قازاقستان تۇرعىندارى 2018 جىلدىڭ سوڭىنا دەيىن ءموبيلدى تەلەفوندارىنىڭ IMEI-كودىن تىركەتۋ كەرەك. بولماسا، بايلانىسسىز قالادى. قازاقستانداعى ۇيالى وپەراتورلار بايلانىسى تۇتىنۋشىلارىنا ەسكەرتۋ سمس-تەرىن جىبەرىپ جاتىر. وندا 2019 جىلدىڭ قاڭتارىنان باستاپ تەلەفون كودى تىركەلمەگەن تۇتىنۋشىلاردىڭ بايلانىسىن ۇزەتىنىن ەسكەرتكەن.

IMEI كود – بۇل تەلەفوننىڭ بىرەگەي يدەنتيفيكاتسيالىق كودى. ونى زاۋىتتا وندىرۋشىلەر مەنشىكتەيدى، بۇل تەلەفون جەلىگە قوسىلعان كەزدە وپەراتورعا بايلانىس بەرىپ تۇرادى.

قازاقستان بيلىگى قوسىمشا تىركەۋدىڭ قاجەتتىگىن ەلدە تەلەفون ۇرلاۋ وقيعالارىنىڭ كوبەيگەنىمەن تۇسىندىرەدى. قىلمىستىڭ اشىلۋى - نەبارى 5 پايىز.

ء"بىز قازاقستاندا ءموبيلدى تەلەفونداردى ۇرلاۋدى ءتيىمسىز ەتەمىز. كود تىركەلگەن جاعدايدا، تەلەفون باسقا سيم-كارتامەن جۇمىس ىستەمەيتىن بولادى", – دەيدى قازاقستاننىڭ اقپارات جانە بايلانىس ءمينيسترى داۋرەن اباەۆ.

Abai.kz