان ايىنىڭ 1-كۇنى «جاۋ جۇرەك» اتتى سپەكتاكلدى اۋەزوۆ اتىنداعى اكادەميالىق تەاتر قويادى. قازان ايىنىڭ 2-كۇنى قازاق جازۋشىسى لوردتار پالاتاسىندا ءسوز سويلەمەك. وسى ارادا اتاپ وتەرلىگى، يسابەكوۆ قازاق جازۋشىلارى ىشىندە ءبىرىنشى مارتە سول مىنبەدە ءسوز سويلەيتىن جازۋشى بولماق. ال تۇركى دۇنيەسىندە بولسا، ءۇشىنشى جازۋشى. ويتكەنى دۋلات يسابەكوۆتان بۇرىن  شىنعىس ايتماتوۆ، ورحان پامۇق سول مىنبەگە شىعىپ ءسوز العان ەكەن. بۇل ءبىزدىڭ ويىمىزشا، قازاق ادەبيەتىنىڭ الەمگە تانىلۋى بارىسىندا ۇلكەن مارتەبە، ۇلكەن قۋانىش. جازۋشىنىڭ ەندىگى ارمانى – كىتاپتارىنىڭ تۇركيادا، ىستامبۇلدا، تۇرىك تىلىنە اۋدارىلىپ، جارىق كورۋى. قۇداي قالاسا ول دا بولادى دەگەن ۇمىتتەمىز.

ەستەرىڭىزگە سالا كەتەيىك، جازۋشىنىڭ بۇعان دەيىن ءۇش كىتابى اعىلشىن تىلىندە لوندوندا جارىق كورگە. ولار: «گاۋھارتاس» اتتى اڭگىمەلەر مەن پوۆەستەر جيناعى. جيناقتى روبين تومسون دەگەن جازۋشى اعىلشىن تىلىنە اۋدارعان. ول كىتاپقا «گاۋھارتاس»، «سۇيەكشى»، «وكپەك جولاۋشى»، «ەسكەرتكىش وپەراتسياسى»، «قابىلان» اتتى اڭگىمەلەر ەنگەن. ەكىنشى كىتاپ «ءبىز سوعىستى كورگەن جوقپىز» (We never knew the war), ءۇشىنشى اۋدارىلعان كىتاپ «پەسالار جيناعى». سونىمەن قاتار «وكپەك جولاۋشى» (Transit Passenger) اتتى پەساسى لوندوندا 2014 جىلى ساحناعا شىققان ەكەن. ال قازان ايىنىڭ 4 كۇنى بولسا جازۋشىنىڭ «اققۋ جىبەك» دەگەن پەساسى قويىلادى.

جازۋشى دۋلات يسابەكوۆ مۇنىڭ بارلىعىنىڭ تاۋەلسىزدىكتىڭ ارقاسى ەكەنىن ايتۋدا. «ەگەر كەڭەس وداعى كەزىندە وسىلاي لوندوندا كىتابىم شىققاندا ءتۇرلى بالە جالالارمەن قۋدالانىپ كەتەتىنىن ەدىم»، - دەيدى ول. لوندونداعى وسى ءىس-شارالار دۋلات يسابەكوۆتىڭ 75 جاسىنا ءدوپ كەلۋدە.

سونىمەن جازۋشىنىڭ 75 جىلدىعىن اتاۋ قازاقستاننان بۇرىن ۇلى بريتانيا ەلىندە باستالىپ كەتكەن ەكەن. دۋلات اعا، 75 جاسىڭىز قۇتتى بولسىن! ارقاشان ءسىزدى ادەبيەت پەن مادەنيەتتىڭ بيىگىنەن كورەتىن بولايىق!

ابدىۋاقاپ قارا

تاريح عىلىمىنىڭ دوكتورى، ميمار سينان

كوركەم ونەر ۋنيۆەرسيتەتىنىڭ پروفەسسورى

Abai.kz