جاقسى بولدى. باسقا باسقا، قاراپايىم حالىققا كوپ ءتيىمدى باستاما بولدى بۇل. ەلباسىنىڭ پارلامەنت پالاتالارىنىڭ بىرىككەن وتىرىسىندا ايتقان حالىقتىڭ ءال-اۋقاتىن كوتەرۋگە ارنالعان بەس الەۋمەتتىك باستاماسىن ايتام.

ءبىرىنشى باستاما – ءار وتباسىنىڭ باسپاناعا قولجەتىمدىلىگىن قامتاماسىز ەتۋ.

الدىڭىزدا 7-20-25 دەپ تۇرسا، بىرەۋدىڭ تەلەفون ءنومىرى ەكەن دەپ قالماڭىز. بۇل ءسىزدىڭ ءومىرىڭىزدى جەڭىلدەتەتىن سيقىرلى ساندار. ناقتىراق ايتساق، وسى ۋاقىتقا دەيىن بانكتەر ءۇي الۋعا نەسيەنى 18-30 پايىزبەن، الدىن-الا 50 پايىزىن تولەتىپ، 20 جىلعا دەيىن-اق الا بەرەتىن بولسا، ەندى ەلباسى نەسيە پايىزىن 7 پايىزعا دەيىن، الدىن الا تولەمدى 20 پايىزعا دەيىن ازايتىپ، ال نەسيەنى وتەۋ مەرزىمىن 25 جىلعا دەيىن ۇزارتاتىنىن ايتتى.

ءبىراز ادام ءۇيلى بولاتىن بولدى.

ەكىنشى باستاما – تومەن جالاقى الاتىن جۇمىسشىلاردىڭ سالىق جۇكتەمەسىن ون ەسەگە ازايتىپ، 1 پايىزعا ءتۇسىرۋ.

بۇل باستاما 2019 جىلدىڭ 1 قاڭتارىنان باستاپ ىسكە اسادى.

«ءوزى ازعانتاي اقشادان تاعى دا سالىق ۇستايدى» دەپ رەنجىمەيتىن بولدىق.

ءۇشىنشى باستاما – جوعارى بىلىمگە قولجەتىمدىلىكتى ارتتىرۋ جانە ونىڭ ساپاسىن كوتەرۋ.

ەلباسى 2018-2019 جىلدارى ءار جىلعا قوسىمشا 20 مىڭ گرانت ءبولۋدى ۇسىندى. جىلدا جازدا باستالاتىن «گرانتتىڭ جىرى» ءسال باسەڭسيتىن شىعار.

كوللەدجدەر مەن ۋنيۆەرسيتەتتەر 2022 جىلعا دەيىن جەكەمەنشىك-مەملەكەتتىك سەرىكتەستىك كومەگىمەن كەمىندە 25 مىڭ ورىندىق جاتاقحانا سالۋى كەرەك.

پاتەر جالداپ جۇرگەن اۋىلدىڭ بالالارىنا جاقسى بولدى.

ءتورتىنشى باستاما –  شاعىن جانە ورتا بيزنەسكە دەم بەرىپ، جاڭادان بيزنەس باستاعاندارعا قولداۋ كورسەتۋ ءۇشىن جەڭىلدەتىلگەن شاعىن نەسيە كولەمىن ارتتىرۋ.

ال، ەندى كوپتەن بەرى الاقانىن ىسقىلاپ «ءوز ءىسىمدى باستاۋىم كەرەك ەدى»،- دەپ جۇرگەن مىرزالار مەن حانىمدار، سەندەردىڭ كۇندەرىڭ تۋدى!

2018 جىلى جەڭىلدەتىلگەن شاعىن نەسيە كولەمىن ارتتىرۋ ءۇشىن قوسىمشا 20 ميلليارد تەڭگە بولىنەدى.

بەسىنشى باستاما –  قازاقستاننىڭ ورتالىق جانە سولتۇستىك ايماقتارىنا گاز تارتۋ.

ءبىر جارىم جىل كولەمىندە گاز تارتىلسا، جەڭگەلەرىمىز بەن كەلىندەر وت جاعىپ، كۇل شىعارۋدان قۇتىلاتىن بولادى. ونىڭ ۇستىنە استانانىڭ اسپانى ۇنەمى شايداي اشىق بولعالى تۇر.

ادىلبەك قابا

Abai.kz