جۇما, 17 قىركۇيەك 2021
اقيقاتقا قيانات 5229 22 پىكىر 28 تامىز, 2018 ساعات 12:48

تۇڭعىش پرەزيدەنت مۇراجايىنىڭ باسشىسى قىزمەتكەرىن ۇرىپ، جۇمىستان شىعارىپ جىبەردى

Abai.kz اقپاراتتىق پورتالىنىڭ ەلەكتروندى پوچتاسىنا قاراعاندى وبلىسىنا قاراستى تەمىرتاۋ قالاسىنداعى تۇڭعىش پرەزيدەنتتىڭ تاريحي-مادەني ورتالىعىنىڭ باسشىسى س.سارگيزوۆا قىزمەتكەرىن ۇرىپ، جۇمىستان شىعارىپ جىبەرگەنى تۋراسىندا ماتەريال كەلىپ ءتۇستى. عاليا اقپانبەكوۆا اتتى قىزمەتكەردىڭ ايتقاندارىن ەش وزگەرىسسىز وقىرمان نازارىنا ۇسىنىپ وتىرمىز. قارسى تاراپتىڭ ايتار ءۋاجى بولسا، ولارعا دا مىنبەر بەرەتىنىمىزدى ەسكەرتەمىز. 

Abai.kz اقپاراتتىق پورتالى

مەن اقپانبەكوۆا عاليا رامازانقىزى 2017 جىلى وتباسى جاعدايىما بايلانىستى تەمىرتاۋ قالاسىنا كوشىپ كەلدىم. تۇراقتى جۇمىسقا تۇرۋ ماقساتىندا ءبىرشاما مەكەمەلەرگە ماماندىعىم بويىنشا تۇيىندەمە قالدىردىم. وسى جىلدىڭ شىلدە ايىندا تەمىرتاۋ قالاسىنداعى تۇڭعىش پرەزيدەنتتىڭ تاريحي-مادەني ورتالىعىنا جۇمىسقا شاقىرىلدىم.

جۇمىسقا شىققان العاشقى كۇننەن باستاپ ۇكىمەت باسشىسى ب.ساعىنتاەۆتىڭ كەلۋىنە وراي  جۇرگىزىلىپ جاتقان قىزۋ دايىندىققا مەندە ءوز ۇلەسىمدى قوستىم. ءبىر اپتانىڭ ىشىندە  ەكسپوزيتسيا زالدارىنداعى جادىگەرلەردىڭ ماتىندەرىن مۋزەيلىك ستاندارتقا ساي قايتا جازىپ اۋىستىرىپ شىقتىم.

كەلەسى تامىز ايىندا ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا كورمەلەر وتكىزۋگە ۇسىنىس ءبىلدىردىم. مەكەمە باسشىسى س.سارگيزوۆا باسىندا تۇسىنبەۋشىلىك ءبىلدىرىپ قارسى بولعانىمەن سوڭىندا قولداۋ بىلدىرۋگە ءماجبۇر بولدى.

سونىمەن 2017 جىلدىڭ 24 تامىزىندا وبلىس كولەمىندە العاشقى بولىپ اتالعان باعدارلاما اياسىنداعى العاشقى كورمەنىڭ سالتاناتتى اشىلۋىن وتكىزدىم. كورمە «ۇلىتاۋ الەمى» دەپ اتالدى. كورمەدە «قازاقستاننىڭ كيەلى جەرلەر گەوگرافياسى» بويىنشا قاراعاندى وبلىسىنان ەنگەن كيەلى جەرلەردىڭ تاريحىمەن ۇلىتاۋ ءوڭىرىنىڭ تاريحي-مادەني ەسكەرتكىشتەرى جايلى مول ماعلۇمات بەرىلدى. كورەرمەندەر جىلى قابىلدادى.

رۋحاني جاڭعىرۋ ماقالاسى بويىنشا كەلەسى كورمەنى «تۋعان ولكە تاريحى» دەپ اتادىم.  بۇل كورمەنى ۇيىمداستىرۋدى شەت اۋداندىق مۋزەيىمەن بىرلەسىپ وتكىزۋگە شەشىم قابىلدادىم. وسى كورمەنىڭ ەرەكشەلىگى ول – قازاق حالقىنىڭ اتاقتى باتىرى اعىباي قوڭىربايۇلىنىڭ ءوزى قولدانعان، بىرنەشە جىلدار مازارىندا تۇرىپ كەيىننەن 80 جىلداي ۋاقىت ۇرپاقتارىنىڭ قولىندا ساقتالىپ كەلگەن ساماۋرىننىڭ العاشقى بولىپ كورمەگە قويىلىپ، حالىق نازارىنا ۇسىنىلۋى. مىنە وسى اتالعان كورمەنى ۇيىمداستىرۋ بارىسىندا ءبىزدىڭ باسشىمىز س.سارگيزوۆا تاراپىنان كەدەرگىلەرگە تاپ بولدىم.

شەت اۋدانى، اعادىر ستانسىنان شالعايدا ورنالاسقان كيىكتى اۋىلىنا بارىپ باتىردىڭ ۇرپاقتارىمەن تانىسىپ ساماۋرىندى الىپ قايتۋعا شاعىن ەكسپەديتسيانى جارتىلاي ءوز قاراجاتىممەن ۇيىمداستىرۋعا تۋرا كەلدى. ءبىزدىڭ باسشىمىز س.سارگيزوۆا  «مۇنداي كورمە نەگە كەرەك، سول ساماۋرىنسىز وتكىزە سالمايسىڭ با؟..» - دەگەن سياقتى ءبىراز ارتىق اڭگىمەلەر ايتتى. سوڭىندا ءجۇز ليتر بەنزينگە اقشانى زورعا سۇراپ الدىم. عىلىمي-جيناقتاۋ جۇمىستارىنا س.سارگيزوۆا نە ءوزى قاتىسۋعا، نە ورىنباسارىن جىبەرۋگە نيەت بىلدىرمەدى.

اعىباي باتىردىڭ ساماۋرىنى جايلى اقپارات رەسپۋبليكالىق، جەرگىلىكتى اقپارات بەتتەرىنەن كەڭىنەن جاريالاندى. بۇل دەگەنىمىز ءبىزدىڭ ەڭبەگىمىزدىڭ اقتالعانى دەپ قۋانىپ ءجۇردىم.

بىراق مەكەمە باسشىسى س.سارگيزوۆا اتقارىپ جاتقان جۇمىستارىما  العىس ءبىلدىرۋدىڭ ورنىنا «سەن وزىڭە پيار جاساپ ءجۇرسىڭ، ...نەگە ينتەرۆيۋ بەرەسىڭ؟ ...نەگە ەلدىڭ الدىنا شىعا بەرسىڭ؟ ...پرەزيدەنت ورتالىعىنا مەنىڭ ورنىمدى الۋ ءۇشىن كەلدىڭ بە؟» -دەگەن سياقتى سوزدەرىمەن سوڭىمنان قالمادى.

مەن  تۇڭعىش پرەزيدەنتتىڭ تاريحي-مادەني ورتالىعىنداعى «ەكسپوزيتسيا كورمەمەن جابدىقتاۋ» ءبولىمىنىڭ باسشىسى بولعاندىقتان ءاربىر كورمەدەن ۇلكەن سەنساتسيا جاساماسام دا جاقسى دەڭگەيدە وتكىزۋ كەرەك ەكەنىمدى ايتىپ اقتالۋمەن بولدىم.

قازان ايىندا كەزەكتى كورمەگە دايىندىق ۇيىمداستىرۋ كەزىندە باسشى س.سارگيزوۆا  ماعان كەلەر جىلى عيماراتقا ۇلكەن كولەمدە قارجى ءبولىنىپ جاتقانىن، عيمارات ناۋرىزدان باستاپ جوندەۋ جۇمىستارىنا جابىلاتىنىن ايتتى. مەن بۇل جاڭالىققا: «اشىلعانىنا بەس جىل بولعان عيماراتقا نەسىنە سونشا اقشا بولىنە بەرەدى، ونىڭ ورنىنا ءبىر جاڭا قازاق مەكتەبىن سالىپ بەرمەي مە؟ كەزىندە س.احمەتوۆ اكىم بولىپ تۇرعاندا وسى ورتالىقتى ءسان-سالتاناتىمەن اشىپ، ەلباسىن ءبىر ەمەس ەكى رەت شاقىرىپ كورسەتكەن بولاتىن، مۇنى ءبارى جاقسى بىلەدى. وسى جولى ساپالى جوندەۋ جۇمىستارىن جۇرگىزەدى دەپ ۋادە بەرە الاسىز با نەمەسە تاعى دا وسىلاي شۇرىق-تەسىك بولىپ ەكسپوزيتسيا زالدارىنان جاڭبىر سورعالاپ تۇرادى ما؟» - دەگەن سياقتى پىكىرىمدى ءبىلدىردىم.  مىنە وسى پىكىرىم قاتتى اسەر ەتتى مە نەمەسە مەنىڭ جۇمىستا تىم بەلسەندى كورىنىپ مۋزەي سالاسىن ءبىرشاما جاقسى بىلەتىنىم اسەر ەتتى مە بىلمەيمىن، س.سارگيزوۆا مەنى سول قازان  ايىنىڭ 31-دە جۇمىستان بۇيرىقپەن شىعارىپ تاستادى.  «ءوزىڭ كىنالىسىڭ، قويمايتىن سۇراق قوياسىڭ، ەندى قايدا بارساڭ وندا بار، مەن ەشكىمنەن دە قورىقپايمىن، مەنىڭ ارتىمدا كىم تۇرعانىن سەن بىلەسىڭ بە؟» - دەپ كوكىرەگىن كەرىپ اسقاقتاپ سويلەپ جۇمىستان بوساتتى.

مەن ۇندەمەي كەتە سالۋدىڭ ورنىنا كوپتەگەن قۇزىرەتتى ورىندارعا شاعىم ءتۇسىردىم.  سوت پروتسەستەرى باستالعاندا ماعان تۇڭعىش پرەزيدەنتتىڭ تاريحي-مادەني ورتالىعىنداعى  «كەلىسىم كوميسسياسىنا» ءوتىنىش جاز دەگەن ۇسىنىستار تۇسە باستادى. مەن سول ءوتىنىشتى جازعانىم سول ەدى، بىردەن قايتادان جۇمىسقا قابىلدادى. ەڭبەك كىتاپشامداعى بۇيرىق وزگەرتىلدى. س.سارگيزوۆا ءوز تاراپىنان ۇلكەن قاتەلىك جىبەرگەنىن ايتىپ اقتالىپ باقتى. ادام بولعان سوڭ ءبىر-بىرىمىزگە كەشىرىم بىلدىرگەنىمىز دۇرىس شىعار دەپ ءاربىر ايتقان سوزىنە بەرگەن ۋادەسىنە سەنىم ءبىلدىردىم.

جۇمىسقا قايتا شىعىسىمەن «قازاقستانداعى 100 جاڭا ەسىم» جەڭىمپازدارىنا ارنالعان كورمەنى، ودان كەيىن قارت سپورتشى ا.يساقوۆقا ناۋرىز مەيرامىنا، قازىبەك بي بابامىزدىڭ 350 جىلدىعىنا  تاعى دا باسقا كوپتەگەن تاقىرىپتىق كورمەلەردى ۇيىمداستىرۋعا كىرىسىپ كەتتىم.

س.سارگيزوۆا باسشى رەتىندە ءوز سوزىندە تۇرىپ ارىپتەستەر الدىندا بەرگەن ۋادەسىن ورىندايدى دەپ سەنگەنمىن، بىراق وكىنىشكە وراي بۇل ادامنىڭ سانا-سەزىمى كەك قايتارۋمەن، ۇرىس-كەرىستەن اسپادى. كۇندەلىكتى جۇمىسىنىڭ باسىن مەنىمەن ۇرىسۋدان كابينەتكە كىرىپ ايعايلاۋدان، جۇمىس ىستەۋگە قاساقانا كەدەرگى كەلتىرۋدەن ءبىر تىنبادى. بىرنەشە رەت مەنىڭ جەكە جۇمىس كومپيۋتەرىمدى ادەيىلەپ بۇزىپ تاستادى، كابينەتىنە شاقىرىپ الىپ قول كوتەردى. شىدامنىڭ دا شەگى بار دەپ پروكۋراتۋراعا جازدىم، بىردەن جانىنا ديرەكتور ورىنباسارى ر.ءمۇستافيندى، ن.يلياسوۆانى، ءبولىم باسشىسى د.كەتەباەۆتى، ق.مامبەتوۆتى  الىپ قايتادان كەشىرىم سۇراپ وتىنىشتەردى قايتىپ الۋىمدى ءوتىندى.  بۇل كىسىلەر ورازا ايىندا ادامدار كەشىرىمدى بولۋ كەرەك دەپ ەكەۋمىزدى جالىنىپ-جالپايىپ رايىمىزدان قايتاردى. سوندا بۇل نە ءوزى، ءبارىن ءوزى ءبۇلدىرىپ ويىنا كەلگەنىن ىستەپ الادى دا، ارتىنان جىلاپ-سىقتاپ قارماعانداعى ادامداردى پايدالانادى، ولارعا ايتقانىن ىستەتەدى. نە دەگەن ەكىجۇزدىلىك نەمەسە ۇياتسىزدىق دەپ ايتار ەدىم. ادامداردىڭ سەنىمىن اقتاماۋ، ويىنشىققا اينالدىرۋ، مازاق قىلۋ. مۇنىڭ ءبارى قولىنداعى بيلىگىن اسىرا پايدالانا ءبىلۋدىڭ ءبىر كورىنىسى. نەگە بۇل ادامعا سونشا كەشىرىممەن قاراعانىم وزىمە تۇسىنىكسىز. وسى جينالىستاردىڭ ءبارىنىڭ حاتتامالارى مەنىڭ قولىمدا بار.

ناۋرىز مەيرامىنا ارناپ كورمە وتكىزۋگە كيىز-ءۇي جابدىقتارىن ىزدەپ شارق ۇرىپ جۇرسەم جۇمىستا جوقسىڭ دەپ مەنىڭ ايلىعىمنان مىڭ تەڭگە ۇستاپ قالدى. كيىز-ءۇي جابدىقتارىن ءبىر كۇنگە جالعا الۋعا 30 مىڭ تەڭگە سۇراسا مەن ونى اقىسىز تاۋىپ بەرۋگە كوندىرىپ الىپ كەلدىم. قىزمەتكەردىڭ ەڭبەگىن باعالاعان ءتۇرى وسى. سول مىڭ تەڭگە ءۇشىن داۋ-دامايعا بارمادىم. مەنىڭ ەڭبەگىممەن جاسالعان ءار كورمەدە س.سارگيزوۆا الدىڭعى پلاندا فوتوعا ءتۇسىپ بارلىعىن ءوزى جاساپ جاتقانداي سىڭاي تانىتىپ مادەنيەت باسقارماسىنا فوتو-ەسەپ جىبەرىپ قاتتى قاداعالايدى. مەنىڭ قاتىسۋىممەن وتكەن ءىس-شارا فوتالارىن كورسەتپەۋگە تىرىسىپ كەلدى. ءبارىن ءبىلىپ جۇرسەم دە كوز جۇمىپ كەلدىم. سەبەبى پاراساتىمەن ساناسى وسىعان جەتىپ تۇرعان ادامعا بىردەمە ايتۋدىڭ ءوزى بوس اۋرەشىلىك ەكەنىن ءتۇسىندىم.

2018 جىلدىڭ ءبىرىنشى جارتى جىلدىعىنا جوسپار بويىنشا 7 كورمە بولسا، ءىس-جۇزىندە مەنىڭ ءبولىمىم 13 كورمە جاسادى. بولىمدە بار-جوعى ەكى ادامبىز. مۇنىڭ ءبارى ءبىلىم مەن بىلىكتىلىكتىڭ  ارقاسى ەكەنى بەلگىلى.

تۇڭعىش پرەزيدەنت تاريحي-مادەني ورتالىعىنىڭ ەكى كونفەرەنتس زالى بوس تۇرعانىن كورگەن جوقپىن، تەمىرتاۋدىڭ مەكەمەلەرى، تاۋار ماركەتينگىمەن اينالىساتىندار  جالعا الىپ كۇندە ءبىر ءىس-شارالار ءوتىپ جاتادى. ءبىر زال 35 مىڭعا، ەكىنشى ۇلكەن زال 45 مىڭعا بەرىلىپ وتىرسا مەكەمەگە قوماقتى اقشا تۇسەتىنى ايدان انىق. وسىعان قاراماستان بىردە-ءبىر كورمەنى جاساۋعا قاراجات بولىنبەيدى. ەسكى-قۇسقىنى قۇراستىرىپ باردان جوق جاساپ ايتەۋىر بىلگەنىمىزدى ىستەيمىز. ال س.سارگيزوۆانى بۇل سۇراقتار قىزىقتىرمايدى. س.سارگيزوۆا ءبىر جىل بويى جۇمىسقا مەنەن قالاي ءوش السام دەپ جوسپار قۇرۋمەن كەلىپ ءجۇردى. وعان مەن عانا ەمەس باسقا ارىپتەستەرىم دە كۋا. ىسىنە قاراپ ۇيالۋمەن جۇردىك. تۇسىنەر، قويار دەگەن ءۇمىتىمىز بولعانىن جاسىرمايمىن.

مەن ءاربىر كورمەنى نەمەسە ەكسپوزيتسيانى قۇرۋ بارىسىندا عىلىمي تۇجىرىمىن، جادىگەر سۇرىپتاۋ جۇمىستارىن، جادىگەر ءماتىنىن دايىنداۋ، اننوتاتسياسىن، ەكسپوزيتسيا قۇرىلىمىن، ەكسكۋرسيا جۇرگىزۋ سياقتى جۇمىستاردى تولىعىمەن ءوزىم اتقارىپ شىعامىن. ياعني جۇمىستىڭ بارلىق پروتسەستەرىن ءوز كوزىممەن كورىپ، ءوز قولىممەن اتقارامىن. بۇل مەن ءۇشىن وتە ماڭىزدى.

وسى جۇمىستاردىڭ ءبارىن مەن س.سارگيزوۆانىڭ ويىنشا ماقتانۋ ءۇشىن، وزىمە پيار جاساۋ ءۇشىن جاسايدى ەكەنمىن. نەمەسە ءوزىمدى كورسەتىپ ونىڭ ورنىن تارتىپ الايىن دەپ ءجۇرىپپىن. قانداي كورىپكەلدىك؟ س.سارگيزوۆا سياقتى باسشىلاردىڭ سانا-سەزىمى وسى دەڭگەيدەن اسپاسا ءبىزدىڭ بولاشاعىمىز نە بولماق؟  بىز نەگە وسىنداي باسشىلارعا تاۋەلدى بولۋىمىز كەرەك؟ نەگە بارىنە شىداپ باس شۇلعىپ وتىرا بەرۋىمىز كەرەك؟ مەن سياقتى اراسىندا بىرەۋلەرى باس كوتەرسە بولدى، ول ادامعا بارىنشا كۇيە جاعىپ،  بيلىگىن پايدالانىپ ايتەۋىر كوزىن قۇرتىپ تىنادى. بۇل ءبىر س.سارگيزوۆا ەمەس، كوپ جەرلەردە وسىنداي جۇيە قالىپتاسقان.

ءبىز نە ءۇشىن ءبىلىم الامىز، وقيمىز، تاجىريبە جينايمىز مۇنىڭ ءبارى س.سارگيزوۆا سياقتى باسشىلار جارقىراپ كورىنۋ ءۇشىن بە؟  ءبىز سياقتى قاتارداعى قىزمەتكەرلەردىڭ ادال ەڭبەگىن وسىنداي باسشىلار ۇتىمدى پايدالانادى. قاراپايىم قىزمەتكەردى ارقاسىندا ءوزىن كورسەتەدى. كەرەك بولماعان كەزدە وپ-وڭاي قۇتىلا سالادى. ءبىزدىڭ جۇيە وسىنداي. ادىلدىك جوق.

بىرنەشە جىلدار مەدسەسترا بولىپ، ودان كەيىن گاي سالاسىندا ەڭبەك ەتكەن س.سارگيزوۆا قانداي ەڭبەگىمەن مۋزەي باسقارۋعا تاڭداپ الىندى؟ بۇل اراسى بىزگە تۇسىنىكسىز.  اينالدىرعان ءبىر جىلدا ءوزى از عانا ۇجىمنان بىرنەشە ادام ءوز ەركىمەن جۇمىستان كەتتى. بۇل س.سارگيزوۆا جۇرگىزىپ وتىرعان كادرلىق ساياساتتىڭ جەمىسى.

مۋزەي سالاسىندا 20-30 جىل جۇرگەن بىلىكتى ارىپتەستەرىم نەگە كەلمەيدى باسشىلىققا؟  بۇل اراسى دا تۇسىنىكسىز... بىزدە جاس ماماندارعا، بىلىكتىلىگىن  شەت ەلدەردە ارتتىرىپ كەلگەن كادرلارعا وسۋگە مۇمكىندىك جوق. سەبەبى كەيبىر مۋزەيلەردە باسشىلار 30 جىل وتىرادى تاپجىلماي. قۇددى وسى ءبىر ورىندى جەتپىس جەتىنشى اتاسىنان مۇرالىققا الىپ قالعانداي. وسى ماسەلەنى كوتەرەتىن ۋاقىت جەتكەن سياقتى. ءبارى ءبىر ستاندارتتا جۇمىس اتقارادى. سانى بار ساپاسى جوق ءىس-شارالاردى وتكىزىپ، مادەنيەت باسقارماسىنا فوتو-ەسەپ بەرەدى، ولار ءارى قاراي جىبەرەدى، بولدى سونىمەن جۇمىس ءبىتتى.

ويلانىپ قاراساڭىز «رۋحاني جاڭعىرۋ» ماقالاسى اياسىندا كوپتەگەن جۇمىس اتقارۋعا بولادى. اعىباي باتىردىڭ ساماۋرىنى سياقتى قۇندى دۇنيەلەر ءالى دە بولسا حالىقتىڭ قولىندا بار نەمەسە ءار وڭىردە تىلسىم سىرلارعا تولى كيەلى ورىنداردا جەتەرلىك، اتى شىقپاعان نەبىر شەبەرلەرمەن ۇستالارىمىز، شەجىرەشى قارتتارىمىز تاعى بار.  مىنە وسى باعىتتا مۋزەيلەر اراسىندا رەيتينگكە تاپسىرمالار بەرىلسە، جاڭالىق اشقان قىزمەتكەرلەرگە سىي-اقىلار بەرىلسە نەگە جۇمىس ىستەمەسكە؟  زەرتتەۋ جۇمىستارىمەن اينالىسۋدىڭ ورنىنا س.سارگيزوۆا سياقتى بيلىكقۇمار باسشىلارمەن الىسۋمەن ۋاقىت ءوتىپ جاتىر.

ءبىزدىڭ بىلىققا باتقان مۋزەي سالاسى جاستارعا وسىنداي ۇلگى بەرىپ وتىر. س.سارگيزوۆا باسقالارىنا باستارىن كوتەرىپ سويلەي المايتىنداي ۇلگى كورسەتىپ وتىر. ون جىلدان استام تاجىريبەسى بار، قر ۇلتتىق مۋزەيىنىڭ نەگىزىن سالۋشىنىڭ ءبىرى، بىلىكتى مامان، كوپتەگەن عىلىمي-تاجىريبەلىك كونفەرەنتسيالارعا قاتىسۋشى، بىرنەشە عىلىمي ماقالالاردىڭ اۆتورى ع.اقپانبەكوۆانى وپ-وڭاي جۇمىستان شىعارا سالعاندا سەندەر كىمسىڭدەر؟ -  دەگەن ءسوزدى ءىس-ارەكەتىمەن دالەلدەپ بەردى. مۇنى كورگەن كەز-كەلگەن قىزمەتكەر ارينە «سەن تيمەسەڭ مەن تيمەن بادىراق كوز» - دەگەن پوزيتسيامەن جۇمىسقا كەلىپ، 8 ساعات وتىرىپ قايتادى. سونىمەن جىلدار جىلجىپ وتە بەرەدى. بىزدەگى باستى ماسەلە سول – ۇندەمەي، اۋىز اشپاي وتىرا بەرۋ. باسشىلىققا كىمدى اكەلەدى ونى ۇجىمنان ەشكىم  دە سۇرامايدى.

تاريحتىڭ ءيسى مۇرنىنا بارماسا دا، بىردە-ءبىر ەكسكۋرسيا جۇرگىزبەسە دە، بىردە-ءبىر عىلىمي ماقالا جازباسا دا، بىردە-ءبىر عىلىمي جيناقتاۋ ەكسپەديتسياسىنا قاتىسپاسا دا، ەكسپوناتتىڭ نە ەكەنىن بىلمەسە دە س.سارگيزوۆا باسشى بولۋعا لايىقتى. سەبەبى بۇعان زاڭدىلىق مۇمكىندىك بەرەدى. ايتپەسە، «قاراعاندى وبلىسىندا س.سارگيزوۆادان باسقا تاجىريبەلى-بىلىكتى باسشى تابىلعان جوق» – دەگەنگە كىم سەنەدى.

زاڭدى ەڭبەك دەمالىسقا بۇيرىق شىعارىپ تۇرىپ كەلەسى كۇنى  «ءبىر جىلدىق ەڭبەك كەلىسىمشارتىڭ اياقتالدى» - دەپ جۇمىستان شىعارىپ جىبەرگەن س.سارگيزوۆانى تاعى دا سوتقا بەرىپ جاتىرمىن. بىراق جەڭىپ شىعاتىنىما كۇمانىم بار، سەبەبى مەنىڭ تىرەۋىشىم ءبارىن اقشامەن شەشەتىن قۇدىرەتىم دە جوق.

قىزمەتكەردى ءبىر جىلدا ءۇش رەت جۇمىستان شىعارا سالاتىن، ودان كەيىن قايتادان الا سالاتىن س.سارگيزوۆانىڭ ءىس-ارەكەتىن ءبىزدىڭ مادەنيەت باسقارماسى ءبىلىپ كورىپ وتىرسا دا ۇندەرىن شىعارمايدى. الدارىنا بارساڭ دۇرىس جاۋاپ تا الا المايسىڭ. «بار كىنا وزىڭنەن» دەپ شىعارىپ سالادى.

مەن ءبىر باسىمدا بىرنەشە كرەديتىم بار جۇمىستان العان ازىن-اۋلاق ايلىققا ءومىر ءسۇرىپ جۇرگەن جالعىزباستى انامىن. بار ماقساتىم – نە جۇمىس ىستەسەڭ دە ادال بولۋ. جاعىمپاز بولا الماعانىم، باستىقتىڭ ءتىلىن تاۋىپ استى-ۇستىنە تۇسە الماعانىم، ويىمدى اشىق ايتقانىم ءۇشىن كىنالى بولسام نە ىستەۋىم كەرەك؟

قۇرمەتپەن، عاليا اقپانبەكوۆا

Abai.kz

 

22 پىكىر