جۇما, 16 قاراشا 2018
622 0 پىكىر 11 ماۋسىم, 2018 ساعات 10:33

تۇركىمەنستان پرەزيدەنتى 600 تۇتقىندى تۇرمەدەن بوساتتى

تۇركىمەنستان پرەزيدەنتى گۋربانگۋلى بەردىمۇحامەدوۆ رامازان ايىنداعى "گادىر گيجەسي" (قادىر ءتۇنى) قۇرمەتىنە 600 سوتتالۋشىعا راقىمشىلىق جاساعان.

بەردىمۇحامەدوۆ راقىمشىلىق جاساۋ تۋرالى بۇيرىققا 8 ماۋسىمدا قول قويعان.

ازاتلىك راديوسى دەرەككوزىنىڭ حابارلاۋىنشا، پرەزيدەنت راقىمشىلىعى جالپى ءۇش مىڭ ادامدى قامتيدى. ونىڭ ىشىندە تۇرىكتىڭ ءدىني ۋاعىزشىسى فەتحۋللاح گيۋلەنگە قاتىسى بار، "گۇلەنشىلەر" دەگەن اتپەن تانىمال «حيزمەت» قوزعالىسىنىڭ مۇشەلەرى بولدى دەگەن ايىپپەن ۇزاق مەرزىمگە سوتتالعان ازاماتتار دا بار. بىراق ولاردىڭ ناقتى سانى بەلگىسىز. كەيبىر دەرەكتەرگە قاراعاندا، 2016 جىلدىڭ قازان ايىندا تۇرىك وپپوزيتسياسىنا قاتىسى بار دەپ 30-دان استام ادام سوتتالعان. ەندى ءبىر مالىمەت بويىنشا، 50 ادام تۇرمەدە وتىر.

ورتالىق ازيا ەلدەرى اراسىندا ادام سانىنا شاققاندا ەڭ كوپ تۇتقىن تۇركىمەنستاندا. بىراق سوڭعى جىلدارى گۋربانگۋلى بەردىمۇحامەدوۆ راقىمشىلىق جاساۋدى داستۇرگە اينالدىرىپ كەلەدى. سوڭعى رەت بيىل ناۋرىز مەرەكەسى قارساڭىندا امنيستيا جاريالادى.

Abai.kz

0 پىكىر