تاشكەنتتەگى Demir سۋپەرماركەت جەلىسى مەن Grand Mir قوناق ءۇيىنىڭ قوجايىنى احمەت دەمير شاۆكات ميرزياەۆ بيلىككە كەلگەننەن كەيىن، بۇل ەلدە كاسىبىن قايتا باستاعان ساناۋلى تۇرىك بيزنەسمەنى. بىلتىر كۇزدە احمەت دەمير وزبەكستانعا قايتا ورالىپ، «ەسكي شاحار» ساۋدا-تۋريستىك كەشەنىنىڭ قۇرىلىسىن سالۋعا كىرىسىپ كەتكەن.
"وزبەكستاندا جاعداي بىردەن وزگەردى. قازىر كاسىپكەرلەردەن ۇلتتىق قاۋىپسىزدىك قىزمەتى وكىلدەرى "ۇلەستەرىن" المايدى. بۇل – ەڭ باستى وزگەرىس. بىراق بارلىق پروبلەما شەشىلدى دەپ ايتا المايمىز،" – دەگەن ەدى احمەت دەمير 24 ساۋىردە.
وزگە تۇرىك كاسىپكەرلەرى دە وزبەكستاندا وزدەرىنە قولايلى جۇمىس ىستەۋگە ءالى دە كەدەرگىلەردىڭ بارىن ايتادى. ولار تۇركيا پرەزيدەنتى ەردوعاننىڭ كەلۋى بۇل ماسەلەنى شەشەدى دەپ ۇمىتتەنەدى.
"ەگەر تۇرىك پرەزيدەنتىنىڭ ساپارىنان كەيىن دە، پروبلەما شەشىلمەسە، ءبىز امالسىزدان بۇقارالىق اقپارات قۇرالدارىنا شىعىپ، سۇقبات بەرىپ، ءبارىن ايتۋعا ءماجبۇر بولامىز. ءبىز – ساياساتكەر ەمەسپىز، ءبىز – كاسىپكەرمىز. ءىستى ساياسيلاندىرماي شەشۋدى قالايمىز،" – دەيدى ءىرى تۇرىك كومپانياسىن باسقارۋشىلاردىڭ ءبىرى.
ۇكىمەت باسىنداعى شەنەۋنىكتىڭ ءبىرى جۋرناليستەرگە ميكروفونسىز جاعدايدى تۇسىندىرۋگە تىرىستى.
"بىلتىر "وزبەكينۆەست" ۇلتتىق كومپانيانىڭ باسشىسى رۋستام ازيموۆ تۇركياعا رەسمي ساپارمەن بارعا كەزدە، بىرقاتار تۇرىك كومپانيالارى وزبەكستاندا زاۋىت جانە فابريكا سالۋ جونىندە بيزنەس-جوبالارىن ۇسىنعان. تاشكەنت بۇل بيزنەس-جوبالاردىڭ ءبارىن قابىلداپ، ءبىراز ۋاقىت وتكەننەن كەيىن، بىزگە سايكەس كەلمەيدى ەكەن دەپ، كەرى قايتارعان. بىراق شىن مانىندە وزبەك تارابى تۇرىك كاسىپكەرلەرىنەن بۇل بيزنەس-جوبانى ۇرلاپ، وزدەرىنىڭ اتتارىنان ۇسىنعان. وزبەكستانداعى وليگارحتار ءالى ءوز مونوپوليالارىن ەشكىمگە بەرگىسى كەلمەيدى", – دەدى شەنەۋنىك.
Abai.kz
