بەيسەنبى, 28 قاڭتار 2021
ويدان-قىردان 4092 26 پىكىر 6 ءساۋىر, 2018 ساعات 10:22

شەتەلدە قازاقستاننىڭ جاڭا وپپوزيتسياسى قۇرىلا ما؟

الەۋمەتتىك جەلىلەردە «وسى جەكسەنبىدە بريۋسسەلدە قازاقستاننىڭ جاڭا وپپوزيتسيالىق پارتياسى قۇرىلادى ەكەن» دەگەن ابىڭ-كۇبىڭ اڭگىمە جەلدەي ەسىپ تۇر. بۇل تۋرالى  اقپاراتتى العاشقى بولىپ «رەسپۋبليكا» مەديا-توبىنىڭ بۇرىنعى شەف-رەداكتورى جانە قۇرىلتايشىسى يرينا پەترۋشوۆا Facebook پاراقشاسىندا حابارلاعان.پەترۋشوۆانىڭ جازۋىنشا، جاقىن كۇندەرى ەلگە بەلگىلى بىرقاتار تانىمال ساياساتكەرلەر، قوعام قايراتكەرلەرى مەن جۋرناليستەر بريۋسسەلگە بارىپ، اكەجان قاجىگەلدين جانە بەرگەي رىسقاليەۆپەن كەزدەسىپ، ۇلكەن جيىن وتكىزەتىن كورىنەدى. وسى باسقوسۋدا «جاڭا قازاقستان» اتتى وپپوزيتسيالىق پارتيا قۇرىلۋى ىقتيمال.

ي.پەترۋشوۆانىڭ بۇل اقپاراتىن راستاپ جاتقاندار بار. ماسەلەن، تانىمال بلوگەر جاننا بوتا بريۋسسەلگە بارادى-اۋ دەيتىندەردىڭ اتىن اتاپ، ءتۇسىن تۇستەپ شىققان. ونىڭ ايتۋىنشا، بەلگياعا ساياساتكەر ءامىرجان قوسانوۆ، ۇلت پاتريوتتارى – ايدوس سارىم مەن راسۋل جۇمالى، جۋرناليستەر – گۇلجان ەرعاليەۆا، ەرمۇرات باپي، ميراس نۇرمۇحامەتوۆ پەن نازيرا دارىمبەت، اقش-قا اۋعان سۋرەتشى قانات يبراگيموۆ، قۇقىق قورعاۋشى عالىم اعەلەۋوۆ جانە پولشاداعى وپپوزيتسيونەر بالي ماجەتس بارماق. بۇلاردىڭ ساپارىن جاقىندا ۇلىبريتانيا ازاماتتىعىن العان سەرىكجان مامبەتالين ۇيىمداستىرسا، جول شىعىنىن اتىراۋدىڭ بۇرىنعى اكىمى، ۇلىبريتانيادان ساياسي باسپانا العان، قازاقستاندا بىرقاتار قىلمىس جاساپ، قارجى قىمقىردى دەگەن ايىپقا ىلىنگەن بەرگەي رىسقاليەۆ كوتەرىپ العان-مىس. ونى بىلاي قويعاندا، «جاڭا قازاقستان» وپپوزيتسيالىق پارتياسىن ءا.قوسانوۆ باسقارادى دەگەن اقپاراتتىڭ شەتى شىقتى.

جيىنعا قاتىسادى دەۋشىلەردىڭ ءبىرى، پولشاداعى وپپوزيتسيونەر بالي ماجەتس قازاقستاندىق ءبىر توپ وپپوزيتسيونەردىڭ بريۋسەلدە باس قوسىپ، ەۋروپارلامەنت دەپۋتاتتارىمەن كەزدەسپەك ەكەنىن سول  باياعى Facebook-تە راستاعان. ءتىپتى ب.ماجەتس بۇل جيىندا نەندەي ماسەلەلەردىڭ كوتەرىلەتىنىن ەگجەي-تەگجەيلى جىلىكتەپ، جازبا جاريالاعان. الايدا كوپ ۇزاماي، ول جازبانى جويىپ، ورنىنا «بريۋسەلدەگى كونفەرەنتسياعا بارمايتىن بولدىم» دەپ جازىپتى.

بۇل ازداي، وسىنىڭ اراسىنشا جاڭادان قۇرىلۋى مۇمكىن وپپوزيتسيالىق پارتياعا قاتىستى پىكىرىن بىلدىرگەن بەلگىلى پۋبليتسيست سەرگەي دۋۆانوۆ ءسوز اراسىندا «مەنى دە وسى جيىنعا شاقىرعان ەدى، بىراق دەر كەزىندە باس تارتتىم» دەپ قالدى.

ي.پەترۋشوۆا باستاعان ءابليازوۆتىڭ جاقتاستارى ەگەر الدا-جالدا جاڭا وپپوزيتسيالىق پارتيا قۇرىلىپ جاتسا، ول بيلىك ەكسترەميستىك دەپ تانىعان م.ءابليازوۆتىڭ «قازاقستاننىڭ دەموكراتيالىق تاڭداۋى» پارتياسىن السىرەتۋ ءۇشىن اقوردانىڭ ويلاپ تاپقان جوباسى بولۋى بەك مۇمكىن دەپ توپشىلايدى. وسىدان ءدال جارتى جىل بۇرىن م.ءابليازوۆ قازاقستاندا بيلىكتىڭ كەلىسىمىمەن جاڭا وپپوزيتسيالىق پارتيا قۇرىلاتىنىن مالىمدەگەن ەدى.

الەۋمەتتىك جەلىدە ەسىمدەرى اتالعان ادامدار راسىمەن بريۋسسەلگە بارىپ، وندا وپپوزيتسيالىق پارتيا قۇرماق پا؟ مۇنىڭ راس-وتىرىگىن ءبىلۋ ءۇشىن سول ادامداردىڭ وزدەرىنە حابارلاسىپ كورگەن ەدىك.

جۋرناليست گۇلجان ەرعاليەۆا ءوزىنىڭ بريۋسسەلگە باراتىنىن بىردەن جوققا شىعاردى، بىراق ول جيىن تۋرالى ەستىگەنىن ايتتى. «بۇل تۋرالى ەستىگەنىم بار، بىراق ءوزىم بارمايمىن. سوندىقتان بۇل سۇراقتى ماعان ەمەس، وزگەلەرگە قويعانىڭىز ءجون شىعار. شىنىمدى ايتسام، كىمدەردىڭ انىق باراتىنىن دا بىلمەيمىن. بىراق ولاردى قولدايمىن», – دەدى ول.

ساراپشى، ۇلت پاتريوتى راسۋل جۇمالى ازىرگە بۇل ماسەلە بويىنشا تۇسىنىكتەمە بەرمەيتىنىن جەتكىزدى، بىراق ءوزىنىڭ بريۋسسەلگە باراتىنىن جوققا دا شىعارمادى. «ازىرگە قانداي دا ءبىر اقپارات بەرۋ ەرتەرەك. ءسال كەشىرەك بەرەيىن. قۇپيادا ۇستاپ وتىرعان ەشتەڭە جوق. بىراق ازىرگە بولىسەتىن نارە دە جوق», – دەدى ول.

ساياساتتانۋشى ايدوس سارىم وسى جەكسەنبى كۇنى بريۋسسەلگە باراتىنىن راستادى، بىراق وندا نەندەي جيىن بولاتىنىن اشىپ ايتپادى. «كەلگەننەن كەيىن ايتىپ بەرسەك قالاي بولادى؟ قازىر ايتاتىن تاقىرىپ جوق. باراتىنىمىز راس. ءوزىمىز سول جاقتاعى قازاقتارمەن كەزدەسەمىز، سويلەسەمىز», – دەيدى ا.سارىم.

جۋرناليست ءنازيرا دارىمبەت تە بۇل ماسەلەگە قاتىستى ازىرگە تۇسىنىكتەمە بەرمەيتىنىن ايتتى. «بۇل تۋرالى كەيىنىرەك الەۋمەتتىك جەلىدەگى پاراقشامدا جازاتىن بولامىن», – دەيدى ول.

ساياساتكەر ءامىرجان قوسانوۆقا حابارلاسىپ كورىپ ەدىك، ول تەلەفون تۇتقاسىن كوتەرمەدى. جۋرناليست ەرمۇرات باپي مەن قۇقىق قورعاۋشى عالىم اعەلەۋوۆتىڭ تەلەفوندارى ءسوندىرۋلى بولدى. سوعان قاراعاندا، بۇل ازاماتتار بريۋسسەلگە جول ءجۇرىپ كەتكەن بولۋى مۇمكىن. ءبىز حابارلاسا العان كەيبىر ادامدار بريۋسسەلگە باراتىندارىن جوققا شىعارماعانىنا قاراعاندا، وسى جەكسەنبى كۇنى بەلگيا استاناسىندا ءبىر توپ قازاقستاندىق راسىندا جاڭا وپپوزيتسيالىق پارتيا قۇرىپ، ەلدى ەلەڭ ەتكىزۋى ىقتيمال. «جاس الاش» بۇل ماسەلەنى نازاردا ۇستايتدى.

زەرە جىلقىبەك

دەرەككوزى: جاس الاش گازەتى

Abai.kz

26 پىكىر