36 جاستاعى سەردار دەپۋتات ءارى پارلامەنتتەگى زاڭ شىعارۋ ءىسى جونىندەگى كوميتەتتىڭ توراعاسى (ول دەپۋتات بولعاننان كەيىن ءۇش ايدان سوڭ كوميتەتتى باسقاردى). وسىعان دەيىن 2015 جىلدىڭ شىلدە ايىندا تۇركىمەن پرەزيدەنتىنىڭ ارنايى قاۋلىسىمەن ءسىم قۇرىلىمىندا جوعارى لاۋازىمدى قىزمەتكە يە بولىپ، دوكتورلىق ديسسەرتاتسياسىن قورعاعان.

2017 جىلدىڭ كوكتەمىندە جانە جازىندا ول بىرنەشە رەت رەسمي تۇردە شەتەلگە ساپارعا شىعىپ، رەسەي جانە قازاقستان پرەزيدەنتتەرىمەن كەزدەستى. ساراپشىلار سەرداردى سوڭعى كەزدە اكەسىمەن بىرگە ءجيى حالىق الدىنا شىعىپ جۇرگەنىن ايتادى. ال رەسمي سايتتار ونى سپورت سالاسىنا قوسقان ەڭبەگى ءۇشىن "حالىقتىڭ ۇلى" دەپ اتايدى. قازىردىڭ وزىندە كوپتەگەن ەكسپەرتتەر سەرداردى تۇركىمەنستان پرەزيدەنتىنىڭ تاق مۇراگەرى رەتىندە كورەدى.

بىراق گۋربانگۋلى بەردىمۇحامەدوۆ جاقىن ۋاقىتتا قىزمەتىنەن كەتە قويمايدى. 2016 جىلدىڭ قىركۇيەك ايىندا ەل كونستيتۋتسياسىنا وزگەرىستەر ەنگىزىلىپ، بەردىمۇحامەدوۆ ءومىر بويى مەملەكەت باسشىسى بولۋعا مۇمكىندىك الدى.

تۇركىمەنستان پرەزيدەنتىنىڭ ۇلىنان بولەك ءۇش قىزى بار.

Abai.kz