بەيسەنبى, 21 قاڭتار 2021
قۇيىلسىن كوشىڭ 2684 7 پىكىر 17 ءساۋىر, 2018 ساعات 09:22

ءCىم ورىنباسارى قىسىم كورگەن قازاقتاردىڭ ماسەلەسىمەن قىتايعا بارماق

ءبىزدىڭ پورتال كەشە عانا "بەلگىلى عالىم قىتاي تۇرمەسىندە قاماۋدا وتىر", "ءابدىراحمانوۆ مىرزا، انارگۇلگە اراشا تۇسىڭىزدەر!" اتتى ەكى ماقالا جاريالاعان ەدى. بۇگىن سول جاقتاعى بۇكىل قازاققا بەلگىلى قىتاي قىسىمىنا تۇسكەن ەكى ازامات تۋراسىندا ماتەريال دايىنداپ قويعان ەدىك. قازاقستانداعى تانىستارى ول ەكى ازاماتتىڭ ون شاقتى كۇن عانا قاماۋدا بولىپ، تەك قىزمەتىنەن تومەندەتىلگەنىن جانە باسى امان، باۋىرى ءبۇتىن ەكەنىن ايتقاندىقتان، قانداس باۋىرلاردىڭ تاعدىرىن قۇدايعا تاپسىرعاندى ءجون دەپ شەشتىك. قوش، بۇعان دەيىن دە ءبىزدىڭ پورتال ارقىلى قىتاي ساياساتىنىڭ تەپكىسىن كورگەن قانداستار جايلى جۇزدەگەن ماقالا وقىرمانعا جول تارتتى. سونى ءبىزدىڭ بيلىك قۇلاققا ىلە باستاعان سىڭايلى.

قازاقستان سىرتقى ىستەر ءمينيسترىنىڭ ورىنباسارى مۇحتار تىلەۋبەردى قىتايدا قىسىم كورىپ جاتقان ەتنيكالىق قازاقتارعا قاتىستى ماسەلەگە تۇسىنىكتەمە بەردى. سونداي-اق، ول قىتايعا بارىپ، ەلشىلىك ارقىلى قانداستاردىڭ ماسەلەسىن تالقىعا سالاتىنىن مالىمدەدى.

ونىڭ سوزىنشە، قيىندىققا ۇشىراپ وتىرعان ەتنيكالىق قازاقتار قازاقستانعا كەلىپ، ورالمان مارتەبەسىن العان. بىراق قىتايدا تۇراقتى تىركەۋدەن شىقپاي، سول ەلدىڭ جەڭىلدىكتەرىن الىپ كەلگەن.

"ولار تۇراقتى تىركەۋدەن شىقپاعانىنا بايلانىستى قامالىپ وتىر. سەبەبى ولار تۇراقتى تىركەۋدەن شىقپاعاندىقتان قوسىمشا الەۋمەتتىك تولەمدەردى الىپ وتىرعان. سول سەبەپتى جەرگىلىكتى بيلىك بۇعان تىيىم سالىپ وتىر. سوندىقتان ءبىز جەڭىلدىكتەر جاساعاندا ونى جان-جاقتى قاراپ، قىتايدىڭ تالاپتارىنا قايشى كەلمەيتىندەي جاساۋىمىز كەرەك. بۇل ماسەلە بويىنشا قىتاي ۇكىمەتىمەن كەلىسسوز وتكىزىپ جاتىرمىز. مەن ەرتەڭ ءوزىم ۇرىمجىگە شىعامىن. سول جاقتاعى قازاق دياسپوراسىنىڭ ماسەلەلەرىن تالقىلاۋعا بارامىن",- دەدى مۇحتار تىلەۋبەردى.

قىتايداعى ەتنيكالىق قازاقتاردىڭ جاپپاي قىسىمعا ۇشىراعانى تۋرالى اقپاراتتار 2017 جىلدىڭ ءساۋىر ايىنان تاراي باستاعان. شىڭجاڭدا ۇستالعاندار اراسىندا قىتايدان تاريحي وتانىنا ورالىپ، قازاقستان ازاماتتىعىنا يە بولعاندار دا بار.

بۇعان دەيىن قىتايدان كەلگەن ورالماندار الماتىدا تۋىستارىن قىتايدا زاڭسىز ۇستاپ وتىرعانىنا نارازىلىق تانىتىپ، اكىمدىكتەن بەيبىت شەرۋگە رۇقسات سۇراعان.

Abai.kz

7 پىكىر