دۇيسەنبى, 25 ماۋسىم 2018
575 2 پىكىر 12 اقپان, 2018 ساعات 08:49

تاشكەنتتەگى جاڭا مەشىتكە شەيح مۇحامماد سادىك مۇحامماد يۋسۋفتىڭ اتى بەرىلەدى

وزبەكستان پرەزيدەنتى شاۆكات ميرزياەۆتىڭ باستاماسىمەن تاشكەنتتەگى چيلانزار اۋدانىندا سالىنىپ جاتقان مەشىتكە شەيح مۇحامماد سادىك مۇحامماد يۋسۋفتىڭ اتى بەرىلەدى. وسىلاي دەپ وزبەكستان پرەزيدەنتىنىڭ ءباسپاسوز قىزمەتى حابارلادى.

شاۆكات ميرزياەۆ وتكەن جۇمادا مەشىت قۇرىلىس جۇمىستارىمەن تانىستى.

«شەيح مۇحامماد سادىك مۇحامماد يۋسۋف (1952−2015) تەك وزبەكستانعا عانا ەمەس، يسلام الەمىنە تانىلعان عالىم بولدى. ول ءومىرىن قاسيەتتى يسلام ءدىنىنىڭ نەگىزدەرىن يگەرىپ، ونى ناسيحاتتاۋعا ارنادى»، – دەدى پرەزيدەنت.

1989 جىلى شەيح مۇحامماد سادىك مۇحامماد يۋسۋف ورتا ازيا جانە قازاقستان مۇسىلماندارى ءدىني باسقارماسىنىڭ ءمۇفتيى بولىپ سايلانعان. وسى قىزمەتى ارقىلى ول كوپتەگەن يسلام ەلدەرىمەن مادەني-اعارتۋشىلىق قارىم-قاتىناس ورناتقان.

كەيىن شەيحتىڭ يسلام كاريموۆ ۇكىمەتىمەن قارىم-قاتىناسىنا سىزات تۇسكەننەن كەيىن، ول كوپ جىلدار بويى ليۆيادا تۇرۋعا ءماجبۇر بولعان.

1999 جىلى تاشكەنتتەگى جارىلىستان كەيىن، ەلدەگى جاعدايدى تىنىشتاندىرۋ ءۇشىن، سول كەزدەگى پرەزيدەنت يسلام كاريموۆ ءمۇفتيدىڭ بەدەلىن پايدالانىپ، ونى ەلگە شاقىرعان.

مۇحامماد سادىك مۇحامماد يۋسۋف 2015 جىلدىڭ 10 ناۋرىزىندا تاشكەنتتە جۇرەك تالماسىنان قازا تاپتى. ونى جەرلەۋ راسىمىنە 200 مىڭنان استام ادام قاتىسقان.

Abai.kz

2 پىكىر