جەتىسۋ ولكەسىنىڭ تۋما دارىن جاس اقىندارى اراسىندا ايتىس ۇيىمداستىرىلدى، دەپ حابارلايدى وڭىردەگى مەنشىكتى ءتىلشىمىز. 

اقىندار ايتىسى تالدىقورعان قالاسىنداعى «وقۋشىلار سارايىندا» ءوتتى. الماتى وبلىسىنىڭ ىشكى ساياسات باسقارماسى، وڭىرلىك كوممۋنيكاتسيالار قىزمەتى مەن «ولكە تىنىسى» جشس بىرلەستىگىنىڭ ۇيىمداستىرۋىمەن وتكەن «عاسىر-عۇمىر» تاقىرىبىنداعى ايتىسقا وبلىستىڭ ءار وڭىرىنەن 18  جاس جۇيرىك باق سىنادى.

وقۋشىلار ايتىسىن سارقان مەن جامبىل اۋدانى اتىنان ءسوز دوداسىن ءسالىمحان مەن اقبوتا باستادى. ايتار ويلارى انىق، ازىلدەرى جاراسىمدى شاكىرتتەر قىز بەن جىگىت ايتىسىنىڭ تاماشا ۇلگىسىن كورسەتە ءبىلدى.

ءسوز سايىسىندا ەكى جۇپ قوس گازەتتىڭ وتكەن  تاريحىنا توقتالا وتىرىپ، اتاۋلى مەرەكەمەن قۇتتىقتادى. سونىمەن قاتار، جاس اقىندار  قازاق  دəستۇرىن دارىپتەپ، سالتىن سىيلايتىن ونەر سۇيەر قاۋىمىنا كەستەلى جىر، سۇبەلى ءسوز سايىسىن سىيلادى.

ايتىس ەرەكشەلىگى سۋىرىپسالما اقىندار جاس  بولسا دا قوعامداعى وزەكتى ماسەلەلەردى اشىپ، قوزعاي ءبىلدى. ءسوز ساپتاۋ شەبەرلىگى مەن شەشەندىك ونەرى ءبىر-بىرىنەن وتەتىن 9 جۇپتىڭ تارتىسى كوپشىلىك جاس بۋىنعا ەستەن كەتپەس كوڭىل-كۇي سىيلادى. باستىسى قازاق ءباسپاسوزىنىڭ قوس قاناتى بولعان گازەتتەردى جىرعا قوستى. وقۋشىلاردىڭ  ايتقان سوزدەرى دە ورامدى بولدى، ماسەلەن، جىگىتەرىمىز قىزدارعا قورعان، ەلگە ورمان بولسىن دەگەنى ايتىستى اجارلاندىرا ءتۇستى.

وسە كەلە مىقتى ءسوز شەشەندەرى شىعادى دەپ سەنىم ارتقان ادىلقازىلار جىر ءمۇشايراسىن تەرەڭ قيىستىرىلعان ازىلدەر ەرەكشەلەندىردى،- دەپ اتاپ ءوتتى.

«ايتىس - ءمانى-ماعىناسى جوعارى دۇنيە. ايتىس بولعاننان كەيىن ونىڭ دەڭگەيى بولادى. بۇل سايىسقا كەلگەن بالالاردىڭ دا دەڭگەيى، دايىندىعى ءارتۇرلى. وسى تۇرعىدا رايىمبەك اۋدانىنان كەلگەن ديانا ەسىمدى ارۋ قىزدى ەرەكشە اتاپ وتكىم كەلەدى. ول قىزدىڭ دايىندىعى وتە جوعارى دەڭگەيدە، ءتىلى قۇنارلى،ءسوز ساپتاۋى مادەنيەتتى»، - دەپ سارالادى قازىلار القاسىنىڭ ءتورايىمى زابيرا سايديلدينا.

وت اۋىزدى، وراق ءتىلدى اقىنداردىڭ ونەرى، ءسوز  ساپتاۋلارى باعالانىپ ايتىس قورىتىندىسى بويىنشا  باس جۇلدەنى ەرقۇلان ريزا، I ورىندى جاعالبايلى ديانا، II ورىندى ءسالىمحان مەن اقبوتا، ال III ورىندى  ماقساتبەك باۋىرجان، ايىم اسىلبەكقىزى، ءمىرزالى ءجۇسىپالى  وزارا ءبولىسىپ الدى.  جەڭىمپازدارعا العىس حات پەن باعالى سىيلىقتار تابىستالدى.

6 سىنىپ وقۋشىسى ەرقۇلان بۇل جۇلدەنىڭ ۇستازدارى ايتۋعان جەتەباەۆ پەن اياۋلىم جۇمابەكقىزىنىڭ ارقاسىندا قول جەتكىزگەندىگىن ايتىپ، العىسىن ءبىلدىردى.

«الدىمەن ايتا كەتەرلىگى بۇگىنگى دودا اسا تارتىستى ءوتتى. ەرەكشە كوڭىل –كۇي بويىمدى كەرنەدى. قازاق قوعامىنا قاجەت ويلار مەن پاراساتتى پىكىرلەر تيەگى اعىتىلدى. جاس اقىندار دا ويلارىن اشىق ايتىپ، تاقىرىپتى اشا ءبىلدى دەپ ويلايمىن. وسىنداي جىرلارىن جاڭبىرشا جاۋدىراتىن، تارتىمدى ايتىستار ءالى دە ۇيىمداستىرىلسا»، - دەپ ءسوزىن تۇيىندەدى باس جۇلدە يەگەرى.

Abai.kz