الماتى وبلىسىنىڭ تالعار اۋدانىنا قاراستى جاڭالىق اۋىلىنىڭ تۇرعىنى مۇرات بايقوجاەۆ اۋلاسىندا سۋ قۇبىرىن قازىپ ءجۇرىپ ادام سۇيەكتەرىن تاپقان. بۇل سۇيەكتەر شامامامەن 1937-1938 جىلدارداعى رەپرەسسيا قۇرباندارىنا تيەسىلى بولۋى مۇمكىن، - دەپ جازادى rsc05.kz سايتى. 

قازبا جۇمىستارى كەزىندە ادام سۇيەكتەرىمەن قاتار، كيىم جانە باسقا زاتتار دا تابىلعان. جارتى عاسىردان استام ۋاقىتتان بەرى ساقتالعان بۇل ادام سۇيەكتەرىندە وقتان قالعان تەسىكتەر بار ەكەن. ال، اۋىل تۇرعىندارىنىڭ ايتۋىنشا، زاتتاردىڭ اراسىنان ءىلياس جانسۇگىروۆتىڭ كوزىلدىرىگى دە تابىلعان.

ء“بىز بۇل كوزىلدىرىكتى ءىلياس جانسۇگىروۆتىڭ فوتوسۋرەتتەرىمەن سالىستىردىق. ولار وتە ۇقساس. ارينە، مۇقيات ەكسپەرتيزا جاساۋ كەرەك. بىراق بۇل سول كىسىگە تيەسىلى بولۋى مۇمكىن. بۇل جەردە ءبىزدىڭ وتكەن عاسىرداعى ينتەلليگەنتسيا وكىلدەرى جەرلەنگەن. جانە مۇندا قازاق ادەبيەتىنىڭ ۇلى كلاسسيكتەرىنىڭ  زاتتارى بار”، - دەيدى مۇرات.

ارحەولوگتار بۇل بولجامنىڭ دۇرىس ەكەنىن ايتادى. بىراق، مۇقيات مەديتسينالىق تەكسەرىس قاجەت. قازىر مۇندا قۇرىلىس جۇمىستارى ۋاقىتشا توقتاتىلعان. بۇدان ءارى قازبا جۇمىستارىن ارنايى كوميسسيا جاسايدى.

ەستەرىڭىزگە سالا كەتەيىك، بۇل جاڭالىق اۋىلىنداعى العاشقى جاعداي ەمەس. بۇل اۋىلدىڭ ءوزى سول كەزەڭدە ساياسي قۋعىن-سۇرگىن قۇرباندارىن جەرلەۋ ورنى بولعان. ءتۇرلى دەرەك كوزدەرىنە سايكەس، مۇندا 4,5 مىڭنان استام ادام جەرلەنگەن. بۇل ەلىمىزدەگى ەڭ ءىرى زيرات بولىپ سانالادى.

قازىر اۋىلدا اشارشىلىق جانە ساياسي قۋعىن-سۇرگىن قۇرباندارىنا ارنالعان ەسكەرتكىش بار.

نۇربيكە بەكسۇلتانقىزى

  Abai.kz