پاۆلودار قالاسىندا پاتشالىق-كەڭەستىك كەزەڭدەردىڭ يدەولوگياسىنان تۋىنداعان اتاۋلاردى ەگەمەن ەلدىڭ ونوماستيكا ساياساتىنا ساي اتاۋلارعا اۋىستىرۋ ماسەلەسى وقتىن-وقتىن كوتەرىلۋدە. ناتيجە جوق ەمەس، بار: كۋيبىشەۆ، سۆەردلوۆ، كالينين، دزەرجينسكي سياقتى قىزىل كوميسسارلاردىڭ قۇرمەتىنە قويىلعان كوشە اتاۋلارىنان ارىلعانىمىزعا ءبىرشاما جىل ءوتتى. بىراق ەرتىستىڭ كەرەكۋ وڭىرىنە ەش قاتىسى جوق پاتشازادانىڭ، رەسەي يمپەرياسىنىڭ قولباسشىلارى مەن بولشەۆيكتەر كوسەمىنىڭ ەسىم-سويلارىنان تۇراتىن اتاۋلاردان وسى كۇنگە دەيىن قۇتىلا الماعانىمىز اششى شىندىق. جەرگىلىكتى بيلىك تاۋەلسىز ءورىستىلدى جۋرناليستەر مەن ات توبەلىندەي پاتشاشىل-كەڭەسشىل توپتىڭ كارىنەن سەسكەنىپ، قول قۋسىرىپ قاراپ وتىر دەۋگە اۋىز بارمايدى.

قاراشا ايىنىڭ 16-سى كۇنى «كولوس» مادەني-ساۋىق ورتالىعىندا اكىمدىك قىزمەتكەرلەرى لەنين كوشەسىن «استانا» دەپ قايتا اتاۋ ماسەلەسى بويىنشا قوعامدىق تىڭداۋ ۇيىمداستىردى. جيىنعا قالا تۇرعىندارى مەن قالالىق ءماسليحاتتىڭ دەپۋتاتتارى قاتىستى.

ارينە، قاراما-قارسى پىكىرلەر ايتىلدى، سەزىم اۋانىنا بەرىلىپ سويلەۋشىلەر دە بوي كورسەتتى. ايتسە دە، استانا اتاۋىن قولداۋشىلاردىڭ قاراسى قالىڭ ءارى ايتقان ۋاجدەرى سالماقتى بولدى. وسى جايتتى ەسكەرگەن 8 دەپۋتاتتىڭ 7-ەۋى كوپشىلىك شەشىمىن ماقۇلداپ داۋىس بەردى. تەك دەپۋتات ۆ. دەيمۋند لەنين اتاۋىن وزگەرتۋگە قارسى ەكەنىن مالىمدەدى!

ۆيكتور دەيمۋند – «نۇر وتان» پارتياسىنىڭ مۇشەسى، وبلىستىق «چەرنوبىل وداعى» قب توراعاسى، «استانا»، «استاناعا – 10 جىل»، «قازاقستان رەسپۋبليكاسىنىڭ تاۋەلسىزدىگىنە 20 جىل»، ت.ب. قازاقستاندىق مەدالدارمەن ماراپاتتالعان. ايتپاقشى، «چەرنوبىل وداعى» قوعامدىق بىرلەستىگىنىڭ تاعى ءبىر مۇشەسى، زەينەتكەر نيكولاي كۋنوۆ تا لەنين اتاۋىن بارىنشا جاقتاعان توپتىڭ قاتارىنان كورىندى.

سونىمەن، دەپۋتات ۆيكتور دەيمۋند نەلىكتەن لەنين اتاۋىن «استانا» دەپ وزگەرتۋگە قارسى بولدى؟ مۇمكىن بۇل جەرلەسىمىز كسرو قۇرامىنان بولىنگەن وزگە رەسپۋبليكالاردى ايتپاعاندا، رەسەي فەدەراتسياسىنىڭ وزىندە لەنين ەسىمى مەن لەنينيزم ىلىمىنە قاتىستى «لەنينگراد»، «ۋليانوۆسك»، «وكتيابرسكايا» ، «سوۆەتسكايا»، «كوممۋنيستيچەسكايا» ءتارىزدى اتاۋلاردىڭ تۇگەلدەي وزگەرتىلگەنىن بىلمەيتىن شىعار؟ الدە ەگەمەندىك كەزەڭىندە لەنيننىڭ ءومىربايانى تۇگىل اتى-جونىنەن مۇلدە حابارى جوق تۇتاس ءبىر بۋىننىڭ ءوسىپ جەتىلگەنىن بايقاماعان بولار؟ بايقاسا دا، ەلباسىنىڭ «رۋحاني جاڭعىرۋ» باعدارلاماسى باسشىلىققا الىنعان قازاقستاندىق قوعامدا جاس ۇرپاق تاربيەسىنە لەنينيزم ءىلىمىن كىرىكتىرۋگە قاجەتتىلىك جوق ەكەنىن بايىپتاي المادى ما ەكەن؟ نەمەسە كەلەسى 2018 جىلى 20 جىلدىق مەرەيتويى اتالىپ وتىلەتىن استانا قالاسىنىڭ تاۋەلسىز قازاقستاننىڭ سيمۆولى ەكەنىن، كوممۋنيستىك قوعامنىڭ كەلمەسكە كەتكەنىنە شيرەك عاسىردان استام ۋاقىت وتكەنىن اڭعارمادى ما؟ كىم ءبىلسىن، ايتەۋىر، وسىنداي ءبىر گاپ بار سياقتى.

دەگەنمەن، ۆيكتور دەيمۋندتىڭ قالالىق ءماسليحاتتىڭ دەپۋتاتتىعىنا وتۋىنە قولداۋ كورسەتكەن سايلاۋشىلار اراسىنان وعان «لەنين» جانە «استانا» سوزدەرىنىڭ ءمان-ماعىناسىن ۇعىندىرىپ بەرە الاتىن ازاماتتار تابىلادى دەگەن ۇمىتتەمىن. ال جاڭا اتاۋدىڭ قالالىق ءماسليحاتتىڭ الداعى سەسسياسىندا بەكىتىلەتىنىنە سەنىمىم مول.

ارمان قاني، كەرەكۋ قالاسى

Abai.kz