قازىر شىعىس قازاقستاندا گولليۆۋدتىڭ قارتايعان جۇلدىزدارى قوناقتا ءجۇر. مارك داكاسكوس، باي لين، كەرري تاگاۆا، ەريك روبەرتس، مايكل مەدسون – وسى بەستىك. شاماسى، ەسكورت كومپانيالارعا بىرەۋىن شاقىرعاننان گورى، بەسەۋىن اكەلگەن ارزان-اۋ – «وپتوم دەشەۆلە». بىلاي نيەتتەرى جاقسى. وبلىس اكىمىمەن كەزدەستى. ەندى ءتورت كۇن بويى وبلىستىڭ ءتورت اۋدانىندا بولىپ، تاريحي جانە تابيعي تاماشا جەرلەرىن ارالاپ، 15 مينۋتتان 4 سەريالىق دەرەكتى فيلم تۇسىرمەك. ونى تاعى National Geographic جانە BBC-دا اينالدىرماق. بۇعان قازىر قايتا ورالامىن.

ماسەلە - دانيال احمەتوۆتىڭ وتىرىك ايتۋىندا. نەمەسە، وعان وتىرىكتى ايتقىزۋىندا. مىنە، سول كەزدەسۋدە ايتقان سوزىنەن ءۇزىندى: «ۆ ەپوحۋ تسيفروۆيزاتسي ينتەرەس ك كازاحستانۋ نۋجنو رازۆيۆات، پريگلاشايا تاكيح پوپۋليارنىح ليچنوستەي، ۋ كوتورىح ليۋبوي پوست ۆ سوتسيالنىح سەتياح نابيراەت بولەە 60 ملن لايكوۆ. پريمەر تومۋ دەمونستريرۋەت ناشا گوستيا اكتريسا باي لينگ». جاقسى، باي لين. ءبىز ونى كوبىنە «تاكسي 3» نە «»ادرەنالين 2» فيلمدەرىندەگى جاۋىز، اۋىش، سايكەسىنشە، گولليۆۋدتىق تيپولوگيا بويىنشا اقىماق پەرسوناجدارىمەن بىلەمىز. بىراق، ونىڭ اتىن شىعارعانى بۇل فيلمدەرى دە ەمەس، ءارتۇرلى كەش-بەشىرلەردەگى ءبىر لىپامەن شىعۋى، جالاڭاش پەرفومانستارى ەدى. ەگەر مەن بايزاقوۆانىڭ ورنىندا بولسام، «رۋحاني جاڭعىرۋعا» تۋرا سول امپلۋاداعى باي ءليندى شاقىرعانىنا تاس-تالقان بوپ، رەنجىر ەدىم)

وك، الەۋمەتتىك جەلىدەگى كەز-كەلگەن پوستى 60 ميلليون جينايدى دەدى عوي، الگىندە، دانيال... ينستاگرامىن قارايىق - https://www.instagram.com/iambailing/ - 33 مىڭعا دا جەتپەيدى. الماتىنىڭ ءبىر ساۋناسىندا قىزدىرىنىپ جاتقانى 2 200-اق كورىلىم جيعان، قازاقستانعا كەلدىم دەگەن پوستى 597 لايك قانا. لەنتاسىن قاراپ شىقتىم - ەڭ جالاڭاش دەگەن فوتوسىنىڭ 2 500 لايك جيناي الماعان. قايدا 60 ميلليون لايك؟ قايدا، ميلليوندار؟ قىپ-قىزىل وتىرىك. احمەتوۆكە وتىرىك ايتقىزدى، بىلمەدىم، ءباسپاسوز حاتشىسى ما، الدە پروديۋسەرلەر مە... بۇل ۇلكەن ماسەلە دەسەڭىز، قاتەلەستىڭىز.

ءبىز كەز-كەلگەن ءىستىڭ ورتاسىن ۇستاي الماي جاتامىز وسى. ءدىن ۇستانساق تا، نە راديكال، نە اتەيست. ساياساتتا جۇرسەك تە، نە وپپوزيتسيا، نە جاعىمپاز. «رۋحاني جاڭعىرۋ» دا سونداي بوپ كەتتى. ءبىر اكىمدەر بالا قوراز انشىلەردىڭ بايقاۋىن دا قىزىل-جاسىل بۇركىتتىڭ لوگوسىمەن باسىپ، ەسەبىن باستىرىپ جاتىر. ال شىعىس قازاقستان وبلىسى سەكىلدىلەر بۇعان الەمدىك ماسشتاب بەرگەنسىپ، ماقساتىن بۇرمالاپ كەتتى. ەلباسىنىڭ «رۋحاني جاڭعىرۋ» باعدارلاماسىن تۇسىنبەي، بۇرمالاپ، قيدالاپ كەتكەن اكىمدەردى سىناعانى كەشە عانا ەمەس؟ «رۋحاني جاڭعىرۋ» باعدارلاماسىن كىم اشىپ قارادى؟ ونداعى التى باسىمدىقتىڭ جەتەۋى دە تەك قازاقتاردىڭ قامىنا باعىشتالعان. قازاقتىڭ ساناسى اشىق بولسىن، ەۆوليۋتسيالىق جولمەن دامىسىن، باسەكە قابىلەتتى بولسىن، كانسە دە كانسوۆ، ىسىراپشىل بولماسىن، پراگماتيك بولسىن دەگەندى ايتادى.

ايتايىن دەگەنىم، التايدىڭ ادەمى تابيعاتى مەن سەمەيدە جارىلعان بومبانىڭ ورنىن ءتۇسىرىپ الىپ، مارك داكاسكوسقا ەكى اۋىز سويلەتىپ، ونى بيبيسيدەن كورسەتكەننەن، قازاق رۋحاني جاڭعىرا ما؟ جوق! سىرتقى ىستەر مينيسترلىگىنىڭ سىرتقى يميدج بويىنشا باعدارلاماسى بولسا، تۇسىنەر ەم. جۇزەگە اسپاي قالعان «ۇلتتىق برەند» باعدارلاماسى بولسا، تۇسىنەر ەم. بىراق، باتىستان بەس شال-كەمپىردى شاقىرىپ الىپ، ءبىر ساعاتتىق دەرەكتى ءفيلمدى تاعى دا باتىستا كورسەتۋ «رۋحاني جاڭعىرۋدىڭ» بابىنا ەش كەلمەيدى. كەشىرىڭىز.

وركەن كەنجەبەك

فەيسبۋكتەگى پاراقشاسىنان الىندى

Abai.kz