پرەزيدەنت نازارباەۆ رەسەيلىك تەلەارنا تىلشىسىمەن اڭگىمەلەسۋ كەزىندە ەۋرازيالىق ەكونوميكالىق وداق اياسىندا قازاقستان مەن رەسەي اراسىنداعى ىنتىماقتاستىقتى دامىتۋدىڭ نەگىزگى اسپەكتىلەرى جونىندە ايتتى.

سونىمەن قاتار، نۇرسۇلتان نازارباەۆ «ءبىر بەلدەۋ، ءبىر جول» باعدارلاماسىنىڭ ىسكە اسىرىلۋ ناتيجەلەرىنە جانە پەرسپەكتيۆالارىنا توقتالىپ، قازاقستاننىڭ سىرتقى ساياسي قىزمەتىنىڭ نەگىزگى ماسەلەلەرىنە قاتىستى ساۋالدارعا جاۋاپ بەردى.

«بەس الەۋمەتتىك باستامانى ىسكە اسىرۋ بارىسىندا مۇعالىمدەردىڭ جالاقىلارى دا وسەتىن بولادى. قازىر ءبىز مەكتەپتەردە ءبىلىم بەرۋدىڭ جاڭا مازمۇنىنا كوشتىك، بۇل مۇعالىمدەردىڭ جالاقىسىن 30 پايىزعا ارتتىرۋعا مۇمكىندىك بەرەدى. سونداي-اق، ورتا ءبىلىم بەرۋ جۇيەسىندە بىلىكتىلىك ساناتتارى كوزدەلگەن. ساناتى كوتەرىلگەن مۇعالىمدەردىڭ جالاقىسى قوسىمشا 50 پايىزعا كوبەيەتىن بولادى»، – دەدى قازاقستان پرەزيدەنتى.

ايتپاقشى، پرەزيدەنت نازارباەۆ الگى جەردە رەسەي پرەزيدەنتى ۆلاديمير پۋتين جايلى پىكىرىن ايتىپ، ونى «ءسوزدىڭ ادامى» دەپ باعالاپتى.

«پرەزيدەنتتەر اراسىنداعى قارىم-قاتىناس وتە ماڭىزدى. ليدەرلەردىڭ اراسىنداعى بايلانىس مەملەكەتتەر اراسىنداعى سەنىمدى تۋدىرادى. ۆلاديمير پۋتين 2000-جىلى پرەزيدەنت بولىپ سايلاندى. ءبىز ءبىرىنشى كۇننەن باستاپ-اق، جاقىن ارالاسا باستادىق. جاسىراتىنى جوق، سول بايلانىسىمىز ناعىز دوستىققا ۇلاستى. مەن ونىڭ ادامگەرشىلىك قاسيەتتەرى جايلى ايتايىن. ونى باسقالاردان گورى جاقسىراق تانيتىنىم راس. ول – ءسوزدىڭ ادامى»، - دەپتى پرەزيدەنت نازارباەۆ.

سونداي-اق، بيىل قايتا سايلاۋعا تۇسكەلى جاتقان رەسەي پرەزيدەنتى ۆلاديمير ءپۋتيننىڭ قيىن كەزەڭدە رەسەي تىزگىنىن ۇستاعانىن ايتىپتى.

«ءبىز رەسەيمەن كورشىلەس ورنالاسقان ەلمىز. ونىڭ ىشكى جاعدايلارىن بايقاپ وتىرامىز. ايماقتار ءوز بيلىگى وزىندە، ورتالىققا سالىق تولەۋدى قويىپ، باس-باسىنا بيلىك جۇرگىزىپ جاتتى. ءبىر جاعىنان قاپقازدا سوعىس ءجۇرىپ جاتتى. حالىقارالىق احۋال مەن ىشكى ەكونوميكا استاڭ-كەستەڭ بولىپ جاتتى. سول تۇستا پۋتين تىزگىندى ۇستاپ، ەلدى قالىپتى جاعدايعا كەلتىردى»، - دەيدى قازاقستان پرەزيدەنتى.

پرەزيدەنت نازارباەۆ جاھاندىق ساياساتتاعى رەسەيدىڭ شەتتەتۋ كورىپ، سىيى كەتكەنى جايلى دا ءسوز ەتىپتى.

«رەسەيدى شەتتەتىپ، الەمدىك ماڭىزدى ماسەلەلەردى شەشۋ پروتسەسسىنە جاقىنداتپادى. رەسەيدى جايدان-جاي ىعىستىرىپ جىبەرۋ مۇمكىن ەمەس. ول ءىرى يادرولىق قارۋى بار مەملەكەت. ول دا الەمدىك ساياساتتاعى باستى فاكتورلاردىڭ ءبىرى. سوندىقتان رەسەيدى ىعىستىرىپ جىبەرۋ اقىلدى شەشىم ەمەس. پۋتين قازىر رەسەيدى ءوز ورنىنا قويدى. ول سيريا بيلىگىنىڭ سۇراۋى بويىنشا كيكىلجىڭگە ارالاستى. بىلاي قاراساڭىز، رەسەي الەمدىك دەڭگەيدەگى ەكسترەميزم، تەررورزيم دەگەن پالەكەتتىڭ بەتىن قايتاردى»، - دەپتى سۇحباتتا.

پرەزيدەنت نازارباەۆتىڭ رەسەيلىك ارناعا بەرگەن سۇحباتىن ورىس باسىلىمدارى جارىسا جازىپ جاتىر. «جاڭا دوسىمنان ەسكى دوسىم ارتىق». بۇل رەسەي قپاراتىنىڭ اۋزىنداعى ءسوز.

ال ءبىز ەندى التى كۇننەن كەيىن رەسەيدە كەزەكتى پرەزيدەنت سايلاۋى وتەتىنىن ەستەرىڭىزگە سالا كەتكەندى ءجون كوردىك. ءيا، رەسەيدەگى سايلاۋدا سونداي ءبىر ينتريگا جوق. ءپۋتيننىڭ بۇل جولعى سايلاۋدا جەڭىپ شىعاتىنى ەكىبستان بەلگىلى. ول جاڭالىق ەمەس. پوست-كەڭەستىك ەلدەردىڭ بارلىعىندا دەمەسەك تە، باسىم كوپشىلىگىندە سايلاۋ ساياسي قويىلىم عانا. رەسمي اقپاراتقا قاراساق، ءپۋتيننىڭ بۇل جولعى ستاتيستەرى – ۆلاديمير جيرينوۆسكي مەن پاۆەل گرۋدينين ەكەن.

نۇرزات توعجان

Abai.kz