سارسەنبى, 14 قاراشا 2018
ساڭلاق 1419 3 پىكىر 16 تامىز, 2018 ساعات 14:08

قىتاي قۇراماسىندا ءۇش قازاق سپورتشى ونەر كورسەتەدى

ءتورت جىلدا ءبىر وتەتىن جازعى ازيا ويىندارى سارى قۇرلىقتىڭ ەڭ باستى سپورتتىق باسەكەسى سانالادى. وسى ءدۇبىرلى دودا بيىل دجاكارتا تورىندە جالاۋىن جەلبىرەتپەك.

كىشى وليمپيادا سانالاتىن ازيا ويىندارىنا قاتىسىپ، ءوز ەلىنىڭ نامىسىن قورعاۋ كەز-كەلگەن سپورتشىنىڭ ارمانى. الايدا، كەيبىر قازاق ۇلاندارى وزگە ەلدىڭ اتىنان باسەكەگە قاتىسادى. بايتاق قازاق دالاسىنىڭ ءبىر شەتى بولسا دا تاريحي-ساياسي جاعدايلارعا بايلانىستى باسقا ەلدىڭ مەنشىگىنە اينالىپ كەتكەن جەر-سۋىمىز قانشاما؟ ءدال سونداي قۇيقالى جۇرتىمىزدىڭ ءبىر جارتىسى قىتاي شەكاراسىنىڭ ىشىندە جاتىر.

وسى وڭىردە تۋىپ-وسكەن ءۇش قازاق سپورتشىسى قىتاي قۇراماسىنىڭ ساپىندا يندونەزيا ەلىندە وتەتىن XVIII جازعى ازيا ويىندارىنا جولداما الدى.

ەركىن كۇرەس تۇرىنەن 65 كەلى سالماق دارەجەسىندە بەلدەسەتىن ەرلانبەك كاتەيۇلى ەلىمىز جانكۇيەرلەرىنە كوپتەن بەرى تانىس. قىتاي قۇراماسىنىڭ قاتارىندا ريو-دە-جانەيرو وليمپياداسىنا قاتىسقان. ءوز سالماعىندا قىتايدا قارسىلاس شىداتپاي جۇرگەن ەرلانبەك دجاكارتا تورىندە دە اتالعان ەلدىڭ تۋى استىندا ونەر كورسەتپەك.

قازاقستاندىق كۇرەس جانكۇيەرلەرى ءۇشىن جاڭا ەسىم دەپ ءۋاليحان سەرىكۇلىن ايتۋعا بولادى. قىتايدىڭ شىنجاڭ ولكەسى، تارباعاتاي ايماعىندا تۋىپ-وسكەن ءۋاليحان گرەك-ريم كۇرەسىنەن 60 كەلى سالماق دارەجەسىندە ونەر كورسەتەدى. وتكەن جىلى قىتاي سپارتاكياداسىندا قولا مەدال الىپ كوزگە تۇسكەن. سودان بەرى قىتايلىق باپكەرلەردىڭ كوڭىلىنەن شىعىپ، يندونەزيادا باق سىناۋ مۇمكىندىگىنە يە بولىپ وتىر.

بۇلاردان بولەك بوكستان قىتاي ۇلتتىق قۇراماسىنىڭ 75 كەلىگە دەيىنگى سالماق دارەجەسىندە توقتاربەك تاڭاتقانۇلى ەسىمدى قازاق بوكسشىسى ونەر كورسەتەدى. توقتاربەك تە بيىل ازيا ويىندارىنا قىتايدىڭ اتىنان قاتىسادى.

شەتەلدەگى قازاق سپورتشىلارى جايلى ءسوز قوزعاعاندا ەلمۇرات تاس­مۇ­راتوۆتى ايتپاي كەتۋ مۇمكىن ەمەس. وليمپيادانىڭ، الەم چەمپيوناتىنىڭ قولا جۇلدەگەرى، ءتورت دۇركىن ازيا چەمپيونى ەلمۇرات وزبەكستان اتىنان ونەر كورسەتىپ ءجۇر. وزبەك ەلىندە تۋعان تاسمۇراتوۆتىڭ ءبىر كەزدەرى قازاقستانعا كوشىپ كەلگەنىن، كەيىن بەلگىسىز سەبەپتەرمەن ۇلتتىق قۇرامادان ورىن تابىلماي، وزبەكستانعا قايتىپ كەتكەنىن بىلەتىن جانكۇيەرلەردىڭ وكىنىشتەن وزەگى ورتەنەدى بۇگىندە.

Картинки по запросу Елмұрат Тас­мұ­ратов

ريو وليمپياداسىنىڭ قولا جۇلدەگەرى ەلمۇرات تاسمۇراتوۆ

2018 جىلعى جازعى ازيا ويىندارى 18 تامىز بەن 2 قىركۇيەك ارالىعىندا يندونەزيانىڭ دجاكارتا قالسىندا وتەدى.

قۋانىش قاپپاس

Abai.kz

3 پىكىر