استانادا فيلوسوف، عالىم، ارميان ءالىپبيىنىڭ نەگىزىن قالاۋشى مەسروپ ماشتوتس اتىنداعى كوشەنىڭ سالتاناتتى اشىلۋ ءراسىمى ءوتتى.

ءىس-شاراعا قازاقستان رەسپۋبليكاسى پرەمەر-ءمينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين، ارمەنيا رەسپۋبليكاسىنىڭ ۆيتسە-پرەمەرى مگەر گريگوريان، قر مادەنيەت جانە اقپارات ءمينيسترى ايدا بالاەۆا، ارمەنيا رەسپۋبليكاسىنىڭ ءبىلىم، عىلىم، مادەنيەت جانە سپورت ءمينيسترى جاننا اندرەاسيان، ارميان دياسپوراسىنىڭ وكىلدەرى جانە قوعام قايراتكەرلەرى قاتىستى.

استانادا مەسروپ ماشتوتس اتىنداعى كوشەنىڭ اشىلاتىنى تۋرالى العاش رەت مەملەكەت باسشىسى قاسىم-جومارت توقاەۆتىڭ 2024 جىلعى ساۋىردە ەرەۆانعا جاساعان رەسمي ساپارى بارىسىندا جاريالانعان ەدى.

ءوز قۇتتىقتاۋ سوزىندە مادەنيەت جانە اقپارات ءمينيسترى ايدا بالاەۆا كوشەنىڭ اشىلۋى ەكى حالىقتىڭ دوستىق، ءوزارا تۇسىنىستىك پەن مادەني بىرلىكتى نىعايتۋعا دەگەن ۇمتىلىسىنىڭ جاڭا سيمۆولى ەكەنىن اتاپ ءوتتى.

«بۇگىنگى ءىس-شارا – ارميان حالقىنا دەگەن قۇرمەتىمىز بەن دوستىق پەيىلىمىزدىڭ بەلگىسى. وسى جىلدىڭ ءساۋىر ايىندا ەرەۆاندا قازاقتىڭ ۇلى اقىنى – اباي قۇنانبايۇلىنىڭ اتىنداعى ساياباق اشىلدى. ەندى ول جەردە ويشىلدىڭ قۇندى مۇراسى ۇلىقتالادى. بۇگىن قازاقستاندا مەسروپ ماشتوتستىڭ ەسىمى بەرىلگەن كوشەنى اشۋ ارقىلى ءبىز وسى يگى قادامعا قۇرمەتپەن جاۋاپ بەرىپ، رۋحاني مۇرا – مادەنيەتتەرىمىز قوس وزەننىڭ ساعاسىنداي توعىساتىن، ءبىر-ءبىرىن بايىتا تۇسەتىن كەڭىستىك ەكەنىن تاعى ءبىر دالەلدەيمىز»، – دەدى ايدا بالاەۆا.

سالتاناتتى ءىس-شارا بارىسىندا ءسوز سويلەگەن ارمەنيا رەسپۋبليكاسىنىڭ ءبىلىم، عىلىم، مادەنيەت جانە سپورت ءمينيسترى جاننا اندرەاسيان ارميان عالىمىنىڭ ەسىمىن ۇلىقتاۋ حالىقتاردىڭ ءوزارا قۇرمەتى مەن دوستىعى، مادەني ىنتىماقتاستىعى تاريحىنداعى جاڭا بەلەس ەكەنىن اتاپ ءوتتى.

«ەرەۆاندا اباي ساياباعىنىڭ، ەندى مىنە، استاناداعى ماشتوتس كوشەسىنىڭ اشىلۋى ەكى ەل مادەنيەتىن جالعاعان كوپىر ىسپەتتى. بۇل كوپىر ارقىلى تەك ۇلى تۇلعالاردىڭ ەسىمدەرى عانا ەمەس، بەيبىتشىلىك پەن ءبىلىم، شىعارماشىلىق پەن دوستىق سياقتى ورتاق قۇندىلىقتار دا ۇرپاقتان ۇرپاققا تارايدى. ارمەنيا مەن قازاقستان – تاريحى تەرەڭ، ۇلى ويشىلدارىنىڭ رۋحاني مۇراسىن ۇلىقتاپ، كەلەشەككە ۇمتىلعان مەملەكەتتەر. ەكى ەل اراسىنداعى ىنتىماقتاستىق قاشاندا ءبىر-ءبىرىن تولىقتىرىپ، بايىتىپ وتىراتىن سەرىكتەستىككە نەگىزدەلگەن. سوندىقتان ماشتوتس كوشەسىنىڭ اشىلۋى ءبىزدىڭ مادەني جانە ءبىلىم سالاسىنداعى بايلانىستارىمىزدى جاڭا دەڭگەيگە كوتەرەتىن ماڭىزدى قادام دەپ بىلەمىن»، – دەدى جاننا اندرەاسيان.

ايتا كەتەيىك، ءىس-شارا ارمەنيا پرەمەر-ءمينيسترى نيكول پاشينياننىڭ رەسمي ساپارى اياسىندا ءوتتى.

مەسروپ ماشتوتس – ارمەنيا تاريحىنداعى اسا ماڭىزدى تۇلعا. ونىڭ اعارتۋشىلىق قىزمەتى ۇلتتىق جازبا مادەنيەتىنىڭ نەگىزىن قالاپ، ءبىلىم مەن ادەبيەتتىڭ دامۋىنا زور سەرپىن بەردى. بۇل ارميان حالقىنىڭ تاريحي بولمىسىن ساقتاۋعا ىقپال ەتكەن شەشۋشى فاكتورلاردىڭ ءبىرى بولدى.

Abai.kz