يراننىڭ بارلىق ايماقتارىندا سوڭعى ەكى اپتادا ۇكىمەتكە قارسى ەرەۋىلدەرگە بايلانىستى مالىمدەمە جاساعان زاريف باسكوتەرۋلەردى شەتەل، سونىڭ ىشىندە اقش، يزرايل، ساۋد ارابياسىنىڭ بارلاۋ قىزمەتتەرى ۇيىمداستىردى دەدى. زاريف 8 قاڭتاردا تەگەرانداعى كونفەرەنتسيادا: "كورشىلەردە تۇراقسىزدىق ورناتۋ ارقىلى ەشقانداي ەل ءوزىن قاۋىپسىز سەزىنە المايدى", - دەدى.

IRNA رەسمي اقپارات اگەنتتىگى ءزاريفتىڭ "مۇنداي ارەكەتتەردىڭ سالدارى جامان بولادى" دەگەن سوزدەرىن كەلتىردى.

قۇراما شتاتتار يراننىڭ ەرەۋىلدەر ارتىندا ۆاشينگتون تۇر دەگەن سىنىن جوققا شىعاردى. ورتالىق بارلاۋ باسقارماسىنىڭ باسشىسى مايك پومپەو 7 قاڭتاردا ءوزى باسقاراتىن اگەنتتىكتىڭ باسكوتەرۋلەرگە ەشقانداي قاتىسى جوقتىعىن مالىمدەگەن. پرەزيدەنت دونالد ترامپ ەرەۋىلدەگىلەردى جاقتاپ، ۆاشينگتون ولاردى قولداۋعا ءازىر ەكەنىن ايتقان. يرانداعى ەرەۋىلدەر بارىسىندا 22 ادام قازا تاۋىپ، 1700-دەن استام ادام ۇستالدى.

7 قاڭتاردا گەرمانيانىڭ سىرتقى ىستەر ءمينيسترى زيگمار گابريەل ەۋروپالىق وداقتىڭ ءزاريفتى ەرەۋىلدەر تۋرالى كەلىسسوزدەرگە شاقىراتىنىن مالىمدەدى. گابريەل بەرليندە ZDF TV تەلەارناسىنا ەو سىرتقى ساياسات جەتەكشىسى فەدەريكو موگەرينيمەن بىرگە يراننىڭ سىرتقى ىستەر ءمينيسترىن، مۇمكىن بولسا كەلەسى اپتادا، كەلىسسوزدەرگە شاقىرعانىن ايتتى.

Abai.kz