رەسەيدەگى قازاقستان ەلشىلىگىنىڭ 13 اقپاندا حابارلاۋىنشا، 1994 جىلى تۋعان قازاقستان ازاماتى ۆيكتور فيلينكوۆ 25 قاڭتاردا ۇستالعان، قازىر پەتەربۋرگ اباقتىسىندا وتىر.

"باس كونسۋلدىق رەسەيدىڭ سىرتقى ىستەر مينيسترلىگىنىڭ سانكت-پەتەربۋرگتەگى وكىلدىگىنە جانە رەسەيدىڭ قۇزىرەتتى ورگاندارىنا جۇگىنىپ، قازاقستان كونسۋلىن قازاقستاندىق ازامات ۆيكتور فيلينكوۆپەن كەزدەستىرۋگە قولعابىس ەتۋىن، وعان كونسۋلدىق-قۇقىقتىق كومەك كورسەتۋگە رۇقسات بەرۋىن سۇراعان. قازىرگى ۋاقىتقا دەيىن رەسەي بيلىگىنەن جاۋاپ كەلگەن جوق. جۇمىس ءجۇرىپ جاتىر", — دەلىنگەن ءباسپاسوز قىزمەتىنىڭ حابارلاماسىندا.

اقپارات قۇرالدارىنىڭ فيلينكوۆتىڭ ايەلىنە سىلتەمە جاساپ حابارلاۋىنشا، ول 23 اقپاندا كەشكە "پۋلكوۆو" اۋەجايىنا بارا جاتقان جولدا جوعالعان. فيلينكوۆ كيەۆكە ۇشۋى كەرەك بولعان.

تۇرمەگە تەكسەرۋگە كەلگەن قوعامدىق باقىلاۋ كوميسسياسىنىڭ مۇشەلەرىنە فيلينكوۆ ءوزىن اۋەجايدا ۇستاعاننان كەيىن ازاپتاعانىن ايتقان. كوميسسيا قۇجاتتارىنا قاراعاندا، فيلينكوۆتىڭ دەنەسىندە ەلەكتروشوكەرمەن كۇيدىرگەن كوپتەگەن ىزدەر قالعان. كۇدىكتىنىڭ ايتۋىنشا، فەدەرالدىق قاۋىپسىزدىك قىزمەتىنىڭ ادامدارى مەن بەتىنە ماسكا كيگەندەر ونى ورمانعا الىپ بارعان. فيلينكوۆتىڭ ايتۋىنشا، ونى مويىنداۋ مالىمدەمەسىن الۋ ءۇشىن ازاپتاعان.

سانكت-پەتەربۋرگتەگى سوت 25 قاڭتاردا كۇدىكتى فيلينكوۆتى ەكى اي قاماۋدا ۇستاۋ شەشىمىن شىعاردى. تەرگەۋ نۇسقاسى بويىنشا، فيلينكوۆ پەن "بىلگىسىز بىرەۋلەر" "تەرروريستىك قىزمەت، ناسيحات، سونداي-اق تەرروريزمدى جاقتاۋ جانە وعان قولداۋ كورسەتۋ" ماقساتىندا توپ قۇرعان.

Abai.kz