"1932-1933 جىلدارداعى اشتىق قۇرباندارىنا ورناتىلعان ەسكەرتكىش كەشەننەن ءمۇسىن ۇرلادى دەگەن كۇدىكتى مەن ۇرلانعان ءمۇسىندى ساتىپ الدى دەگەن كۇدىكتى انىقتالدى" دەيدى استانا قالالىق ىشكى ىستەر دەپارتامەنتىنىڭ ءباسپاسوز قىزمەتى.
پوليتسيا "ۇرلىق" جانە "قىلمىستىق جولمەن تابىلعان مۇلىكتى يەلەنۋ نەمەسە وتكىزۋ" باپتارى بويىنشا تەرگەۋ باستالعانىن حابارلادى. كۇدىكتى ۋاقىتشا ۇستاۋ اباقتىسىنا جابىلعان.
ەسكەرتكىش كەشەننەن بالانىڭ ءمۇسىنى ۇرلانعانى تۋرالى 2017 جىلى جازدا حابارلانعان ەدى. بيىلعى جىلدىڭ باسىندا ۇرلانعان ءمۇسىننىڭ ورنىنا قايتادان قۇيىلعان ءمۇسىن ورناتىلعان بولاتىن. پوليتسيانىڭ مالىمەتىنشە، ءمۇسىن ەكىنشى رەت وتكەن ايدا تاعى دا ۇرلانعان.
استانادا "قاسىرەت قابىرعاسى" دەپ اتالاتىن كومپوزيتسيانىڭ جانىنداعى 1932-1933 جىلدارداعى اشارشىلىق قۇرباندارىنا ورناتىلعان ەسكەرتكىش رەسمي تۇردە 2012 جىلى 31 مامىردا اشىلعان.
باسقا - باسقا، ءبىزدىڭ ەلدە اشتىق قۇرباندارىنا ارنالعان ەسكەرتكىش قاسىرەتتى دە قاسيەتتى (ساكرالدى) دۇنيە بولىپ ەسەپتەلۋى كەرەك. سونداي دۇنيەنى ءبىر ەمەس، ەكى رەت قولدى قىلعان ۆاندالداردىڭ قاراكەتى ناعىز جاۋىزدىق! ۇرىنىڭ اتى-ءجونى قۇپيا كۇيىندە قالماي جاريالانۋى كەرەك. بۇل - ءبىر. ەكىنشىدەن، اتالعان كەشەندە اراعا جىل سالىپ ۇرلىق بولىپ جاتسا، دەمەك، ەسكەرتكىشكە دەگەن استانا بيلىگىنىڭ قۇرمەتى دە كەم بولعانى. ايتپەسە، باي-باعىلاننىڭ ەسىگىنىڭ اۋزىن كۇزەتىپ وتىراتىن ساقشىلاردى كەشەننىڭ الاڭىنا تۇرعىزىپ نەمەسە بەينە باقىلاۋ كامەراسىن ورناتۋ سونشالىقتى قيىن بولىپ پا؟.. استانا اكىمدىگى قايدا قاراپ وتىر؟
Abai.kz
