دۇيسەنبى, 25 ماۋسىم 2018
بۇ نە مازاق؟ 1015 3 پىكىر 9 اقپان, 2018 ساعات 11:20

بايقوڭىردا قازاقستان ازاماتتارى رەسەي زاڭىمەن جازالانىپ كەلگەن

قازاقستاننىڭ كونستيتۋتسيالىق كەڭەسى "بايقوڭىر" عارىش ايلاعىن جالعا بەرۋ تۋرالى قۇجاتتاردىڭ اتا زاڭىمىزعا قايشى ەكەنىن جانە مەملەكەتتىك سۋۆەرەنيتەت جايلى نورمالاردى ورەسكەل بۇزاتىنىن ايتتى.  بۇل جايلى اقپار اۋەلى "حابار24" تەلەارناسىندا جاريا بولدى.

كونستيتۋتسيالىق كەڭەس مۇشەسى ۆيكتور مالينوۆسكيدىڭ ايتۋىنشا، وسى ۋاقىتقا دەيىن ءبىرسىپىرا زاڭدار، قازاقستاننىڭ سۋۆەرەنيتەتىنە قايشى كەلەتىن زاڭ نورمالارى مەن قازاقستان ازاماتتارىنىڭ بوستاندىعىن شەكتەيتىن نورمالار قايتا قاراۋدان وتكەن.

"بايقوڭىر" عارىش ايلاعىنىڭ اۋماعىندا قۇقىقتىق ءتارتىپ ورناتۋ جونىندەگى قۇقىققورعاۋ ورگاندارىنىڭ ەكىجاقتى كەلىسىمدەرىنە قاتىستى قىزىلوردا وبلىستىق سوتىنىڭ بىزگە جازعان شاعىمىنا سايكەس، كەلىسىمدەردى زاڭسىز دەپ تانيمىز.

سەبەبى بۇل كەلىسىمشارت بويىنشا قازاقستان ازاماتتارى ءتارتىپ بۇزعان جاعدايدا رەسەي فەدەراتسياسىنىڭ زاڭى بويىنشا جاۋاپقا تارتىلىپ كەلگەن.

ءبىز بۇنى قازاقستان رەسپۋبليكاسىنىڭ ەگەمەندىگىنە كۇمان، تۇتاستىعىنا نۇقسان كەلتىرۋ دەپ بىلەمىز", —  وكق بريفينگىندە ءسوز العان مالينكوۆسكي.

كەڭەس جۇمىس جاساپ كەلە جاتقان 95-جىلدان بەرى بارلىعى كونستيتۋتسيانىڭ ورەسكەل بۇزىلىپ، وزگە ەلدىڭ زاڭىنىڭ تاساسىندا قالىپ جاتقانىنا قاتىستى ۇزىن-ىرعاسى 190 شاعىم تۇسكەن ەكەن. ولاردىڭ دەنىن دەپۋتاتتار جولداپتى. ارينە، ءبىزدىڭ دەپۋتاتتار. 140 نورماتيۆتىك شەشىم شىعارىلعان.

قازاقستان رەسپۋبليكاسى مەن رەسەي فەدەراتسياسى اراسىندا جاسالعان كەلىسىمشارتقا سايكەس، "بايقوڭىر" عارىش ايلاعى 2050-جىلعا دەيىن رەسەيگە جالعا بەرىلگەن. جالعا بەرىلگەن تەرريتورياعا عارىش ايلاعى مەن قالا كىرگەن.

Abai.kz

3 پىكىر