سەمەنوۆانىڭ سوزىنە قاراعاندا، ول راقىمشىلىق تۋرالى ءوتىنىش جازۋدان باس تارتىپ وتىر. ونىڭ ۇستىنە، اتابەك 17 شىلدەدە تۇرمە جازاسىنىڭ ۇشتەن ەكىسىن وتەگەن، سونىڭ نەگىزىندە ول ۋاقىتىنان بۇرىن بوستاندىققا شىعۋعا ءوتىنىش تۇسىرۋىنە بولادى. 65 جاستاعى ارون اتابەك تۇرمەدە ءشىرۋى مۇمكىن ەكەنىن تۇسىنەدى، بىراق ونى بۇل ماسەلە قاتتى الاڭداتپايدى، دەدى سەميونوۆا.

ارون اتابەكتى قولجازبالارىنىڭ تاعدىرى ودان بەتەر تولعاندىرادى. تۇرمەدە جازعان ولەڭدەرىن ول ايەلىنە، ادام قۇقىعىن قورعاۋشى باقىتجان تورەعوجيناعا جانە دوسى - سازگەر باحتيار امانجولعا بەرگەن.

اتابەك ءوزىنىڭ قولجازبالارىنا "تۋعان بالاسىنداي" قارايدى، دەدى ادام قۇقىعىن قورعاۋشى. ول سەمەنوۆاعا تاعى ءۇش ولەڭىن بەرگەن، بىراق تۇرمە اكىمشىلىگى ولاردى الىپ قويىپ، تسەنزۋرادان وتكەندە عانا قايتارىلاتىنىن ەسكەرتكەن.

ارون اتابەك بيىل اقپاراتتىق ۆاكۋمدا قالعانىن ايتقان. اقىننىڭ 65 جاسقا تولۋىمەن ادام قۇقىعىن قورعاۋشى ەۆگەني ءجوۆتيستىڭ عانا قۇتتىقتاۋىن العان. حات وعان جەتپەيدى. وعان تەلەۆيزور كورۋگە رۇقسات ەتپەيدى. بۇعان قوسا اتابەكتىڭ كيىمى ابدەن توزعان، دەدى سەمەنوۆا.

2015 جىلى 16 جەلتوقساندا لوندوندا ارون اتابەكتىڭ ولەڭدەر جيناعى اعىلشىن تىلىندە Re-Zona-Nce دەگەن اتاۋمەن باسىلىپ شىقتى. وعان اقىننىڭ "رە-زونا-نس" تسيكلىنداعى ولەڭدەرى ەندى. 2010 جىلى ارون اتابەككە Freedom to Create سىيلىعى "تۇرمەدەگى شىعارماشىلىق يەسى" نوميناتسياسى بويىنشا تابىس ەتىلدى. اتابەكتىڭ ءوزىڭ تۇرمەدە وتىرعاندىقتان، سىيلىقتى 2010 جىلى قاراشادا كايردە ونىڭ تۋىستارى الدى.

65 جاستاعى ارون اتابەك - "شاڭىراق وقيعاسى" بويىنشا ۇزاق مەرزىمدەرگە سوتتالعان تورتەۋدىڭ ەڭ ۇلكەنى. ونى 2006 جىلى 14 شىلدەدە پوليتسيا قىزمەتكەرىنىڭ ولىمىنە اكەپ سوقتىرعان جاپپاي تارتىپسىزدىككە قاتىسقانى ءۇشىن سوتتادى. 18 جىلدىق جازانى ول پاۆلودارداعى تۇرمەدە وتەپ جاتىر.

Abai.kz