«نۇر وتان» پارتياسى ءوز قىزمەتىن جاڭعىرتۋ جۇمىستارى اياسىندا جاڭا 22 پارتيالىق جوبانى جۇزەگە اسىرماق. بۇل تۋرالى بۇگىن پارتيا توراعاسىنىڭ ءبىرىنشى ورىنباسارى ماۋلەن اشىمباەۆتىڭ پاۆلودار وبلىسىنا جاساعان ساپارى بارىسىندا كەڭىنەن ايتىلدى.

قازىردىڭ وزىندە پاۆلودار وبلىسىندا جاڭا پارتيالىق جوبالار پيلوتتىق رەجىمدە ءوز جۇمىسىن باستاپ كەتتى. سوعان وراي «نۇر وتان» پارتياسى مەن جەرگىلىكتى مەملەكەتتىك ورگاندار، وڭىرلىك كاسىپكەرلەر پالاتاسى جانە بيزنەس قاۋىمداستىق اراسىندا بىرقاتار مەموراندۋمعا قول قويىلدى.

بۇل جوبالاردى جۇزەگە اسىرۋ ارقىلى بالالارعا ارنالعان تەگىن IT-سىنىپتار اشۋعا، ارنايى IT-ماماندار دايارلاپ، حالىقتىڭ تسيفرلىق ساۋاتتىلىعىن ارتتىرۋعا، وڭىرلىك كىتاپحانالار جۇيەسىن ترانسفورماتسيالاۋعا جانە كىتاپحانالاردى قازىرگى زامانعى ءبىلىم ورتالىعى رەتىندە قايتا قۇرۋعا جول اشىلادى. بۇل يگى باستامالار ەلباسىنىڭ «تسيفرلى قازاقستان» باعدارلاماسى اياسىندا پارتيا تاراپىنان قولعا الىنعان يگى باستامالار ەكەنىن ايرىقشا اتاپ وتكەن ءجون.

– ەلباسىمىزدىڭ پارتيا ساياسي كەڭەسىنىڭ كەڭەيتىلگەن وتىرىسىندا بەرگەن تاپسىرماسىنا سايكەس بۇگىندە پارتيا قىزمەتىن جاڭعىرتۋ جۇمىستارى قارقىندى جۇرگىزىلۋدە. سونىڭ اياسىندا ناقتى 22 جوبانى قولعا الىپ، ولاردى ءتيىمدى جۇزەگە اسىرۋ ءۇشىن بىرنەشە مەموراندۋمدارعا قول قويىلدى. ناتيجەسىندە ەلىمىزدە پارتيانىڭ باستاماسىمەن IT-سىنىپتار اشىلاتىن بولدى. وندا جاستاردىڭ تسيفرلىق باعىتتا ساپالى ءبىلىم الۋىنا بارلىق جاعداي جاسالادى. سونداي-اق، 20 IT ورتالىق اشىلىپ، وسى سالادا ماماندار دايارلاۋدى قولعا الامىز. پارتيا شاعىن جانە ورتا بيزنەستى دامىتۋعا جانە «رۋحاني جاڭعىرۋ» باعدارلاماسىن جۇزەگە اسىرۋعا دا بەلسەنە قاتىساتىن بولادى، – دەدى ماۋلەن اشىمباەۆ.

پارتيا توراعاسى ءبىرىنشى ورىنباسارىنىڭ ايتۋىنشا، ەلىمىز بويىنشا 1000 IT-سىنىپ اشىلماق. وندا جاستار پروگراممالاۋ مەن روبوت تەحنيكاسىنىڭ نەگىزدەرى جونىندە جان-جاقتى ءبىلىم الادى. بۇل باستاما مەكتەپتەرگە فاكۋلتاتيۆتى ءپان رەتىندە ەنگىزىلىپ، ءۇش ايلىق جانە التى ايلىق كۋرس نەگىزىندە جۇرگىزىلمەك. سونىڭ ناتيجەسىندە جىلىنا 150 مىڭ بالانى وقىتۋ كوزدەلىپ وتىر.

اتالعان 22 پارتيالىق جوبانىڭ قاتارىندا شاعىن جانە ورتا بيزنەستى قولداۋعا باعىتتالعان باستامالار دا بار. «رۋحاني جاڭعىرۋ» باعدارلاماسىن جۇزەگە اسىرۋعا دا «نۇر وتان» ەرەكشە كوڭىل ءبولىپ وتىر. سونىڭ اياسىندا كىتاپحانالاردى قازىرگى زاماناۋي ءبىلىم ورتالىقتارىنا اينالدىرۋعا باعىتتالعان ارنايى جوبالار جۇزەگە اسىرىلاتىن بولدى.

– وسىنداي ناقتى جوبالار ارقىلى پارتيا ەلباسىنىڭ الدىمىزعا قويعان ماقسات-مىندەتتەرىن جۇزەگە اسىرىپ، ەلىمىزدىڭ ستراتەگيالىق باعدارلامالارىنا بەلسەنە قاتىساتىن بولادى. وسى ماقساتتا مەملەكەتتىك ورگاندارمەن، بيزنەس قاۋىمداستىقپەن جانە ۇكىمەتتىك ەمەس ۇيىمدارمەن تىعىز بايلانىستا جۇمىس ىستەيمىز، – دەدى ماۋلەن اشىمباەۆ.

ساپار بارىسىندا «نۇر وتان» پارتياسى توراعاسىنىڭ ءبىرىنشى ورىنباسارى وبلىس اكىمى بولات باقاۋوۆپەن بىرگە پارتيانىڭ وبلىستىق اكتيۆىمەن كەزدەستى. ودان بولەك، وڭىردەگى بىرقاتار الەۋمەتتىك نىسانداردى ارالاپ، ولاردىڭ جۇمىس بارىسىمەن تانىستى. تسيفرلاندىرۋ باعىتى بويىنشا قولعا الىنعان يگى باستامالاردىڭ جۇزەگە اسىرىلۋىن باقىلاۋ ءۇشىن جاستار ورتالىعى مەن جالپى ءبىلىم بەرەتىن ورتا مەكتەپكە دە ارنايى باردى. سونداي-اق، وسى ساپار اياسىندا «نۇر وتان» پارتياسى مەن قازاقستان رەسپۋبليكاسىنىڭ كاسىپوداقتار فەدەراتسياسى اراسىندا ءوزارا ىنتىماقتاستىق تۋرالى ەكىجاقتى مەموراندۋمعا قول قويىلعانىن دا اتاپ وتكەن ءجون.

Abai.kz