جەكسەنبى, 29 ناۋرىز 2020
ويدان-قىردان 5293 35 پىكىر 5 ناۋرىز, 2018 ساعات 10:42

گورباچەۆ: "پۋتين القاش، جۇرگەن ءبىر اۋمەسەر"...

سابەتتىڭ سوڭعى «كوسەمى» ميحايل شال گورباچەۆ سۇحبات بەرىپتى دەپ بۇكىل ورىس ءباسپاسوزى بۇلقان-تالقان بولىپ جاتىر. سەكسەننىڭ جەتەۋىنە كەلگەن، تاز باسىنا تاڭبا بىتكەن گورباچەۆ ءسوز اراسىندا سايلاۋعا ءتۇسىپ جاتقان قازىرگى پرەزيدەنت ۆلاديمير پۋتين جايلى كوپ جۇرت ايتا بەرمەيتىن اقپاردى جايىپ سالىپتى. سودان بولار، كرەملدىڭ ايتاقتاعى كۇشىكتەرى گورباچەۆ شالدىڭ سۇحباتىن جاريالاپ جاتقان ءاربىر سايتتى بۇعاتتاپ الەك بولىپ جاتىر.

دەسە دە ءبىز بۇل سۇحباتتىڭ بۇعاتتالماعان ءبىر نۇسقاسىن تاپتىق. شولىپ شىقتىق.  سويتسەك، ميحايل گورباچەۆ ۆلاديمير پۋتينمەن بولعان سوڭعى كەزدەسۋى جايلى ايتىپ، ونىڭ جۇرگىزىپ وتىرعان ساياساتىنا ءوز پىكىرىن بىلدىرگەن ەكەن.

ونىڭ ايتۋىنشا، سوڭعى جىلدارى پۋتينمەن بىرنەشە رەت كەزدەسىپتى. بىراق، بۇل كەزدەسۋلەر تەك كرەملدىڭ كەڭ دالىزىندە جول جونەكەي قول قىسۋمەن شەكتەلگەن كورىنەدى. وعان قوسا، ۆلاديمير پۋتين كارى سۇيەك، قۋباس گەنسەكتىڭ ساياسي كەڭەستەرىن كەرەك قىلماعان ەكەن. ءتىپتى، ورىستىڭ ەكى بيلەۋشىسىنىڭ سوڭعى كەزدەسۋى 2017 جىلى «رەسەي كۇنى» دەيتىن مەرەكەنىڭ قارساڭىندا بولعان. بۇنى دا ميحايل گورباچەۆتىڭ ءوزى ايتىپ وتىر.

«امانداستىق. مەن وعان: "كوپ بولدى كەزدەسپەدىك" دەدىم. ول: جۋ-جۋ-جۋ; ول قازىر كوپ مىڭگىرلەيدى. ونىسى جۇرتقا نە ايتقانى تۇسىنىكسىز بولۋى ءۇشىن»،- دەپتى ءسوز اراسىندا.

ەڭ سوڭعى گەنسەكتىڭ پۋتينگە وكپەسى قارا قازانداي ەكەن. وعان سەبەپ – ءپۋتيننىڭ قابىلداۋىنا ءۇش رەت جازىلعان. ءۇش كەزدەسۋدى دە پۋتين بە، الدە ونىڭ كومەكشىلەرى مە، ايتەۋىر كەيىنگە شەگەرگەن. ءسويتىپ، وكپەلەگەن گورباچەۆ شال ەندى بۇنىڭ قابىلداۋىنا ءولىپ كەتسەم كەلمەيمىن دەپ شەشكەن.

تىم قۇرىعىنادا كەڭەسشىلىككە جاراماعان ساياسي ولىك – ميحايل گورباچەۆ ءپۋتيننىڭ جۇمىستان بوس ۋاقىتتا نەمەن اينالىساتىنىن دا ايتىپ بەرگەن. سويتسەك، پۋتين بارىپ تۇرعان القاش، اۋمەسەر بىرەۋ ەكەن. بۇل گورباچەۆتىڭ ءسوزى.

«سوڭعى كەزدە كوپ ءىشىپ ءجۇر. كەيدە بيلەيدى، كەيدە ۇشادى، كەيدە جۇزەدى، سايتان العىر، ەرىككەن ادام نە ىستەمەيدى... اتتەگەن-ايى، عارىشقا ۇشا المايدى. قورقادى. ەگەر ول عارىشقا ۇشىپ كەتسە، جۇرتتىڭ بارلىعى وعان: «ۆلاديمير ۆلاديميروۆيچ، قايتىپ كەلمەڭىز!» دەيتىن ەدى عوي»، - دەپتى.

ميحايل گورباچەۆ قازىر 87 جاستا. كەڭەس وداعىنىڭ سوڭعى بيلەۋشىسى. نوبەل سىيلىعىنىڭ يەگەرى.

نۇرزات توعجان

Abai.kz

35 پىكىر