ناۋرىز ايىنىڭ 31-ءى كۇنى ەلباسى نۇرسۇلتان نازارباەۆ الماتى وبلىسىنىڭ اكىمشىلىك-اۋماقتىق قۇرىلىسىنداعى وزگەرىستەر تۋرالى جارلىققا قول قويعان بولاتىن. وندا: «الماتى وبلىسىنىڭ رايىمبەك اۋدانىن ءبولۋ جولىمەن اكىمشىلىك ورتالىعى كەگەن اۋىلىندا ورنالاسقان كەگەن اۋدانى، اكىمشىلىك ورتالىعى نارىنقول اۋىلىندا ورنالاسقان رايىمبەك اۋدانى اكىمشىلىك-اۋماقتىق بىرلىكتەرى قۇرىلسىن»، – دەلىنگەن. وسىلايشا بۇل جارلىق جاۋاپسىز قالماي ءوز ناتيجەسىن بەردى. «كوپ تىلەۋى كول بولىپ»،  كوپتەن كۇتكەن حالىقتىڭ ءۇمىتى اقتالدى.

وسىعان وراي، الماتى وبلىسىنىڭ اكىمى اماندىق باتالوۆ ارنايى ات باسىن بۇرىپ، جۇمىس ساپارىمەن ەكى اۋداندى ارالادى.

وبلىس əكىمى الدىمەن كەگەن اۋىلىنىڭ اقساقالدارىمەن كەزدەسىپ، ولاردىڭ باتاسىن الدى.

كەزىندە نارىقتىڭ تالابىمەن بىرىكتىرىلگەن نارىنقول مەن كەگەن ءوڭىرىنىڭ جيىرما ءبىر جىلدا  اجارى قاشقانى راس. الايدا ول ولقىلىقتاردىڭ ورنى تولتىرىلماق. قوس اۋداندا جاڭا جۇمىس ورىندارىمەن قاتار، جاڭا مۇمكىندىكتەرگە دە جول اشىلادى. ولارعا كورسەتىلەتىن قولداۋ مەن كومەك از بولمايتىنى انىق.

وبلىس əكىمى تەكەس اۋىلىنداعى 6 مىڭ توننا كارتوپ تاستايتىن قويما قۇرىلىسىمەن تانىسىپ، ءوسىپ كەلە جاتقان كارتوپتىڭ بۇرىنعى داڭقىن قايتا جانداندىرۋ  ماقساتىندا   يندۋسترياعا ۇلكەن كوڭىل ءبولىنۋى قاجەت ەكەندىگىن ايتتى.

شاشىراعان نارىنقولدىڭ جاعدايىن قايتادان جاقسارتۋ بارىسىندا جاڭا əكىمدىك عيماراتى، زامان تالابىنا ساي ءبىلىم ورداسى، فۋتبول الاڭى مەن 180 ورىندىق ستاديونى بار سپورت-ساۋىقتىرۋ كەشەنى  سالىنباق.

Əكىمى  قازىناشىلىق، پوليتسيا ۋچاسكەسى، ءورت ءسوندىرۋ ءبولىمى، جالپى اۋدانى 3400 شارشى مەتر بولاتىن جاڭا ەمحانا جوبالارىمەن دە تانىسىپ قايتتى.100 توسەككە ارنالعان امبۋلاتوريالىق ەمحانانىڭ  زاماناۋي جابدىقتارمەن جابدىقتالۋىن تاپسىرىپ، ەم الۋشىلارعا تەز ساۋىعىپ شىعۋلارىن تىلەدى.

سونىمەن قاتار، جەرگىلىكتى مادەنيەت ۇيىندە رايىمبەك اۋدانىنىڭ تۇرعىندارىمەن كەزدەسۋ وتكىزىپ، الداعى جوسپارمەن تانىستىردى.

- بۇگىن ءبىز ءۇشىن تاريحي ءسات. ارينە، مۇنىڭ ءبارى حالىقتىڭ يگىلىگى ءۇشىن. وسى  كۇندى كوپ كۇتكەندەرىڭىزدى  بىلەمىز. بىرنەشە جىلدان كەيىن رايىمبەك اۋدانى تۋرالى بارلىعى بىلەتىن دəرەجەگە جەتەتىن بولادى. قازىردىڭ وزىندە جەكە كاسىپكەرلەر  ارتۇرلى كاسىپورىنداردى اشقىسى كەلەدى. بۇل،  ەڭ الدىمەن، جۇمىس ورىندارىنىڭ ارتۋىنا ءوز سەپتىگىن تيگىزەدى. كوپ ۇزاماي اۋىلدا ءتۇرلى الەۋمەتتىك-ەكونوميكالىق ينستيتۋتتار: قوعامدىق قىزمەت كورسەتۋ ورتالىعى، تۇرعىن ءۇي عيماراتتارىن سالۋ جوسپارعا قويىلىپ، بارلىق قاجەتتى جاعدايلار جاسالىناتىن بولادى", - دەدى اماندىق باتالوۆ.

كەزدەسۋ سوڭىندا دەپۋتاتتار جولان وماروۆتى رايىمبەك اۋدانىنىڭ اكىمى، ال اۋدان اكىمىنىڭ ورىنباسارى قىزمەتىن اتقارىپ كەلگەن تالعات باەدىلوۆتى كەگەن اۋدانىنىڭ اكىمى لاۋازىمىنا ءبىراۋىزدان بەكىتىپ، بارلىق ءۇمىت ارتىلاتىندىعىن ايتتى.

ايتا كەتەيىك، 1997 جىلدىڭ كوكتەمىندە بىرنەشە وبلىس جابىلىپ، كوپتەگەن اۋدان تارقاتىلعان بولاتىن. وسىنىڭ سالدارىنان 1997 – 2011 جىلدار ارالىعىندا شەكارالىق اۋداندارداعى 45 ەلدى مەكەن ەلىمىزدىڭ كارتاسىنان جويىلىپ، 20-دان استام مەكتەپ جۇمىسىن توقتاتقان بولاتىن. سول تۇستا الماتى وبلىسىندا قاپال، ۇيگەنتاس، بورىلىتوبە، نارىنقول سىندى اۋداندار اتاۋىن وزگەرتتى.  1997 جىلى نارىنقول اۋىلىندا 12 مىڭداي ادام بولسا، بۇگىنگى كۇنى سونىڭ 7 مىڭدايى قالعان. شەكاراعا جاقىن ورنالاسقان سۇمبە، سارىباستاۋ، تەكەس جانە شەكارانىڭ تۋرا تۇسىنداعى ۇزاق اۋىلىندا كەزىندە 5 مىڭعا جۋىق ادام ءتۇرسا، قازىر 3 مىڭعا جەتەر-جەتپەس حالىق تۇرىپ جاتىر.
بۇگىندە كەگەن اۋدانىنىڭ  جالپى اۋماعى 711 937 گەكتاردى قۇراپ وتىر.

Abai.kz