سەنبى, 18 تامىز 2018
46 - ءسوز 1790 0 پىكىر 17 مامىر, 2018 ساعات 11:25

ادام

ءبىر جىگىت جولدا كەتىپ بارا جاتىپ ويدا جوقتا قوماقتى ءاميان تاۋىپ الدى. جان-جاعىنا قاراسا ەشكىم كورىنبەيدى. «ءاميان تاۋىپ الدىم، كىمدىكى؟» دەپ ايقايلاپ ءۇش رەت ايتقانداي بولدى. دەگەنمەن ءوز داۋسىن باسقالار تۇگىلى ءوزى دە ەستىمەدى.

بىلايىراق شىعىپ الىپ ءامياندى اشىپ قاراسا، ىشىندە ءبىر ماشيناعا جەتەرلىك قارجى بار سياقتى. قۋانعاننان نە ىستەرىن بىلمەي اڭتارىلىپ قالدى. ىشىندە ءبىر جىلىلىق پايدا بولىپ، بالا-شاعاسىنىڭ بىلتىرعى ەسكى بوتينكا مەن كيىمدەرمەن جۇرگەنى، جۇبايىنىڭ ءجونى ءتۇزۋ ءبىر كويلەگى جوعى، ال ءوزىنىڭ بەس-التى جىلدان بەرى ءبىر جاڭا كيىم الماعانى، وزدەرىنىڭ كوپتەن بەرى تويىپ تاماق تا جەمەگەنى ەسىنە ءتۇستى . «اللا تاعالا مەنىڭ كوز جاسىمدى كورىپ وسى نەسىبەنى جىبەرگەن شىعار» دەگەن وي كەلىپ، جاراتقانعا راحمەت ايتا بەرگەنى سول ەدى، بوتاداي بوزداعان، كيىمى جۇپىنى كىسىنى كوردى.

- اينالايىن، ادامدار-اۋ، قايىرىمدى جاندار، بالالارىمنىڭ اناسى ايىقپاس دەرتكە شالدىعىپ، سونى ەمدەتۋ ءۇشىن اعايىندارىم مەن جانى جايساڭ ادامدار اۋىزدارىنان جىرىپ بەرگەن قارجىمدى اميانىمەن قوسا جوعالتتىم. ەندى نە ىستەيمىن؟ جۇبايىما قاجەتتى وپەراتسيانى قارجىسىز قالاي جاساتامىن؟ جۇبايىم و دۇنيەلىك بولىپ كەتسە، بالالارىمنىڭ كۇنى نە بولادى؟ بۇل ازاپتى كورسەتكەنشە ماعان تەزىرەك ءولىم جىبەرە قويشى ءتاڭىرىم،-دەپ جىلايدى.

ءاميان تاۋىپ العان جىگىت ارى ويلاندى، بەرى ويلاندى. اقىرى ءناپسىسىن ۇياتى مەن يماندىلىعى جەڭىپ، بوتاداي بوزداعان كىسىنىڭ جانىنا قالاي جەتىپ بارعانىن، ءامياندى اقشاسىمەن قوسىپ قالاي بەرگەنىن ءوزى دە بايقاماي قالدى.

كەنەت ۇيلەردىڭ تاساسىنان توپىرلاعان ادامدار شىعا كەلگەندە ءاميان تاۋىپ العان جىگىت ساسىپ قالادى. توپتىڭ ىشىنەن ساليقالى جىگىت اعاسى شىعىپ ءاميان تاپقان جىگىتتى قاپسىرا قۇشاقتاي الىپ:

- باۋىرىم، ساعان ۇلكەن راحمەت، مەنى مىناۋ توبىرعا كۇلكى قىلمادىڭ. ومىردە ءالى دە مەيىرىمدى، يماندى جاندار بارىن دالەلدەدىڭ. «ونداي جاندار مىنا زاماندا جوق، سوڭعى موكيگان سياقتى وتكەن عاسىرلاردا ادا بولىپ كەتكەن. ەگەر ونداي ادامدى تاۋىپ بەرەر بولساڭ، وسى تۇرعان ءبارىمىز جابىلىپ ساعان ون جىلقى بەرەمىز. ال تابا الماساڭ، بار بايلىعىڭدى بىزگە بەرەسىڭ»،- دەپ قويماعان سوڭ سەرتتەسكەن جايىم بار ەدى.

مىناۋ بوتاداي بوزداپ جۇرگەن ادام وسى قالاداعى تەاتردىڭ اكتەرى. ءوز ءرولىن تامانا ويناپ شىقتى-اۋ دەيمىن. مەنى جەرگە قاراتپاعانىڭ ءۇشىن، الەمدە ءالى دە يماندى ادامدار بار ەكەنىن دالەلدەگەنىڭ ءۇشىن، تاۋىپ العان ءاميانىڭدى اقشاسىمەن قوسا ساعان بەردىم. بۇدان بولەك مىنا توبىردىڭ مەنەن جەڭىلگەندەرى ءۇشىن بەرەتىن ون جىلقىسىن دا ساعان بەردىم، - دەيدى.

قىزىق كورمەكشى بولىپ كەلگەن توبىردىڭ ەڭسەلەرى ءتۇسىپ كەتىپتى. وزدەرىنىڭ اراسىنان ءاميان تاۋىپ العان جىگىتتەي ادام شىققانىنا سەنبەيتىن سياقتى.

- مىناۋ قاتىگەز، دۇربەلەڭ، تەك قارا باسىنىڭ قامىن ويلايتىن، كومپيۋتەر باس زاماندا ءالى دە تازالىقتىڭ بار ەكەنىن دالەلدەگەن ادام دەگەن اتىڭنان اينالايىن، ءاميان تاۋىپ العان جىگىت، - دەدى ساليقالى جىگىت اعاسى تولقىپ تۇرىپ.

جانات باقىتتىڭ Facebook-تەگى پاراقشاسىنان

Abai.kz

0 پىكىر