پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا باستاعان كوميتەت مۇشەلەرى «شىعىس» وڭىرلىك قولباسشىلىعى باسقارماسىندا، ۇلتتىق ۇلاننىڭ 5518 بولىمىندە، كۇرشىم شەكارا وتريادىندا، شەكارا زاستاۆاسىندا بولدى، سونداي-اق «مايقاپشاعاي» وتكىزۋ بەكەتىنىڭ جۇمىسىمەن تانىستى، - دەپ حابارلايدى قر پارلامەنتى سەناتىنىڭ ءباسپاسوز قىزمەتى.

ءبولىم باسشىسى پولكوۆنيك ورال باتىرعاليەۆ دەپۋتاتتارعا شەكاراشىلاردىڭ كۇندەلىكتى اسكەري قىزمەتى تۋرالى ايتىپ بەردى جانە شەكاراداعى وتكىزۋ بەكەتىندەگى احۋال تۋرالى باياندادى. سونداي-اق سەناتورلارعا شەكارا كۇزەتىندەگى تەحنيكالىق قۇرالدار كورسەتىلىپ، پاسپورتقا باقىلاۋ جۇرگىزۋ جۇمىسىنىڭ بارىسى تانىستىرىلدى.

سول كۇنى 2535 اسكەري ءبولىمىنىڭ كۇرشىم شەكارا وتريادىندا شىعىس قازاقستان وبلىسىنىڭ اكىمى دانيال احمەتوۆ، ەلىمىزدىڭ ۇلتتىق قاۋىپسىزدىك كوميتەتىنىڭ شەكارا قىزمەتىنىڭ، قورعانىس مينيسترلىگىنىڭ، ىشكى ىستەر مينيسترلىگى ۇلتتىق ۇلاننىڭ باسشىلىعى، شەكارالىق اۋداندار اكىمدەرى قاتىسقان سەنات كوميتەتىنىڭ وتىرىسى بولدى.

وتىرىستا مەملەكەتتىك شەكارانى كۇزەتۋ ماسەلەلەرى تالقىلاندى. اتاپ ايتقاندا، مەملەكەتتىك شەكارانىڭ شىعىس شەبىندەگى قازىرگى جاعداي، اسكەري قىزمەتشىلەردىڭ الەۋمەتتىك-تۇرمىس جاعدايىن جاقسارتۋ تۋرالى ايتىلدى.

ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى دارحان ءدىلمانوۆ سەناتورلارعا قارجىلاندىرۋداعى جەتىسپەۋشىلىكتەر تۋرالى ايتتى. شەكاراشىلارعا 1 ميلليارد 94 ميلليون تەڭگەگە جۋىق قارجى كەرەك. بۇل قارجى قازاقستان مەن قىتاي اراسىنداعى مەملەكەتتىك شەكارانىڭ شىعىس قازاقستان وبلىسى اۋماعىنان وتەتىن بولىگىنىڭ بويىندا ورنالاسقان بولىمشەلەردىڭ ينفراقۇرىلىمدارىن دامىتۋ ءۇشىن قاجەت.

سەناتورلار تولەۋبەك مۇقاشەۆ، سەرىك جاقسىبەكوۆ، مۇحتار قۇل-مۇحاممەد، تالعات مۇساباەۆ، نۇرجان نۇرسيپاتوۆ شەشىمىن تابۋى ءتيىس بىرقاتار وزەكتى ماسەلەلەرگە توقتالدى. اتاپ ايتقاندا، مەملەكەتتىك شەكارانى كۇزەتۋ جانە قورعاۋ، قورعانىس جانە ۇلتتىق قاۋىپسىزدىك ماقساتتارى ءۇشىن جەر تەلىمدەرىن راسىمدەۋ، شەكارالىق ايماقتاردى دامىتۋ جانە الەۋمەتتىك ينفراقۇرىلىممەن قامتاماسىز ەتۋ جونىندەگى كەشەندى مەملەكەتتىك باعدارلاما قابىلداۋ قاجەتتىگى، ساۋدا جونىندەگى بىرقاتار شەكتەۋلەردى الىپ تاستاۋ جانە ۆاليۋتالىق شەكتەۋدى جۇمسارتۋ قاجەتتىگى تۋرالى ايتىلدى.

پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا كوشپەلى وتىرىستىڭ قورىتىندىسى بويىنشا ۇسىنىستار ازىرلەنىپ، ۇكىمەتكە جىبەرىلەتىنىن اتاپ ءوتتى. «كوتەرىلگەن بارلىق ماسەلەلەر دەپۋتاتتاردىڭ باقىلاۋىندا بولادى»، - دەدى سەناتور.

شىعىس قازاقستان وبلىسى اۋماعىندا ورنالاسقان بىرقاتار اسكەري بولىمدەردە بولعان دەپۋتاتتار اسكەري قىزمەتشىلەردىڭ تىنىس-تىرشىلىگىمەن، ازىق-تۇلىكپەن قامتاماسىز ەتىلۋ جاعدايىمەن تانىستى جانە اسكەري ءبولىمنىڭ ينفراقۇرىلىمىن دامىتۋ مەن تۇرعىن ۇيمەن قامتاماسىز ەتۋ ماسەلەلەرىن تالقىلادى.

سەناتورلار 11 قىركۇيەكتە «سەمەي ماشينا جاساۋ زاۋىتى» مەن «سەمەي ينجينيرينگ» كاسىپورنىنا بارادى.

Abai.kz