قازاقستان پرەزيدەنتىنىڭ ءباسپاسوز حاتشىسى ايدوس ۇكىباي قازاقپارات تىلشىسىنە بەلگىلى سپورتشى دەنيس تەننىڭ قازاسىن ەلباسىنىڭ قالاي قابىلداعانى تۋرالى ايتىپ بەردى.

ونىڭ ايتۋىنشا، نۇرسۇلتان نازارباەۆ دەرەۋ باس پروكۋرور مەن ىشكى ىستەر مينيسترىنە سپورتشىنىڭ قازاسى تۋرالى قىلمىستىق ءىستى ەرەكشە باقىلاۋعا الۋدى تاپسىرعان بولاتىن.

«مەملەكەت باسشىسى جاس ءارى تالانتتى، قازاقستان مەن الەمنىڭ سۇيىسپەنشىلىگىنە بولەنىپ ۇلگەرگەن، بولاشاعىنان زور ءۇمىت كۇتتىرگەن دەنيس تەننىڭ باقيلىق بولۋىن اۋىر قايعىمەن جانە زور كۇيزەلىسپەن قابىلدادى. پرەزيدەنت قازاقستاندا مانەرلەپ سىرعاناۋدىڭ نەگىزىن قالاعان جانە ەلىمىزدەگى سپورتتىڭ دامۋىنا زور ۇلەس قوسقان دەنيستىڭ جاقىندارى مەن تۋىستارىنا كوڭىل ايتۋ جەدەلحاتىن جىبەردى»، - دەدى ايدوس ۇكىباي.

سونىمەن بىرگە، نۇرسۇلتان نازارباەۆ جاستارعا ۇلگى بولا بىلگەن تاماشا ۇلدى، ءوز ەلىنىڭ ناعىز پاتريوتىن تاربيەلەپ وسىرگەن دەنيس تەننىڭ اتا-اناسىنا قوڭىراۋ شالىپ، كوڭىل ايتقان.

«مەملەكەت باسشىسى دەنيستىڭ مەزگىلسىز دۇنيەدەن ءوتۋى - جاقىندارى مەن تۋىستارى ءۇشىن عانا ەمەس، تۇتاس مەملەكەت ءۇشىن ورنى تولماس قازا ەكەنىن جەتكىزدى. مانەرلەپ سىرعاناۋشىنىڭ اتا-اناسىنا كوڭىل ايتا وتىرىپ، پرەزيدەنت قىلمىسكەرلەردىڭ جازاسىز قالمايتىنىن باسا ايتتى»، - دەدى ەلباسىنىڭ ءباسپاسوز حاتشىسى ايدوس ۇكىباي.

Abai.kz