جاقىندا «ARNA-B» باسپاسىنان «بولاشاققا باعدار: رۋحاني جاڭعىرۋ» باعدارلاماسى اياسىندا «ءشامشى قالداياقوۆ» اتتى جەتى بولىمنەن قۇرالعان،  تۇڭعىش فوتوالبوم-كىتاپ جارىق كوردى. مۇندا قازاقستاننىڭ حالىق ءارتىسى، قر مەملەكەتتىك سىيلىعىنىڭ لاۋرەاتى، قر ءانۇرانى اۆتورلارىنىڭ ءبىرى، كومپوزيتور ءشامشى قالداياقوۆ جايىندا جان-جاقتى  مالىمەت بەرىلەدى.

اۋقىمدى جيناقتىڭ «مەنىڭ قازاقستانىم» اتتى العاشقى ءبولىمى كومپوزيتوردىڭ وتانسۇيگىشتىكتى، تۋعان ولكەنى جىرلايتىن اندەرىنەن تۇرادى.

فوتوالبوم-كىتاپتىڭ ەكىنشى ءبولىمى «ءومىر-وزەن» دەپ اتالادى. بۇل ءبولىم – ش.قالداياقوۆ ءومىرىنىڭ ءار كەزەڭدەرىن قامتىعان تۇتاس فوتوشەجىرە.

«سول ءبىر كەز ەسىمدە...» دەپ اتالعان ءۇشىنشى بولىمدە كومپوزيتوردىڭ زامانداستارى، كەزىندە ونىمەن دوس-جار، سىرلاس بولعان ادامدار ءشامشى تۋرالى ءوز ەستەلىكتەرىمەن بولىسەدى.

شاكەڭنىڭ بارشا جۇرتقا ايگىلى اندەرى «ءشامشىنىڭ ءانى» اتتى ءتورتىنشى بولىمدە انشىلەردىڭ سۋرەتىمەن بىرگە مەيلىنشە كەڭىنەن قامتىلعان.

«سارعايعان سۋرەتتەر سىرى» اتتى بەسىنشى بولىمدە كەزىندە شامشىمەن ەستەلىككە سۋرەتكە ءتۇسىپ قالعان نەمەسە ءوز قولىمەن فوتوتاسپاعا تارتقان ادامدار سول ءبىر ساۋلەلى ءسات تۋرالى سىر شەرتەدى.

«امانات» اتتى التىنشى ءبولىم ۋاقىتىندا كومپوزيتوردىڭ تۇتىنعان زاتتارى مەن كيىمدەرىن – پيانينوسىن، ءماندولينىن، مۇشتەگىن، بوركىن، شاپانىن، تاعى باسقا بۇيىمدارىن ساقتاپ قالعان جانداردىڭ جۇرەك جىلىتار ەستەلىكتەرىن قامتيدى.

«ءشامشى-مۇرا» اتتى سوڭعى ءبولىم كومپوزيتور مۇراسىن ناسيحاتتاپ، زەرتتەپ جۇرگەن جاناشىر ازاماتتار، ولاردىڭ وي-پىكىر، ۇسىنىستارى، اتقارىپ جاتقان ءىس-شارالارى جايىندا باياندايدى.

فوتوالبوم-كىتاپتى قۇراستىرعان – ءشامشىنىڭ ءومىرى مەن شىعارماشىلىعىن زەرتتەۋشى، كومپوزيتور قالدىبەك قۇرمانالى.

بۇل اۋقىمدى توپتاما بۇكىل جوعارى، ارنايى ورتا جانە جالپى ءبىلىم بەرەتىن وقۋ ورىندارىنىڭ ستۋدەنتتەرى مەن وقۋشىلارىنا، سونداي-اق حاس ونەرگە ىڭكار جالپى قاۋىمعا ارنالعان.

مۇرات راحىمجانوۆ

اbai.kz