سەنبى, 1 قازان 2022
جانايقاي 4371 0 پىكىر 13 قازان, 2017 ساعات 12:48

اسانوۆ مىرزا، ۇلىمنىڭ تاعدىرىنا اراشا ءتۇسىڭىز!

قۇرمەتتى جاقىپ قاجىمانۇلى!

مەن وزىڭىزگە ۇلىم نۇرتۋعان مۇزامەلوۆتىڭ تاعدىرىنا الاڭداپ، ارنايى حات جازىپ وتىرمىن. ءۇيدىڭ ۇلكەنى «وردا بۇزار وتىز جاستان اسقاندا» اقمولا وبلىسى تسەلينوگراد اۋدانى تالاپكەر اۋىلدىق وكرۋگىنىڭ اكىمى بولىپ تاعايىندالدى.بۇل 2014 جىلى ەدى. ول بۇل قىزمەتكە ءوز بىلىمىمەن، تاجىريبەسىمەن ءارى وسىعان دەيىن اتقارعان ىستەرىنىڭ ناتيجەلىلىگىمەن جەتتى.

ءبىر جىل وتكەن سوڭ، ياعني 2015 جىلى 6 ناۋرىزدا اۋىلدىق وكرۋگ اۋماعىنا قارايتىن جەر تەلىمدەرىن تەكسەرۋ كەزىندە نۇرتۋعان مۇزامەلوۆ 41 جەر ۋچاسكەسىنىڭ جالعا الۋ مەرزىمىن ۇزارتۋ جونىندەگى قۇجات جالعان بولۋى مۇمكىن ەكەنىن ءبىلىپ، ءتيىستى ورىندارعا شاعىم تۇسىرەدى. ءوزىنىڭ ماماندىعى زاڭگەر بولعاندىقتان، ول بۇل ىستە ءبىر شيكىلىك بارىن تەز تۇسىنگەنى ءشۇباسىز.

(بۇل - نۇرتۋعان مۇزامەلوۆ)

كوپ وتپەي وسى ءىس بويىنشا تسەلينوگراد اۋدانى ىشكى ىستەر ءبولىمى قىلمىستىق ءىس قوزعايدى. ءبىر قاراعاندا، مۇنداي ىستەر قالىپتى وقيعالاردىڭ ءبىرى سەكىلدى كورىنۋى مۇمكىن. الايدا، 2017 جىلعى 29 مامىر كۇنى ءدال وسى تۇلعا كۇدىكتى بوپ تانىلىپ، 2017 جىلعى 16 ماۋسىم كۇنى ونىڭ ارەكەتى قر قك-ءنىڭ 177 بابىنىڭ 4 بولىگى «ا، ب» تارماقتارىمەن جانە اتالعان كودەكستىڭ 235 بابى 3 بولىگىمەن قىلمىستىق ءىس جاسادى دەپ دارەجەلەنىپ (الاياقتىق جانە ۇيىمداسقان قىلمىستىق توپقا قاتىسۋ), قاماۋعا الىندى. ياعني، ن.ن.مۇزامەلوۆ ۇيىمداسقان قىلمىستىق توپقا قاتىسىپ، سول توپتىڭ مۇددەسىنە تالاپكەر اۋىلدىق وكرۋگىنىڭ جەر ۋچاسكەلەرىن جالعا الۋدى ۇزارتۋ جونىندە زاڭسىز تۇردە 45 وكىم شىعارعان دەپ ايىپتالىپ وتىر. قالاي تۇسىنسەك بولادى؟ ءوزى وسى ءىس بويىنشا تەكسەرۋ جۇرگىزتىپ، قۇقىق قورعاۋ ورگاندارىنىڭ نازارىن ەلدەن بۇرىن اۋدارىپ، ەڭ باستىسى ەكى جىل بويى وسى قىلمىستىق ءىستى اشۋعا بار كۇش-جىگەرىن جۇمساعان ادامنىڭ ءوزى كۇدىكتى رەتىندە قامالعانى اقىلعا سىيا ما؟ ەگەر بۇل ىسكە ءوزىنىڭ قانداي دا ءبىر قاتىسى بولسا، ول مۇنداي قادامعا مۇلدەم بارماس ەدى عوي...

تەرگەۋشىلەردىڭ تاققان كىناسى 45 جەر تەلىمىن بەرۋ تۋرالى شەشىمدەردە نۇرتۋعان مۇزامەلوۆتىڭ قولى قويىلعان بولىپ شىقتى. ءبىز امالسىزدان قويىلعان قولدى سوت ساراپتاماسىنان وتكىزدىك. قازىرگى تاڭدا قولجازبانى تانۋ ساراپتاماسى وتكىزىلدى، 2017 جىلعى 28 ماۋسىمداعى №1335 جانە 2017 جىلعى 21 شىلدەدەگى №1691 سوت قورىتىندىسىنا سايكەس بارلىق زاڭسىز شىعارىلعان وكىمدەرگە ن.ن.مۇزامەلوۆتىڭ قولى قويىلماعان، ياعني ن.ن.مۇزامەلوۆتىڭ قولىن سايكەستەندىرىپ قويۋعا تىرىسقان باسقا تۇلعانىڭ قولىمەن ورىندالعانى ەكسپەرتيزا بويىنشا انىقتالدى.

جوعارىدا تىزبەكتەلگەن ساراپتاما قورىتىندىسى نەگىزىندە تەرگەۋ ورگاندارى اتالعان تۇلعاعا قاتىستى قىلمىستىق ءىستى توقتاتۋعا مىندەتتى ەدى، الايدا ءالى كۇنگە دەيىن ول ورىندالعان جوق. تەرگەۋ ءالى ءجۇرىپ جاتىر.

بۇل ءىس بويىنشا شىندىقتى تالاپ ەتۋ ماقساتىندا بارلىق ءمان-جايدى بۇگە-شىگەسىنە دەيىن جازىپ، كومەك سۇراماعان ادامىمىز كەمدە كەم. اۋىل ارداگەرلەرىنىڭ اتىنان دا وتىنىشتەر ءتۇستى، ولار ءوز سوزدەرىندە اۋىلدا بۇنداي اكىمنىڭ بۇرىن-سوڭدى بولماعانىن، ءوزىنىڭ جاس ەكەندىگىنە قاراماستان بۇرىنعى اكىمدەردىڭ ويلاۋعا دا شاماسى جەتپەگەن ءتيىمدى ءىس-شارالار وتكىزگەنىن، الدىنا قويعان ماقساتىن تياناقتى دا ايقىن ورىندايتىنىن، وزەكتى ماسەلەنىڭ ارقايسىسىنا جان-تانىمەن كىرىسىپ، جەدەل شەشىم قابىلداي الاتىنى تۋرالى جازعان. اۋىل حالقى ۇلىمنىڭ اق ەكەنىنە سەنەدى ءارى باسىنا تۇسكەن بۇل قيىندىقتى جەڭىپ، اۋىلعا قايتا ورالسا ەكەن دەپ تىلەيدى.

تەرگەۋ بارىسىندا ن.مۇزالەموۆتىڭ قولى قويىلعان قۇجاتتاردى تىركەۋگە ن. ەسىمدى تۇلعا اكەلىپ وتىرعان، قازىرگى تاڭدا ول كىسى قايتىس بولعان. تەرگەۋ بارىسىندا ن.مۇزالەموۆتىڭ قولىن قويعان ناقتى سول تۇلعا ەكەنىن تانۋ ساراپتاماسى تاعايىندالدى. ەگەر ول كىسى بۇل ومىردە جوق بولسا قايتىس بولعان تۇلعانىڭ قولجازباسىن تانۋدى قالاي انىقتاۋعا بولادى؟

ءدال وسى ساتتە، بىرنەشە شىنايى فاكتى بولسا دا تەرگەۋ ءىسى قانداي ماقساتقا جەتۋدى كوزدەۋدە دەگەن سۇراق كوكەيگە وزىنەن ءوزى ورالا تۇسەدى. ەگەر ۇيىمداسقان قىلمىستىق توپتىڭ كىناسى دالەلدەنگەن بولسا وندا نەگە تەك مەنىڭ ۇلىمدى عانا قاماپ وتىر؟ وزگە مۇشەلەر نەگە بوستاندىقتا ءجۇر؟ ونىڭ قاماۋعا الۋ ۋاقىتىن ۇنەمى سوزا بەرۋدىڭ نە قاجەتى بار؟ الدە تەرگەۋ ناقتى ن.مۇزالەموۆتى قۇرباندىققا شالۋعا بەكىنىپ وتىر ما؟ سەبەبى ولارعا اۋىلدىق اكىم بولسا دا، بىلدەي ءبىر اكىمدى قۇرىقتادىق دەگەن ۇلكەن جەتىستىك بولىپ تابىلا ما؟ مەنى مازالايتىن سۇراقتار كوپ.

ايتپاقشى، ايىپتاۋ تەك سول ۇيىمداسقان قىلمىستىق توپ جەتەكشىسىنىڭ ايتۋى بويىنشا عانا قۇرىلعان. سونداي-اق، ون شاقتى قىلمىستىق ءىس جاساپ، سول قىلمىستىق ارەكەتكە جيىرمادان استام ادامدى تارتقان توپ جەتەكشىسى بوستاندىقتا ءجۇر. سوندا قىلمىستىق توپتى قۇرۋشى ادام «تەرگەۋگە كومەكتەسەمىن» دەگەن جەلەۋمەن بارىنەن قۇتىلىپ، سولاردىڭ زاڭسىز ارەكەتىمەن كۇرەسكەن ۇلىم ايىپتى بولماق پا؟ قىلمىستىق توپ قۇرعانى دالەلدەنگەن ادامنىڭ كۋالاندىرۋى بويىنشا مەنىڭ ۇلىمدى قاماپ وتىرعاندارى، ونىڭ ايتۋىنان باسقا بىردە ءبىر دالەل-دايەكتىڭ جوقتىعى نەگە ەسكەرىلمەي وتىر؟ مەنىڭ ۇلىم نۇرتۋعان نۇرالىۇلىنىڭ كامەلەت جاسىنا تولماعان 3 بالاسى بار. سول نەمەرەلەرىم كورگەن سايىن: «اتا، اكەم قاشان كەلەدى؟» دەپ سۇراعاندا، جۇرەگىم ەزىلىپ كەتەدى. ولارعا «جۋىقتا كەلەدى» دەپ ايتۋدان شارشادىم.

قادىرلى جاقىپ قاجىمانۇلى!

ءسىزدى ەلباسىنىڭ سەنىمدى سەرىگى ءارى ادىلەتتى جاقتاۋشى، ارى دا، جانى دا تازا ادام دەپ بىلەمىن! ءاربىر ىسىڭىزگە سىرتتاي ءسۇيىنىپ جۇرەمىن. اۋداندىق ءتيىستى مەكەمەلەردەن قايىر بولماعان سوڭ وزىڭىزگە جۇگىنىپ وتىرمىن. ءبىر قاراعاندا بۇل ءبىر كىشكەنە ءىس بولىپ كورىنەر. بىراق اتپال ازاماتتىڭ، ءبىر وتباسىنىڭ تاعدىرى تۇرعانىن قاپەرگە الارسىز دەگەن ۇمىتتەمىن. مەن ەلىمىزدە ادىلدىكتىڭ بارىنا سەنگىم كەلەدى.

قۇرمەتپەن نۇرالى قاليەۆ,

زەينەتكەر.

Abai.kz

0 پىكىر