قازىر قالامداستارىمىز  ءبىر  جازىلماس  «دەرتكە» ۇشىرادى.  ول جازۋ ەملەسىنە بايلانىستى. قازىر ەكىنىڭ ءبىرى كورىنگەن جەرگە قوس نۇكتە قويا بەرەتىن بولدى. ديرەكتور دەسە دە، رەداكتور دەسە دە - قوس نۇكتە. ال ەرەجە بويىنشا نەگىزىنەن جالپىلاۋىش ءماندى ءسوزدىڭ الدىنان كەيىن قويىلادى. شىندىعىنا كەلسەك، بۇگىندە ارىپتەستەرىمىزدىڭ دەنى جالپى مەن جالقىدا شارۋاسى جوق، شۇپىرلەتىپ قويا بەرەدى. وعان مىسالدى كوپ گازەتتىڭ مەكەن-جايىن وقىپ كورسەڭىز تەز تاباسىز.

سول سياقتى تىرناقشا دا ويىنشىققا اينالدى. مىسالى، «تۇركىستان» گازەتىندە (№42.(1212)19.10.2017) انار لەپەسوۆا اۋەزوۆ تەاترىنىڭ جاڭا ماۋسىمىنىڭ اشىلۋى تۋرالى ماقالاسىندا:«...تەاتردىڭ «ادەبيەت ءبولىمىنىڭ» مەڭگەرۋشىسى، حالىق­ارالىق «الاش» سىيلىعىنىڭ لاۋرەاتى  ءاليا بوپەجانوۆا جانە «مۋزەي» ءبولىمىنىڭ جەتەكشىسى نارگيز تامابەكقىزى قاتىستى. جيىننىڭ مودەراتورى تەاتردىڭ «ءباسپاسوز قىزمەتى» ءبولىمىنىڭ جەتەكشىسى، حالىقارالىق «الاش» ادەبي سىيلىعىنىڭ لاۋرەاتى باقىت بەدەلحان بولدى» دەپ جازادى. وسىنداعى استىن سىزعان سوزدەر باس ىرىپپەن دە، تىرناقشاعا دا الىنباۋى كەرەك ەمەس پە؟

تاعى ءبىر «دەرت» - مەكەمە، كاسىپورىندارى ءوز اتىن قۇجات بلانكىلەرىندە قالاي جازسا، سول عيماراتتارىنىڭ  ماڭدايشاسىنا دا سول كۇيىنشە، اششى ىشەكتەي سوزىپ جازاتىن داعدىعا اينالدى. سوندا دا  قاپتاپ تۇرعان تىرناقشا مەن اببرەۆياتۋرالار.

ايتپاعىم، تىنىس بەلگىنىڭ ەرەجەلەرىنە پىسقىرماي بارامىز. بالكىم، مەن قازاق ءتىلى ەملەسىنە ەنگەن جاڭالىقتاردان بەيحابارمىن با؟ تورەلىگىن «اباي» پورتالىن وقيتىن ماماندار ايتىپ بەرسە دەيمىن. كىمدىكى دۇرىس؟

ت. ت.جاڭاشالوۆ، قوستاناي

Abai.kz