سەنبى, 8 تامىز 2020
COVID-19 قازاقستاندا. جۇقتىرعاندار — 96922. جازىلعاندار — 70680. قايتىس بولعاندار — 1058
1670 21 پىكىر 1 شىلدە, 2018 ساعات 00:20

ەلباسى استانانىڭ «جاسىل بەلدەۋىنىڭ» نىساندارىن ارالاپ كوردى

مەملەكەت باسشىسى ەلوردا كۇنى قارساڭىندا ءداستۇرلى تۇردە استانانىڭ «جاسىل بەلدەۋىن» تىكۇشاقپەن ارالاپ، ونىڭ دامۋ بارىسىمەن تانىستى.

نۇرسۇلتان نازارباەۆ «جاسىل ەل» جاستار جاساعىنىڭ وكىلدەرىمەن بىرگە ەلوردانىڭ جاسىل ايماعىنا اعاش وتىرعىزىپ، تابيعاتقا 150 قىرعاۋىل ۇشىرۋ شاراسىنا قاتىستى.

قازاقستان پرەزيدەنتى جاستارمەن اڭگىمەلەسۋ بارىسىندا «جاسىل بەلدەۋ» ەلوردانى شاڭدى داۋىل مەن قارلى بوراننان قورعاۋ ءۇشىن تابيعي توسقاۋىل رەتىندە جاسالعانىن ەسكە سالدى.

– ورمان – ناعىز تابيعي بايلىق ءارى قولايلى تىرشىلىك ورتاسىن ساقتاۋدىڭ ماڭىزدى تەتىگى. ورمان-توعاي قالاداعى اۋانى تازارتىپ، اۋا-رايىن جۇمسارتۋعا سەپتىگىن تيگىزەدى، – دەدى ەلباسى.

سونىمەن قاتار، مەملەكەت باسشىسى استانانىڭ «جاسىل بەلدەۋىنىڭ» قازىرگى جاعدايى مەن ونى ءارى قاراي دامىتۋ ماسەلەلەرى جونىندە كەڭەس وتكىزدى.

جيىنعا پرەزيدەنت اكىمشىلىگىنىڭ باسشىسى ءا.جاقسىبەكوۆ، پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ءو.شوكەەۆ، استانا قالاسىنىڭ اكىمى ءا.يسەكەشەۆ جانە اقمولا وبلىسىنىڭ اكىمى م.مىرزالين قاتىستى.

قازاقستان پرەزيدەنتى 20 جىل ىشىندە استانا توڭىرەگىندە تابيعات پەن قالا كەلبەتى ۇندەستىك تاپقان بىرەگەي ەكوجۇيە قالىپتاسقانىن اتاپ ءوتتى.

– قالا ىشىندەگى «جاسىل بەلدەۋدىڭ» اۋماعى شامامەن 15 مىڭ گەكتاردى قامتيدى. ەلوردانىڭ ۇلگىسىمەن بۇكىل قازاقستاندا اعاش وتىرعىزۋ قارقىنىن ارتتىرعان ءجون، – دەدى نۇرسۇلتان نازارباەۆ.

نۇرسۇلتان نازارباەۆ «جاسىل بەلدەۋدىڭ» جانە «شورتاندى-بۋراباي» شيپاجاي ايماعىنىڭ ورمان-توعايلارىن قوسۋ جونىندەگى اۋقىمدى جۇمىس الداعى جىلدارى جالعاساتىنىن ايتتى. اتاپ ايتقاندا، استانا-قاراعاندى جانە استانا-شورتاندى تاس جولدارىنىڭ بويىنداعى ءبىر مىڭ گەكتاردان استام جەرگە اعاش وتىرعىزىلاتىن بولادى.

جيىن بارىسىندا اۋىل شارۋاشىلىعى ۆيتسە-ءمينيسترى ە.نىسانباەۆ نۇرسۇلتان نازارباەۆقا 1997 جىلدان بەرى اعاش وتىرعىزىلعان اۋماقتىڭ جالپى كولەمى 83 مىڭ گەكتاردان اسقانى، سونىڭ ىشىندە بيىل ورمان القابى 5,5 مىڭ گەكتار جەرگە كوبەيگەنى جونىندە باياندادى.

وسىمدىك قورعاۋ جانە كارانتين عىلىمي-زەرتتەۋ ينستيتۋتىنىڭ ديرەكتورى ا.ساعيتوۆ ورماندى زيانكەستەردەن قورعاۋ جانە وتىرعىزىلعان اعاشتار تامىرلانىپ كەتۋ ءۇشىن قابىلدانىپ جاتقان شارالار جونىندە ايتتى.

كەڭەس قورىتىندىسى بويىنشا مەملەكەت باسشىسى اۋىل شارۋاشىلىعى مينيسترلىگىنە، سونداي-اق استانا جانە اقمولا وبلىسى اكىمدىكتەرىنە ەلوردا تۇرعىندارى مەن قوناقتارىنىڭ دەمالىس ورىندارىن ۇيىمداستىرۋ ءۇشىن جاسىل ايماقتى ودان ءارى دامىتۋ جانە ورمان القابىن پايدالانۋ جونىندە بىرقاتار ناقتى تاپسىرما بەردى.

Abai.kz

21 پىكىر