جۇما, 29 ناۋرىز 2024
قۇيىلسىن كوشىڭ 8890 29 پىكىر 20 مامىر, 2018 ساعات 09:05

ءسۇيىنشى، شەكاراشىلار دەپورتاتسيالاعان جايناگۇل ەلگە ورالدى!

الماتى اۋەجايىنداعى شەكارالىق باقىلاۋ قىزمەتكەرلەرى «قىتاي ازاماتىسىڭ» دەپ، كەلگەن جەرىنە كەرى قايتارعان جايناگۇل ەلگە ورالدى! بۇگىن. امان-ەسەن ەكەن. جايناگۇل مىنگەن ىستامبۇل – الماتى باعىتىنداعى ۇشاق تاڭعى 04:45-تە اۋەجايعا كەلىپ قوندى. وسىدان 17 كۇن بۇرىن مىسىرداعى وقۋىن اياقتاپ، قازاقستانعا كەلگەندە، شەكاراشىلار شەتكە تەپكەن قانداسىمىزدى كۇتىپ الۋعا، 1 جارىم جاسار ءسابيى اقجولمەن بىرگە ءبىز دە باردىق.

جايناگۇل عاجاپقىزىنىڭ ۇلتى – قازاق. قىتاي ازاماتشاسى. قازاقستاندا ءجۇرىپ-تۇرۋعا بەرىلگەن ىقتيارحاتىنىڭ مەرزىمى 2021 جىلعا دەيىن جارامدى بولعان. كۇيەۋى نۇرسەيىت تولەگەن مەن ۇلى 1,5 جاسار اقجول نۇرسەيىتۇلى قازاقستان ازاماتى. جاس وتباسى مىسىردا ءبىلىم الىپ، وقۋلارىن اياقتاسىمەن قازاقستانعا كەلگەن. اۋەجايداعى شەكاراشىلار جايناگۇلدىڭ ىقتيارحاتىنىڭ جارامسىزدىعىن ايتىپ، سول كۇنى-اق، كەلگەن جاعىنا قايتارىپ جىبەرگەنىن ەلدەن بۇرىن Abai.kz اقپاراتتىق پورتالى جازعان ەدى.

بۇگىن اناسىن اسىعا كۇتكەن ءسابيدىڭ تىلەگى ورىندالدى. جايناگۇل امان-ەسەن جەتتى ەلگە.

ءبىز سول كۇنى، 3-مامىر كۇنى تاڭعى 03:20-دا اۋەجايدا بولعان وقيعانىڭ جاي-جاپسارىن، جالعاسىن جايناگۇلدىڭ وزىنەن سۇراپ بىلدىك.

جايناگۇل عاجاپقىزى:

- الماتىدان دۋبايعا جەتكەن سوڭ، سول جاقتان تۇركياعا ۇشتىم. تۇركيادا فازىل دەيتىن اعالاردىڭ قاسىندا تۇردىم. ول كىسىلەر مەنىڭ جاتىن ورنىمدى، تۇراقجايىمدى رەتتەپ بەردى. قۇجات رەتتەۋمەن، ارى-بەرى جۇرگەندە جول كورسەتىپ، جەتەتىن جەرىمە جەتكىزىپ، قولدارىنان كەلگەن بار كومەكتەرىن اياپ قالعان جوق.

تۇركياداعى اتقامىنەر ازاماتتار مەنى «قىتايدىڭ قازاعى» دەگەن سيپاتتان تىس، «تۇركيا قازاعى» دەگەن سيپات بەرىپ، كونسۋلگە الىپ باردى. جاعدايىمدى ايتىپ، ءتۇسىندىردى. سونداي-اق، ءماجىلىس دەپۋتاتى بەكبولات اعانىڭ تاپسىرۋىمەن، ول كىسىنىڭ كومەكشىسى ەردەن اعا قازاقستان ەلشىلىگىنە بارىپ، بارلىق جاعدايدى ءتۇسىندىرىپ، مەنىڭ ماسەلەمدى زاڭدى جولمەن، تەزىرەك شەشىپ بەرۋىن سۇرادى. ءسويتىپ، 1 اپتانىڭ ىشىندە ۆيزا الدىم.

اۋەجايداعى وقيعا تۋرالى ايتار بولسام، ءبىز مىسىردا وقىپ، تىكەلەي رەيس بولماعان سوڭ، دۋباي ارقىلى ۇشىپ كەلگەن ەدىك. ءاسىلى مەنىڭ ىقتيارحاتىمنىڭ مەرزىمى 2021 جىلعا دەيىن جارامدى بولعان. سوعان سەنىپ، ەش ۋايىمسىز كەلگەن ەدىم. ءارى زاڭ بويىنشا ىقتيارحاتى بار ادامعا ۆيزا بەرىلمەيدى دەگەن ەرەجە بولعان.

اۋەجايداعى شەكاراشىلار: «6 ايدا ءبىر تەكسەرتىپ تۇرماعاندىقتان ىقتيارحات كۇشىن جويعان. سوندىقتان ءسىز كەرى قايتارىلاسىز» دەپ، مەنى دۋبايعا قايتاردى. باسقا سەبەپتەرىن ايتپادى.

ءبىز الماتى اۋەجايىنا تىم بولماعاندا 1 تاۋلىك قالدىرا تۇرۋدى سۇرادىق.  ءتىپتى بولماسا جارتى تاۋلىك كۇتە تۇرۋىن وتىندىك. جارىق ءتۇسىپ، ەل جۇمىسقا شىققانشا اۋەجايدا قالساق دەدىك. شەكاراشىلار ول ءوتىنىشىمىزدى ورىنداعان جوق. مەن ەلدى ايىپتامايمىن. بۇل، سول قىزمەتكەردىڭ قاتەلىگى دەپ ويلايمىن.

شەكاراشىعا بىزگە ەشقانداي ەسكەرتۋ جاسالماعانىن، ىقتيارحاتتىڭ جارامسىز ەكەنىن بىلمەگەنىمىزدى ايتقان ەدىك، شەكارالىق باقىلاۋ قىزمەتكەرى، وزىمىزگە دۇرسە قويا بەردى. «نەگە ءوزىڭ زاڭدى وقىپ، ءبىلىپ جۇرمەيسىڭ؟» دەدى. راس، مەن كوشى-قون زاڭى وزگەرگەن، وزگەرمەگەنىن بىلگەن جوقپىن. مەنەن كەتكەن قاتەلىك وسى بولسا كەرەك.

كەيىن وسى «Abai.kz» سايتىندا جازىلعاننان كەيىن بىلدىك. اۋەلى ەسكەرتۋ بەرىلىپ، ەكىنشى جولى  ايىپپۇل سالىپ، ءۇشىنشى رەت ءتارتىپ بۇزعان جاعدايدا عانا ەلدەن شىعارۋ كەرەك ەكەن. ول جاعىنان ءبىز ساۋاتسىز بولدىق.

ءيا، ءبىز شەتەلدە تۇردىق، وقىدىق. كوپ جاعدايدان حابارسىزبىز. بىراق، ءدال وسىلاي، ەلىمە كەلگەندە ەسىكتەن كىرگىزبەي، قۇددى قىلمىسكەر سەكىلدى اۋەجايدا جارتى تاۋلىك تۇرعىزباي قۋىپ شىققانى ادام رەتىندە جانىما باتتى.

مەن ءتىپتى، سول كۇنى شەكارالىق تەكسەرۋدەن ءوتىپ تۇرعاندا اۋىرىپ، قۇلاپ قالدىم. دارىگەر كەلىپ تەكسەردى. «سەنىڭ اياعىڭ اۋىر. قاتتى قوبالجۋعا بولمايدى» دەپ ءدارى بەرىپ، سۋ بەرىپ جاتقاندا، شەكاراشىلار قاعازدى تولتىرىپ ۇلگەرگەن ەكەن.

مەنى دەرەۋ قايتارىپ جىبەردى. پاسپورتىمدى قولىما دا بەرگەن جوق. قۇددى قىلمىسكەر سەكىلدى دەپورتاتسيالادى. بىرەۋدى ولتىرگەن ادام سياقتى بولدىم. پاسپورتىمدى دۋبايدىڭ اۋەجايىندا تۇرعاندا دا قولىما بەرمەدى. ويتكەنى، شەكارادان قايتارىلعان دەگەننەن كەيىن، قانداي قىلمىسپەن قايتارىلعان دەپ، ولار دا قورىقتى. مەنى شەكارادان شىعىپ كەتە مە دەپ، باقىلاۋعا الدى.

سول دۋبايدىڭ اۋەجايىندا 23 ساعات تۇردىم.  مەن سول كۇنى ساعات 07:00 شاماسىندا اۋەجايعا كەلىپ ءتۇستىم. دۋبايداعىلار ماعان 16:00-گە دەيىن ۋاقىت بەردى. ايتپەسە مىسىرعا قايتارامىز دەدى. ويتكەنى مىسىردان كەلگەن ەدىم.  مەن: مىسىرداعى وقۋىم اياقتالعانىن، ول جەردەگى تىركەۋىمنىڭ ۋاقىتى بىتكەنىن، ولار كىرگىزبەيتىنىن ايتتىم.  «وندا قىتايعا جىبەرەمىز. سەبەبى، قىتاي ازاماتشاسىسىڭ» دەدى. ول جاقتا ەشكىمىم جوق ەكەنى ايتىپ، ۋاقىت سۇرادىم. ساعات 16:00-گە دەيىن ۋاقىت بەردى. وسى ۋاقىتقا دەيىن ۆيزا الماسام، قىتايعا دەپورتاتسيالايتىنىن ايتتى.

سول ارالىقتا ازاماتتار جۇگىرىپ ءجۇرىپ، تۇركياعا ەلەكتروندى ۆيزا الدىق. ساعات 15:45-تە ەلەكتروندى ۆيزا قولىما ءتيدى.  سوسىن عانا، پاسپورتىمدى بەرىپ، كەشكە دەيىن بيلەت الىپ، كەتۋىم كەرەكتىگىن ەسكەرتتى.  سۇراپ ءجۇرىپ، كەشكى 18:00-گە دەيىن بيلەت ساتىپ الدىم. ءسويتىپ، ۇشاق ۇشاتىن تاڭعى 06:00-گە دەيىن اۋەجايدا ءجۇردىم.  تۇركياعا 4-مامىر كۇنى 14:00 شاماسىندا جەتتىم.  مىنە، تۋرا 16 كۇن بولدىم وندا.  

بىرىنشىدەن، اللاعا سانسىز شۇكىر ايتامىن. جالعىزىن جاۋعا بەرمەگەن قازاعىم مەنى دە قاڭعىرتىپ قويمادى. مىنە، باس-اياعى 16 كۇندە ەلگە كەلدىم. الىپ كەلدى. مەنىڭ وتباسىمنىڭ تاعدىرىنا، مەنىڭ تاعدىرىما بەي-جاي قاراماي، اتسالىسىپ جۇگىرىپ ءجۇرىپ قۇجاتتارىمدى رەتتەپ بەرگەن اعالارىما العىسىم شەكسىز. سونىڭ ىشىندە، وزدەرىڭىزگە، بەكبولات، ەردەن اعالارعا، تۇركياداعى بارلىق اتقامىنەر ازاماتتارعا شەكسىز راحمەت ايتامىن.

نۇرسەيىت تولەگەنۇلى:

– مەنىڭ العىستان باسقا ايتارىم جوق. بۇگىن قاتتى قۋانىشتىمىن. ءبىزدىڭ وتباسىنىڭ باسىنا تۇسكەن قيىندىققا قولداۋ ءبىلدىرىپ، تىلەۋلەس بولعان بارلىق اعالارعا، قازاق حالقىنا راحمەت ايتامىن. اسىرەسە، ءبىرىنشى بولىپ كەلىپ، مەنىڭ وتباسىمنىڭ تاعدىرىنا بەي-جاي قاراماعان، سىزگە، «Abai.kz» سايتىنا، باسقا دا جۋرناليست باۋىرلارعا،  بەكبولات، ەردەن اعالارعا  العىس ايتامىن. سىزدەرگە اللانىڭ نۇرى جاۋسىن!

ەستەرىڭىزگە سالا كەتەيىك، جۋىردا «Abai.kz» اقپاراتتىق پورتالىندا «ماسقارا! الماتى اۋەجايى. شەكارالىق باقىلاۋ قىزمەتى جۇكتى ايەلدى كەرى قايتاردى» اتتى ماقالا جاريا بولدى. وندا نۇرسەيىت تولەگەنۇلى ەسىمدى قازاقستان ازاماتىنىڭ جۇكتى ايەلىن الماتى اۋەجايىنداعى شەكارالىق باقىلاۋ قىزمەتىنىڭ ەلدەن دەپورتاتسيالاعانى باياندالدى.

وقيعانىڭ قىسقاشا مازمۇنى بىلاي: 2 مامىر كۇنى تاڭعى 03:20 شاماسىندا نۇرسەيىت تولەگەنۇلى، ايەلى جايناگۇل عاجاپقىزى جانە 1,5 جاسار ۇلى مىسىردان الماتى اۋەجايىنا كەلىپ قونادى. جايناگۇل قحر ازاماتشاسى. قازاقستاندى ءجۇرىپ-تۇرۋى ءۇشىن بەرىلگەن ىقتيارحاتى بار. ىقتيارحاتتىڭ جارامدىلىق مەرزىمى 2021 جىلى اياقتالۋى ءتيىس بولعان. الايدا بۇلار قازاقستان اۋماعىندا 183 كۇننەن ارتىق ۋاقىت بولماعاندىقتان، جايناگۇلدىڭ ىقتيارحاتى اۆتوماتتى تۇردە جارامسىز دەپ تانىلعان. اۋەجايداعى شەكارا قىزمەتى سولاي دەپ تۇسىندىرگەن. وسىلايشا نۇرسەيىتتىڭ ءوزىن جانە 1,5 جاسار ۇلىن ەلدە قالدىرىپ، جۇكتى ايەلىن سول كۇنى مىسىرعا قايتارىپ جىبەرگەن. بۇل جايلى مىنا سىلتەمەدەن تولىق وقي الاسىزدار. http://abai.kz/post/69884

نۇرسەيىتتىڭ باسىنا تۇسكەن اۋىر جاعدايدى تولىق بايانداعان ماقالا «Abai.kz» اقپاراتتىق پورتالىندا جاريالاندى. ىلە-شالا بۇل ماسەلە قوعامدىق پىكىر تۋدىرىپ، باسقا دا اقپارات قۇرالدارى اتالعان ماقالانى كوشىرىپ باستى. اتاپ ايتساق، «qazaquni.kz»، «dalanews.kz»، «kaz.365info.kz»، «talqy.kz»، «minber.kz»، «adyrna.kz» سايتتارى نۇرسەيىتتىڭ ماسەلەسىن قوعام تالقىسىنا ۇسىندى.

ەندى سول تۋرالى جازايىق:

03.05.2018 جىل. ساع.20:07. Abai.kz : «ماسقارا! الماتى اۋەجايى. شەكارالىق باقىلاۋ قىزمەتى جۇكتى ايەلدى كەرى قايتاردى». 8150 وقىلىم. 69 پىكىر.

03.05.2018 جىل. اۆتورى – نۇرگەلدى ابدىعانيۇلى. . Abai.kz-كە سىلتەمە بەرگەن.  Qazaquni.kz:  «ماسقارا! اۋەجايدان جۇكتى ايەلدى كەرى قايتارعان شەكارالىق باقىلاۋ قىزمەتى ساۋاتسىز با، جاۋاپسىز با؟!.» 21390 وقىلىم. 8 پىكىر.

03.05.2018 جىل. اۆتورى – نۇرگەلدى ابدىعانيۇلى. . Abai.kz-كە سىلتەمە بەرگەن.  adyrna.kz: «ماسقارا! الماتى اۋەجايى. شەكارا قىزمەتى جۇكتى ايەلدى كەرى قايتاردى». 1122 وقىلىم.

03.05.2018 جىل. اۆتورى – نۇرگەلدى ابدىعانيۇلى. . Abai.kz-كە سىلتەمە بەرگەن.  minber.kz: «الماتى اۋەجايى: كەدەندىك باقىلاۋ قىزمەتى جۇكتى ايەلدى كەرى قايتاردى». 216 وقىلىم.

04.05.2018 جىل. ساع.10:18. kaz.365info.kz: «جىلاماشى، نۇرسەيىت… كەدەنشىلەر ونىڭ جۇكتى ايەلىن ەلدەن نەگە قۋادى؟». 277 وقىلىم.

04.05.2018 جىل. dalanews.kz: «ىقتيارحاتى جارامسىز». شەكارا قىزمەتى جۇكتى ايەلدى كەرى قايتاردى». 2047 وقىلىم.

04.05.2018 جىل. talqy.kz: «شىرىلداپ جىلاپ 1,5 جاستاعى ۇلى قالدى».

سونداي-اق، بۇل ماسەلەگە الەۋمەتتىك جەلى قولدانۋشىلارى دا ءۇن قوسىپ، تالقى جاسادى. ماتەريالدى بولىسكەن جۇرتتىڭ قاراسى كوپ.

ءبىز «ماسقارا! الماتى اۋەجايى. شەكارالىق باقىلاۋ قىزمەتى جۇكتى ايەلدى كەرى قايتاردى» اتتى ماقالامىزدى جازۋ بارىسىندا الماتى حالىقارالىق اۋەجايىندا ورنالاسقان كەدەن قىزمەتىنە حابارلاستىق. اۋەجايداعى كەدەندىك قىزمەت مامانى ەرمەك بولاتبەكۇلى دەگەن ازامات، بۇل ىسكە كەدەن قىزمەتىنىڭ قاتىسى جوق ەكەنىن ايتتى.

«بۇل ىسكە كەدەن قىزمەتىنىڭ تۇك قاتىسى جوق. جەكەلەگەن ادامدارمەن اينالىسپايمىز. ول كىسى شەكارالىق تەكسەرىستەن ءوتۋ كەزىندە ۇستالعان عوي. شەكارا قىزمەتكەرلەرى ادامداردىڭ قۇجاتتارىن تەكسەرەدى. سولار بىلەدى بۇل ءىستىڭ ءمان-جايىن»، - دەپ جاۋاپ قايىردى.

ەرمەك بولاتبەكۇلى ۇسىنعان كونتاكتى بويىنشا الماتى اۋەجايىنداعى شەكارا قىزمەتىنە حابارلاستىق. تەلەفون تۇتقاسىن ورىس تىلىندە سويلەيتىن ءبىر كەلىنشەك كوتەردى. اۋەجايدىڭ شەكارا قىزمەتى تەلەفون ارقىلى كەڭەس، اقپارات بەرمەيتىنىن ايتتى.

«ءبىز تەلەفون ارقىلى اقپارات نەمەسە كەڭەس بەرمەيمىز. ءبىز 24 ساعات بويى جۇمىس جاسايمىز. الماتى حالىقارالىق اۋەجايىنىڭ 2 قاباتىنداعى حالقارالىق ۇشۋ بەكەتىندە ورنالاسقانبىز. سول جەرگە كەلىپ، وزىڭىزگە كەرەك تىلدە اقپارات الا الاسىز»، - دەپ قىسقا قايىردى.

سودان، اۋەجايدىڭ شەكارالىق باقىلاۋ قىزمەتىنە باردىق. ونداعىلار جايناگۇلدى كەرى قايتارعان شەكاراشىلار جۇمىس اۋىسىمىن تاپسىرىپ كەتكەنىن ايتتى. دەگەنمەن، ءبىز تالاپ قويدىق. اتى-ءجونىن جاريالاۋدان ءۇزىلدى-كەسىلدى باس تارتقان شەكارالىق باقىلاۋ قىزمەتىنىڭ مامانى كومپيۋتەر بازاسىنان بولعان جايدى انىقتاپ، بىزگە ىقتيارحاتتىڭ جارامسىزدىعىنان كەرى قايتارىلعانىن، رەسمي تۇسىنىكتەمە نەمەسە پىكىر بەرە المايتىنىن ايتتى.

جايناگۇلدى ەلدەن دەپورتاتسيالاۋدىڭ دۇرىس-بۇرىستىعىن ءبىلۋ ءۇشىن ءبىراز ەستىكتىڭ تابالدىرىعىن توزدىردىق

اقىرى مىنە، جايناگۇل امان-ساۋ ەلگە ورالدى. ەندى جايناگۇل عاجاپقىزى قازاقستان ازاماتتىعىن الۋدى جوسپارلاپ وتىرعانىن ايتادى.

نۇرگەلدى ابدىعانيۇلى

Abai.kz

29 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1571
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3565