"قازاق ادەبيەتى" گازەتىنىڭ باس رەداكتورى، بەلگىلى اقىن جاناربەك ءاشىمجان "كەزەك مۇقاعاليعا كەلدى مە؟" دەگەن شاعىن عانا پوست جاريالاپ، اقيىق اقىنىمىز مۇقاعاليعا ارنالعان "مۇقاعالي ماقاتاەۆ پەن "جۇقاعالي بۇقاتاەۆ" تۋرالى وي تولعاۋ" دەگەن بەلگىسىز اۆتوردىڭ ولەڭىنىڭ كوشىرمەسىن جاريالادى، - دەپ حابارلايدى اباي-اقپارات.

"ەندى قازاق پوەزياسىنىڭ داڭقتى تۇلعاسى مۇقاعاليدىڭ ارۋاعىنا تاس اتۋ باستالدى ما؟ ءاي، سورى قايناعان... بىتكەن ەكەنبىز عوي...

ناداندىق پەن پاسىقتىقتا، جارىمەستىكتە شەك بولسا شە؟ مىنا شاتپاقتى تاقپاق ەتكەن قوس اياقتى كىم بولسا دا ەسىنەن اۋىسقان شىعار، ءسىرا... ماسقارا... اباي... جامبىل... ساكەن... ەندىگى كەزەك كۇللى قازاق جاتا جاستانا وقيتىن مۇقاعاليعا كەلىپتى... بۇل كىمنىڭ شاتپاعى؟ ۇلىلارىمىزعا تاس اتۋ قاشان تيىلادى؟" دەيدى جاناربەك ءاشىمجان.

رەداكتسيادان. سوڭعى كەزدەرى اباي، جامبىل، ساكەن سىندى قازاقتىڭ ءبىرتۋار ۇلدارىن قارالايتىن ءتۇرلى ماتەريالدار جارىق كورە باستادى. مۇنىڭ استارىندا نە جاتىر؟ ەلدىڭ، ۇلتتىڭ ماقتانىشى بولارلىق تۇلعا قالدىرماۋ ساياساتى ما؟ التاي مەن اتىراۋدىڭ اراسى مۇقاعالي جىرىمەن تەربەلىپ تۇرعان كەزدە اقىن ارۋاعىنا شەك كەلتىرۋ ارقىلى بۇ اقىن نەنى دالەلدەمەك؟ قىزعانىش پا؟ جوق، الدە ءبارى ادەيى، قاساقانا ۇيىمداستىرىلا ما؟ بىرەۋ شاتپاقتاپ جىر جازدى ەكەن دەپ، مۇقاعاليدىڭ ابىرويى كەمىپ قالمايتىنى انىق. بىراق، وسىنداي ءۇردىستىڭ كوبەيۋىنەن ساقتاناتىن كەز كەلگەن سياقتى. 

ءشارىپحان قايسار

Abai.kz