ەلباسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى رەتتەۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا جاريا تۇردە قول قويدى، دەپ حابارلايدى اقوردانىڭ رەسمي سايتى.

زاڭعا جاريا تۇردە قول قويۋ راسىمىندە سويلەگەن سوزىندە مەملەكەت باسشىسى تاۋەلسىزدىك جىلدارى قازاقستاندا نارىقتىق ەكونوميكانىڭ بەرىك ينستيتۋتسيونالدىق نەگىزدەرى قالىپتاسقانىن ايتتى.

– جەكە باستاما مەن ەركىن كاسىپكەرلىك ەلىمىزدىڭ ەكونوميكالىق دامۋىنىڭ جانە ءال-اۋقاتىمىزدىڭ ارتۋىنىڭ باستى فاكتورىنا اينالدى. ءبىزدىڭ رەفورمالارىمىزدىڭ تابىستىلىعى مەن تيىمدىلىگىنىڭ جارقىن مىسالى رەتىندە استانانى ايتۋعا بولادى. ونىڭ 20 جىلدىق مەرەيتويىن بۇكىل قازاقستان اتاپ وتۋدە، – دەدى نۇرسۇلتان نازارباەۆ.

قازاقستان پرەزيدەنتى قول قويىلاتىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى رەتتەۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ ماڭىزدىلىعىن ەرەكشە اتاپ ءوتتى.

– ەنگىزىلىپ وتىرعان وزگەرىستەردىڭ باستى ماقساتى – بيزنەستى رەتتەۋ سالاسىنداعى زاڭنامانى جەتىلدىرە ءتۇسۋ. زاڭدا مەملەكەتتىك باقىلاۋ فۋنكتسيالارىن شامامەن 30 پايىزعا قىسقارتۋ كوزدەلىپ وتىر. قۇقىق بۇزۋشىلىقتىڭ الدىن الاتىن پروفيلاكتيكالىق باقىلاۋ ينستيتۋتىنا باسا ءمان بەرىلگەن. تابيعي مونوپوليالار مەن كۆازيمەملەكەتتىك سەكتور تاراپىنان كورسەتىلەتىن قىزمەتتەر رەتتەلەدى، – دەدى ەلباسى.

سونىمەن قاتار مەملەكەت باسشىسى بيزنەس شىعىندارىن جاپپاي تومەندەتۋ ءۇشىن زاڭدا قاراستىرىلعان شارالار جونىندە جانە باسەكەگە كەدەرگى كەلتىرەتىن نورمالاردىڭ الىنىپ تاستالعانى تۋرالى ايتتى.

– وسى زاڭ ارقىلى 14 كودەكس پەن 109 زاڭعا شامامەن 1 مىڭعا جۋىق وزگەرىس ەنگىزىلىپ وتىر. وسى وزگەرىستەردىڭ ءبارىنىڭ دىتتەگەن ماقساتى بيزنەستى دامىتۋ ءۇشىن مەيلىنشە قولايلى جاعداي قالىپتاستىرۋ جونىندەگى مەملەكەتتىڭ باستى ستراتەگيالىق باعىتىنا تولىق ساي كەلىپ وتىر. قازىرگى ۋاقىتتا ىسكەرلىك بەلسەندىلىكتى كۇشەيتۋ جانە جۇرتشىلىقتى كاسىپكەرلىكپەن اينالىسۋعا تارتۋ ءۇشىن بارلىق مۇمكىندىكتى پايدالانۋ اسا ماڭىزدى، – دەدى نۇرسۇلتان نازارباەۆ.

ءسوز سوڭىندا قازاقستان پرەزيدەنتى بۇگىندە جۇزەگە اسىرىلىپ جاتقان «بەس الەۋمەتتىك باستاما» شاعىن جانە ورتا بيزنەس ءۇشىن زور مۇمكىندىك تۋعىزىپ وتىرعانىن اتاپ ءوتىپ، وسى زاڭنىڭ قابىلدانۋى حالقىمىزدىڭ يگىلىگى جولىندا ەلدەگى كاسىپكەرلىك قىزمەتتى جانداندىرۋعا تىڭ سەرپىن بەرەتىنىنە سەنىم ءبىلدىردى.

Abai.kz