قازاق كۇشەيسە - بىرلىكپەن كۇشەيگەن!
قازىرگى تاڭدا ەلىمىز ەكونوميكاسى نىق، الەۋمەتتىك-ساياسي جاعدايى تۇراقتالعان الدىڭعى 50 دامىعان مەملەكەتتىڭ قاتارىنا كىرگەلى وتىرعانىن بارلىعىمىز جاقسى بىلەمىز. بۇل دەگەنىمىز – «قازاقستان-2030» ستراتەگياسىن مەزگىلىنەن بۇرىن ورىنداعانىمىزدىڭ بەلگىسى.
ەلباسى نۇرسۇلتان نازارباەۆتىڭ قازاقستان حالقىنا جولداۋىندا، جاڭا دامىعان، ءوركەندەگەن بولاشاققا جەتەلەيتىن ماڭىزدى قۇجات – «قازاقستان-2050» ستراتەگياسى ۇسىنىلدى. حالىقتىڭ ءال-اۋقاتى، تۇرمىستىق جاعدايى، رۋحاني بايلىعى تەك وسىنداي ۇلكەن جوسپارلاردى قۇرىپ، سوعان دەگەن تالپىنىستىڭ ناتيجەسىنەن عانا بولا الادى. ەلباسىمىزدىڭ كەمەڭگەر ساياساتى مەن حالىقتىڭ اۋىزبىرشىلىگىنىڭ، ناقتى قويىلعان ماقساتتار مەن مىندەتتەردىڭ ارقاسىندا «قازاقستان-2030» ستراتەگياسىن ون بەس جىلدىڭ ىشىندە جۇزەگە اسىردىق. بۇل ستراتەگيانىڭ جۇزەگە اسۋىنا قازاقستاننىڭ ءار ازاماتىنىڭ وزىندىك ۇلەسى زور. «ەلۋ جىلدا – ەل جاڭا» دەمەكشى، ءبىزدىڭ ەلىمىز جيىرما جىلدا كەرەمەت تابىستارعا جەتتى.
«قازاق السىرەسە – الاۋىزدىقتان ءالسىرەگەن، كۇشەيسە – بىرلىكپەن كۇشەيگەن» دەپ، اششى بولسا دا، شىندىقتى ايتقان ەلباسى، بارلىعىمىزدى بىرلىككە، دوستىققا، ىنتىماققا شاقىرادى. ەگەر ءبىزدى السىرەتەتىن سىرتقى جانە ىشكى فاكتورلارعا بەرىلەتىن بولساق، قانشا توككەن ماڭداي تەرىمىز زايا كەتەدى. ەل بولىپ ءبىر جاعادان – باس، ءبىر جەڭنەن – قول شىعارا الاتىن بولساق قانا، قانداي دا بولماسىن فاكتورلار بىزگە اسەرىن تيگىزە المايتىنى ايدان انىق. كۇندەلىكتى بولىپ جاتقان سىرت ەلدەردەگى وقيعالاردى مىسال ەتۋگە بولادى، قانتوگىس، تۇراقسىزدىق سالدارىنان قانشاما ەلدەردىڭ قۇردىمعا كەتىپ بارا جاتقانىن كورىپ ءجۇرمىز. سوندىقتان، بارلىعىمىز ءبىر جىپتەن ۇستايتىن بولساق، ءالى تالاي بەلەستەردى، شىڭداردى باعىندىرارمىز.
«قازاقستان ەكونوميكاسىنداعى شاعىن جانە ورتا بيزنەس ۇلەسى 2030 جىلعا قاراي ەكى ەسە ءوسۋى ءتيىس. ال، 2050 جىلعا قاراي بۇل سەكتور باسىمدىقتى بولادى» دەپ اتاپ ءوتتى ءوز جولداۋىندا مەملەكەت باسشىسى. راسىندا دا، ەل ەكونوميكاسىنىڭ تۇراقتانۋىنىڭ ءبىردەن-ءبىر سەبەبى – شاعىن جانە ورتا بيزنەستىڭ دامۋى. ءاربىر دامىعان ەلدى قاراساق، ەل ەكونوميكاسىن ۇستاپ تۇرعان شاعىن جانە ورتا بيزنەس بولىپ تابىلادى. قازىرگى ۋاقىتتا بيزنەستى دامىتۋ ءۇشىن مەملەكەت تاراپىنان كوپتەگەن كومەك كورسەتىلىپ جاتىر، بىزگە تەك قورىقپاي العا ۇمتىلۋ كەرەك، سوندا عانا جەتىستىككە جەتەمىز.
بارلىق ۇلت وكىلدەرىمەن ءتىل تابىسىپ، بەيبىتشىلىك پەن كەلىسىمدە ءومىر ءسۇرۋ بارشا قازاقستاندىقتىڭ باستى قاعيداتى بولۋى شارت. بۇل تۋرالى ن.نازارباەۆ ءجيى ايتادى. بۇگىندە قازاقتاردىڭ باۋىرمال، قوناقجاي حالىق ەكەنىن بارلىق ەل مو-يىنداپ وتىر. ءبىز وسى قاسيەتتەرىمىزدەن ايىرىلىپ قالماۋىمىز كەرەك. كوپ ۇلتتى مەملەكەت بولا تۇرا، بىرلىگىمىز جاراسقان ەلمىز. بارلىق ۇلتتارمەن تاتۋ-ءتاتتى ءومىر سۇرسەك قانا باسقا ەلدەردەن تۇعىرىمىز بيىك بولادى، دوستىق قارىم-قاتىناسىمىز ودان ءارى جاقساراتىنى انىق.
تيمۋر ورازاقوۆ
Abai.kz
