بەيسەنبى, 20 قىركۇيەك 2018
اباي-اقپارات 282 0 پىكىر 27 شىلدە, 2018 ساعات 14:33

الماتىنىڭ كەيبىر كوشەلەرىندە بىرجاقتى كولىك قوزعالىسى بولادى

شاھاردىڭ ورتالىق كوشە­لەرىنىڭ ءبىرشاماسىندا كولىك قوزعالىسى بىرجاقتى بولادى. ۇستىمىزدەگى جىلدىڭ تامىز ايىنىڭ 5-ىنە دەيىن ولاردىڭ سانى تاعى دا ارتپاق.

ايكەرىم رايىسقىزى

بۇگىندە بىرجاقتى قوزعالىس جامبىل، ماقاتاەۆ، مۇراتباەۆ، قاراساي باتىر، قابانباي باتىر جانە بوگەنباي باتىر كوشەلەرىندە جۇزەگە اسىپ وتىر. ءۇستى­مىزدەگى اپتانىڭ سوڭىنا دەيىن ولاردىڭ قاتا­رىنا گوگول مەن ءشارىپوۆ كوشەلەرى قوسىلاتىن بولادى.

بىرجاقتى كولىك قوزعالىسى ماقاتاەۆ كوشەسىمەن قالداياقوۆتان مۇقانوۆ كوشەسىنە دەيىن باتىس باعىتتا، گوگول كوشەسىمەن اۋەزوۆتەن قالداياقوۆقا دەيىن شىعىس باعىتتا بولادى. ال بوگەن­باي باتىر كوشەسىمەن باتىس باعىتتا ماسانشىدان روزىباقيەۆقا دەيىن، جامبىل كوشەسىمەن شىعىس باعىتتا روزىباقيەۆتان ماسانشى كوشەسىنە دەيىن جۇرەدى. قاراساي باتىر كوشەسىمەن باتىس باعىتتا ماسانشىدان روزىبا­كيەۆقا دەيىن، جامبىل كوشەسىمەن شىعىس باعىتتا روزىباقيەۆتان ماسانشىعا دەيىن بولسا، مۇراتباەۆ كوشەسىمەن رايىمبەك داڭعىلىنان شەۆچەنكو كوشە­سىنە دەيىن وڭتۇستىك باعىتتا، ءشارىپوۆ كوشەسىمەن اباي داڭعىلىنان ماقاتاەۆ كوشەسىنە دەيىن سولتۇستىك باعىتتا ورىن الادى.

اتالعان باعىتتاردىڭ بىرجاقتى قوزعالىستا بولۋى قاقتىعىستاردى 50 پايىزعا تومەندەتىپ، قالانىڭ ماگيس­ترالدى كوشەلەرىندەگى كولىك كەپتەلىسىن ازايتادى دەپ كۇتىلۋدە. سوعان ساي كولىك­تەردىڭ ورتاشا جىلدامدىعى  12 شاق./ساع. بولىپ، ايماقتى ءجۇرىپ ءوتۋ ۋاقىتى ورتا ەسەپپەن 17 پايىزعا قىسقاراتىن بولادى.

سونداي-اق، گوگول، ماقاتاەۆ، قابان­­باي باتىر كوشەلەرىندە قوعامدىق كولىكتەرگە ارنايى جولاق سىزىلىپ، ولاردىڭ كەدەرگىسىز جۇرۋىنە جاعداي جاسالادى. جول قوزعالىسىنىڭ جاڭا سىزباسى كەلەسى ايدىڭ 5-ىنەن باستاپ ەنگىزىلەدى. ەستەرىڭىزگە سالا كەتەيىك، بىرجاقتى كولىك قوزعالىسى بىلتىر شەۆچەنكو مەن قۇرمانعازى كوشەلەرىنە ەنگىزىلگەن بولاتىن.

مۇنداي وزگەرىستەر الەمدەگى ءىرى قالالاردىڭ كوپشىلىگىندە بار. ماسەلەن، بارسەلونادا، فرانكفۋرتتە، ميلاندا، جەنەۆا مەن پراگا قالالارىنىڭ ورتا­لىق ايماقتارىندا بىرجاقتى قوزعالاتىن كوشەلەر جەلىسى قالىپتاسقان. اتالعان شاھارلارداعى كولىك قوزعالىسىنىڭ جىلدامدىعى دا تومەن. وسى رەتتە اقش-تا جاسالعان زەرتتەۋ ناتيجەسى كولىك­تەردىڭ بىرجاقتى قوزعالىسى كولىك قوزعا­لىسىن 10—30 پايىزعا ارتتىراتىنىن جانە كولىك جىلدامدىعىن ورتاشا دەڭ­گەيگە كوتەرەتىنىن كورسەتكەنىن ايتا كەتەيىك. سوعان ساي جولدارداعى كولىك كەپتەلەسى ازايىپ، جول ءجۇرۋ ۋاقىتى 20—60 پايىزعا ازايادى ەكەن.

قالالىقتار قاپەرىنە!

باعىتىڭىزدى بەلگىلەپ الىڭىز

BRT جەلىسى بويىنشا تيميريازەۆ كوشەسىندە قايتا قۇرۋ جۇمىستارىنىڭ جۇرۋىنە بايلانىستى 2018 جىلعى 28 شىلدە مەن 15 قىركۇيەك ارالىعىندا بايتۇرسىنوۆ كوشەسىنەن روزىباقيەۆ كوشەسىنە دەيىن اۆتوكولىك قوزعالىسى قيىندايتىنىن حابارلايمىز. باعىتتارىڭىزدى الدىن-الا بەلگىلەپ الۋلارىڭىزدى سۇرايمىز.

0 پىكىر