سارسەنبى, 14 قاراشا 2018
1118 1 پىكىر 13 ماۋسىم, 2018 ساعات 11:43

قىرعىزستاندا التىن كەنىن جابۋدى تالاپ ەتكەن ميتينگ ءوتتى

قىرعىزستاننىڭ جالال-اباد وبلىسى الا-بۋكا اۋدانىنداعى يشتامبەردي كەنىن جابۋدى تالاپ ەتكەن ميتينگ ءوتتى. بۇل جونىندە الا-بۋكا اۋدانىنىڭ اكىمى ەميلبەك ابدىكادىر مالىمدەدى.

ونىڭ سوزىنشە، كوتەرىلگەن حالىق جالال-اباد وبلىسىنداعى ۇكىمەت وكىلى كىيانبەك ساتىبالديەۆپەن كەزدەسكەن.

جەرگىلىكتى تۇرعىن بەكجان ستانبەكوۆتىڭ حابارلاۋىنشا، ميتينگكە شىققان 200-300 ادام كومپانيانىڭ زاڭسىز جۇمىس ىستەپ جاتقانىن مالىمدەگەن. ولار كومپانيا قورشاعان ورتاعا ەكولوگيالىق زيان كەلتىرىپ جاتىر دەپ تۇرعىندارعا وتەماقى تولەۋدى تالاپ ەتكەن.

نارازى حالىق ءبىزدىڭ تالابىمىز بيلىككە جەتپەي جاتىر دەيدى. ۇكىمەت وكىلى ساتىبالديەۆ بولسا، بىشكەكتەن ارنايى ماماندار كەلىپ، حالىقپەن كەزدەسەدى دەپ ۋادە بەردى.

بۇل التىن شىعاراتىن كەندە «فۋلد گولد ماينينگ» قىتاي كومپانياسى جۇمىس ىستەيدى. كومپانيا بەس مىڭ حالقى بار اۋىلدىڭ 600 ادامىن جۇمىسقا تارتقان.

11 ساۋىردە جالال-ابادتىڭ توگۋز-تورو اۋدانىندا "جي ەل ماكمال دەۆەلوپينگ" كومپانياسىنا قارسى جەرگىلىكتى تۇرعىندار باس كوتەرگەن. ول كەزدە نارازىلىق سوڭى تارتىپسىزدىككە ۇلاسىپ، كومپانيا عيماراتى ورتەنىپ، ميليتسيا قىزمەتكەرلەرىنىڭ سوققىعا جىعىلعانى حابارلانعان.

بۇل بويىنشا قىلمىستىق ءىس قوزعالىپ، ميتينگكە شىققانداردىڭ ىشىنەن 15 ادام قامالعان.

Abai.kz

1 پىكىر