ەرتەدە پاراساتتى پاتشالاردىڭ ءبىرى حالقىن سىناماق بولىپ كۇرە جولدىڭ ۇستىنە ۇلكەن تاس قويىپ، بەكىتىپ تاستايدى. سوسىن ەلدىڭ نە ىستەپ، نە قويعانىن جەتكىزىپ تۇرۋ ءۇشىن جاسىرىن باقىلاۋشى تاعايىندايدى.

ەڭ العاشقى بولىپ ول جەردەن ەلگە بەلگىلى ساۋداگەر وتەدى. ول تۇرعان تاسقا كەكەسىنمەن زىلدەنە قاراپ: «مىنانى اكەلگەن ادامعا كورسەتەرمىن. تاۋىپ الىپ جازاسىن بەرەمىن ءالى!» - دەپ كىجىنە سويلەيدى دە، اتىن شىرەنە تەبىنىپ جونىنە كەتەدى.

ءبىرازدان سوڭ الگى جەردەن جاسى ەگدە تارتقان ەمشى وتەدى. ونىڭ دا قولىنان بار كەلگەنى تاسقا جيىركەنە قاراپ، كىنالىنى سوگۋ بولادى.

سالدەن سوڭ تاستىڭ قاسىنا ءۇش دوس كەلەدى. ولار دا وسى جايتتى اڭگىمە ەتىپ، سەبەپشىنى جاماندايدى. ەلدىڭ قازىرگى جاعدايىن مازاق ەتىپ، باسشىلاردى ايىپتايدى. سوسىن كەش باتا باسقا تۇك بىتىرمەستەن ۇيلەرىنە قايتادى.

ەكى كۇننەن سوڭ تاستىڭ قاسىنان كوپتى كورگەن ديحان وتەدى. ول تاستى كورە سالا ەكى بىلەگىن سىبانىپ، ونى يتەرىپ جولدان الىستاتۋعا تىرىسادى. جالعىز ءوزىنىڭ شاماسى جەتپەيتىنىن بىلگەن سوڭ ارى-بەرى وتكەن جۇرگىنشىلەردى كومەككە شاقىرادى دا، كوپشىلىكتى جۇمىلدىرىپ، تاستى ەداۋىر جەرگە دەيىن دوڭگەلەتىپ تاستايدى.

ديحانشى بىلاي شىعا الدىندا جاتقان قوبديشانى كورەدى. ءىشىن اشسا، تولعان التىن-كۇمىس! سونىمەن بىرگە بۇكتەلگەن قاعازدى كورەدى.

اشىپ وقىسا: «مىناۋ - سەنىڭ سىياقىڭ. سەبەبى، سەن قۇر شاعىمدانۋ مەن بوس ايقايعا بوي الدىرمايتىن، قيىندىقتىڭ شەشىمىن ەڭبەكپەن تابۋعا تىرىساتىن ابزال جان ەكەنسىڭ. سەن سياقتىلار ءاردايىم ەلگە پايدالى، قوعامعا قايىرلى بولماق»، - دەپ جازىلعان ەكەن...

زامانداس! ال سەن قاي توپتانسىڭ؟!

جانات باقىت

Facebook-تەگى پاراقشاسىنان