دۇيسەنبى, 25 ماۋسىم 2018
قاۋىپ ەتكەننەن ايتامىن 3203 31 پىكىر 7 ناۋرىز, 2018 ساعات 10:46

ول ءۇشىن كرەمل - "قاعبا", پۋتين - "پايعامبار"

بۇگىن اكەسى نەمىس، شەشەسى ورىس، ءوزى رەسەيدە تۋعان ولەگ دەگەن كورشىممەن اۋلادا سويلەسىپ تۇرىپ قالدىم. شامامەن ون-ون بەس مينۋتتاي-اۋ. ولەگ - ورىس ءتىلدى.

"ورىس ءتىلدى" دەگەننەن شىعادى. تاياۋدا مەملەكەت باسشىسى ۇكىمەت پەن پارلامەنت مۇشەلەرىنە مەملەكەتتىك تىلدە سويلەپ، ءىس جۇرگىزۋدى تاپسىردى. تاپسىرىپ قانا قويعان جوق، تالاپ ەتتى. ەلباسىنىڭ بۇنداي تالابى قوعام تاراپىنان دا قولداۋ تاۋىپ، يىگىلىكتى باستاماعا اينالىپ كەتسە، "بارەكەلدە!" دەيمىز عوي. سوندىقتان ەندى ءبىز، مەملەكەتتى قۇراۋشى، ەل مەن جەردىڭ يەسى - قازاق ۇلتى، اينالامىزدا ۇيىسقان قاۋىممەن قازاق تىلىندە تىلدەسىپ، ءجون كورسەتۋىمىز كەرەك. وسىنى ويعا الىپ، وزىمشە ولەگ كورشىمە انا تىلىمدە ءتىل قاتتىم. ول يىعىن قيقاڭ ەتكىزدى. دەمەك، "مەنىكى سەنىكىن نە پونيمايەت". ارادا شيرەك عاسىردان استام ۋاقىت ءوتتى، بۇل اعايىندىكى سول باياعى قارەكەت، سول باياعى سارىن. تۇسىنبەيدى، تۇسىنىسكىسى كەلمەيدى. سوسىن مەن وعان بىلگەنىمىشە، ۋكراين تىلىندە سويلەدىم. تەك قازاقشا-ۋكراينشە. سودان الگى كورشىم: "تى چە، نا حوحلياتسكوم يازىكە رازگوۆاريۆاەش" دەپ، رەنجىگەن كەيىپ تانىتتى. مەن دە وعان قاراپ: "ۋكراينسكا موۆا ناباگاتو كراسيۆشە ءنىج روسىيسكي. ا چومۋ يا ءتوبى پوۆينەن زۆەرتاتيسيا روسىيسكويۋ؟ تي ج ادجە نىمەتس. يا نىمەتسكۋ موۆۋ نە زنايۋ. ا تي كازاحسكي نە زناєش" دەدىم. "ۋكراينتسى جە، وني فاشيستى. نۋ تە كوتورىە جيۆۋت ۆ ۋكراينە" دەدى ول كىجىنىپ. ودان مەن دە ءبىراز ءسوز جارىستىرىپ، اقىرىندا ءبىر تۇيىنگە كەلدىم. 

ولەگ 10 جىلدان بەرى قازاقستاندا تۇرادى. قر ازاماتى. پاسپورتى كوك. قاتىنى - قازاق. ءۇيى قازاقستاندا، جۇمىسى قازاقستاندا. بالالارى قازاقستاندا وقيدى.

ەندى نەگىزگى ماسەلەگە اۋىسايىن. ولەگتەردىڭ بولاشاعىنا قيانات جاساپ، جولىن بايلاعانشا قازاقستاننىڭ اۋقىمىندا بارىنشا كەڭ تارايتىن ورىس تەلەقوقىس كانالدارىن دەرەۋ جابۋ كەرەك! كرەملدىڭ پروپاگانداسى - ءوز حالقىن ەسالاڭ قىلعانىمەن قويماي، ءبىزدىڭ ەلدەگى ورىس ءتىلدى اۋديتوريانىڭ كەي بولىگىن دەزينفورماتسيالاپ، ميلارىن ۋلاپ، وقشاۋ تاربيەلەپ وتىر. ودان دا قاۋىپتىسى - رەسەي(تۆ)مەن ۋلانعاندار - قازاقتىڭ ۇلتتىق قۇندىلىقتارىنا تۇكىرگەنى بار.
رەسەي تەلەەفيرىنەن ءوز تۇكىرىگىنە وزدەرى شاشالىپ، اۋزىنا كەلگەندى قۇسىپ جاتقان سارجاعال ساياساتكەرسىماقتاردىڭ پسەۆدوپاتريوتتىق اگيتاتسياسى ورىس ءتىلدى اۋديتوريانىڭ ساناسىن ۋلاپ تاستاعان. جيرينوۆسكي، بوگداساروۆ، سولوۆەۆ، ساتانوۆسكي، بابۋرين، ناۆالنىي سەكىلدى كىلەڭ توسەكتەگى تەورەتيكتەر مەن ديۆانداعى دەباتەرلەردەن كەلەتىن كەساپات - اۋعانداعى، سۇرياداعى جيھادشىلاردان مىڭ ەسە قاۋىپتى. 

رەسەيلىك پروپوگاندانىڭ قۇلدارى ءۇشىن قازاقستان تاۋەلسىزدىگىنىڭ قۇنى كوك تيىن. ولار سابەتتىڭ ساسىق شينەلىن قايتا كيگىسى كەلەدى. 

27 جىل تاۋەلسىزدىكتىڭ شەگىندە قازاقستان مەن قازاقتىڭ ۇلتتىق، مەملەكەتتىك قۇندىلىقتارىن مويىندامايتىن، كرەملدىڭ قاقپاسىنا مويىن سوزىپ وتىرعان وپاسىزدار وتريادى بار. ولار - ەۋرازيا-1, روسسيا-1, روسسيا-24, نتۆ، رەن تۆ، تنت ت.ب. سەكىلدى كرەملدىك ديكتوۆكانىڭ تاربيەلەگەن توبىرى. 

مەن، ارينە، ولەگتى ءسوز جارىستا جەڭدىم. بىراق، ونىڭ ۋلانعان ساناسى مەنىڭ ايتقان فاكتىلەرىمنىڭ بىرەۋىن دە قابىلدامايتىنىنا كوزىم جەتتى.
ولەگ ءۇشىن كرەمل - "قاعبا", پۋتين - "پايعامبار".

كۇنى كەشە عانا 1-ناۋرىز دياسپورالاردىڭ اقجارما العىس جاۋدىراتىن كۇنىن اتاپ وتتىك. سول كۇنى  قانى نەمىس ولەگ ماعان ەمەس، وسى توپىراققا، قازاق توپىراعىنا العىس ايتپاق تۇگىلى، ونى مويىندامايتىنىن ءبىلدىردى. مەن ونى ەرتەڭ دە كورەم. ول ماعان كەلىپ امانداسادى. مەن ونىڭ سالەمىن قابىل الىپ، سالەم بەرەمىن. وكىنىشتىسى، ول ءالى "سالەم!" دەگەن ءسوزدى ۇعا الماي كەلەدى.

ءتۇيىن: پروكرەملدىك پروپوگاندامەن ساناسى ۋلانعان پۋتينقۇلدار - قارۋلى تەرروريستەن مىڭ ەسە قاۋىپتى. ەكراندى الدىمەن وسىلاردان تازالاۋ كەرەك.

نۇرگەلدى ابدىعانيۇلى

Abai.kz

31 پىكىر